مجمع الزوائد ومنبع الفوائد

شقیق یا ان کے علاوہ کوئی اور صاحب بیان کرتے ہیں : یہ شک قیس نامی راوی کو ہے : سیدنا سلمان فارسی رضی اللہ عنہ کے ہاں ایک شخص آیا ، انہوں نے اس کے لئے وہ چیز منگوائی ، جو اُن کے گھر میں موجود تھی اور یہ فرمایا : اگر نبی اکرم صلی اللہ علیہ وسلم نے ہمیں منع نہ کیا ہوتا ، راوی کو شک ہے ، یا شاید یہ الفاظ ہیں : اگر ہمیں اس بات سے منع نہ کیا گیا ہوتا کہ ہم میں سے کوئی ایک اپنے ساتھی کے لئے تکلف کرے ، تو میں نے تمہارے لئے تکلف کرنا تھا ۔
یہ روایت امام أحمد نے ، امام طبرانی نے معجم کبیر اور معجم اوسط میں مختلف اسانید کے ساتھ نقل کی ہے ، معجم کبیر کی اسانید میں سے ایک کے رجال ” صحیح “ کے رجال ہیں ،
یہ روایت امام بزار نے اس کی مانند روایت کے طور پر ابووائل سے نقل کی ہے ، اور انہوں نے اس میں شک کا اظہار نہیں کیا ۔

شقیق بن سلمہ بیان کرتے ہیں : میں اور میرا ایک ساتھی ، سیدنا سلمان فارسی رضی اللہ عنہ کے پاس گئے ، تو سیدنا سلمان فارسی رضی اللہ عنہ نے ارشاد فرمایا : اگر یہ بات نہ ہوتی کہ نبی اکرم صلی اللہ علیہ وسلم نے تکلف سے منع کیا ہے ، تو میں نے تمہارے لئے تکلف کرنا تھا ، پھر وہ روٹی اور نمک لے کر آئے ، تو میرے ساتھی نے یہ کہا: اگر ہمارے نمک میں ” صعتر“ ہوتا تو مناسب تھا ، تو سیدنا سلمان فارسی رضی اللہ عنہ نے اپنی طہارت کا برتن منگوا کر اسے رہن رکھوایا اور پھر اس کے ذریعے ” صعتر“ لے کر آئے ، جب ہم نے کھانا کھا لیا ، تو میرے ساتھی نے کہا: ہر طرح کی حمد اللہ تعالیٰ کے لیے مخصوص ہے ، جس نے ہمیں اس کے بارے میں قناعت عطا کی ، جو رزق اس نے ہمیں دیا ، تو سیدنا سلمان فارسی رضی اللہ عنہ نے ارشاد فرمایا : اُس نے تمہیں جو رزق دیا تھا ، اگر تم نے اس پر قناعت کی ہوتی ، تو میرا طہارت کا برتن رہن نہیں رکھا جانا تھا ۔
یہ روایت امام طبرانی نے نقل کی ہے ، اور اس کے رجال ” صحیح“ کے رجال ہیں ، صرف محمد بن منصور طوسی کا معاملہ مختلف ہے ، اور وہ ثقہ ہے ۔

ان کی نقل کردہ ایک روایت میں یہ الفاظ ہیں : ” اللہ کے رسول صلی اللہ علیہ وسلم نے ہمیں اس بات سے منع کیا ہے کہ ہم مہمان کے لئے اُس چیز کے حوالے سے تکلف کریں ، جو ہمارے پاس نہ ہو ۔ “