مجمع الزوائد ومنبع الفوائد

سیدنا مقداد بن اسود رضی اللہ عنہ بیان کرتے ہیں : نبی اکرم صلی اللہ علیہ وسلم نے اپنے اصحاب سے دریافت کیا : زنا کے بارے میں تم لوگوں کی کیا رائے ہے ؟ لوگوں نے عرض کی : یہ حرام ہے ، جسے اللہ اور اس کے رسول صلی اللہ علیہ وسلم نے حرام قرار دیا ہے ، تو یہ قیامت کے دن تک حرام رہے گا ، راوی بیان کرتے ہیں : تو نبی اکرم صلی اللہ علیہ وسلم نے اپنے اصحاب سے ارشاد فرمایا : ” آدمی دس عورتوں کے ساتھ زنا کر لے ، یہ اُس کے لیے اس سے زیادہ ہلکا ہو گا کہ وہ اپنے پڑوسی کی بیوی کے ساتھ زنا کرے ۔ “ راوی بیان کرتے ہیں : نبی اکرم صلی اللہ علیہ وسلم نے دریافت کیا : چوری کے بارے میں تم لوگوں کی کیا رائے ہے ؟ لوگوں نے عرض کی : اس کو اللہ اور اس کے رسول صلی اللہ علیہ وسلم نے حرام قرار دیا ہے ، تو یہ حرام ہے ، نبی اکرم صلی اللہ علیہ وسلم نے ارشاد فرمایا : ” آدمی دس گھروں میں چوری کر لے ، یہ اُس کے لیے اس سے زیادہ ہلکا ہو گا کہ وہ اپنے پڑوسی کے گھر میں چوری کرے ۔ “
یہ روایت امام أحمد نے اور امام طبرانی نے معجم کبیر اور معجم اوسط میں نقل کی ہے ، اور اس کے رجال ثقہ ہیں ۔

سیدنا ابوہریرہ رضی اللہ عنہ بیان کرتے ہیں : ایک شخص نے عرض کی : یا رسول اللہ ! فلاں عورت ، راوی بیان کرتے ہیں : اس شخص نے اُس عورت کی نماز ، صدقہ کرنے اور روزہ رکھنے میں کثرت کا ذکر کیا ، اور یہ بتایا : تاہم وہ اپنی زبان کے ذریعے اپنے پڑوسیوں کو اذیت پہنچاتی ہے ، تو نبی اکرم صلی اللہ علیہ وسلم نے ارشاد فرمایا : وہ جہنم میں جائے گی ، اس شخص نے عرض کی : یا رسول اللہ ! فلاں عورت کا یہ معاملہ ہے ، اس نے یہ بتایا کہ اُس عورت کا روزہ صدقہ کرنا اور نماز کم ہیں ، تاہم وہ پنیر کے ٹکڑے صدقہ کر دیتی ہے ، اور اپنے پڑوسیوں کو اپنی زبان کے ذریعے اذیت نہیں دیتی ہے ، تو نبی اکرم صلی اللہ علیہ وسلم نے ارشاد فرمایا : وہ جنت میں جائے گی ۔ “
یہ روایت امام أحمد اور امام بزار نے نقل کی ہے ، اور اس کے رجال ثقہ ہیں ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اللہ کی قسم ! وہ مومن نہیں ہو گا ، اللہ کی قسم ! وہ مومن نہیں ہو گا ، اللہ کی قسم ! وہ مومن نہیں ہو گا ، لوگوں نے دریافت کیا : یا رسول اللہ ! کون ؟ نبی اکرم صلی اللہ علیہ وسلم نے ارشاد فرمایا : ایسا پڑوسی ، جس کا پڑوسی اُس کے بوائق سے محفوظ نہ ہو ، لوگوں نے دریافت کیا : یا رسول اللہ ! اس کے بوائق سے مراد کیا ہے ؟ نبی اکرم صلی اللہ علیہ وسلم نے فرمایا : اس کا شر ۔ علامہ ہیثمی فرماتے ہیں : میں یہ کہتا ہوں : سیدنا ابوہریرہ رضی اللہ عنہ کے حوالے سے صحیح میں یہ حدیث مذکور ہے : ” وہ شخص جنت میں داخل نہیں ہو گا ، جس کا پڑوسی اُس کے بوائق ( یعنی شر ) سے محفوظ نہ ہو ۔ “
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدنا طلق بن علی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” وہ شخص مومن نہیں ہے ، جس کا پڑوسی اُس کے بوائق ( یعنی شر ) سے محفوظ نہ ہو ۔ “
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی ایوب بن عتبہ ہے ، جسے جمہور نے ضعیف قرار دیا ہے ، اور وہ صدوق ہے ، اور بکثرت غلطیاں کرتا ہے ۔

سیدنا انس بن مالک رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” وہ شخص مومن نہیں ہے ، جس کا پڑوسی اس کے بوائق ( یعنی شر ) سے محفوظ نہ ہو ۔ “
یہ روایت امام ابویعلیٰ نے نقل کی ہے ، اس کی سند میں ایک راوی ابن اسحاق ہے اور وہ مدلس ہے ۔

سیدنا کعب بن مالک رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا اور بولا: یا رسول اللہ ! میں نے بنو فلاں کے محلے میں رہائش اختیار کی ، اُن لوگوں میں مجھے سب سے زیادہ تکلیف کا سامنا اُس شخص سے کرنا پڑا ، جو میرا سب سے زیادہ قریبی پڑوسی ہے ، تو نبی اکرم صلی اللہ علیہ وسلم نے سیدنا ابوبکر رضی اللہ عنہ ، سیدنا عمر رضی اللہ عنہ اور سیدنا علی رضی اللہ عنہ کو بھیجا کہ وہ اس محلے کی مسجد میں جائیں ، اور اس کے دروازے پر کھڑے ہو کر یہ اعلان کریں : ” خبردار ! چالیس گھروں تک پڑوس ہوتا ہے ، اور وہ شخص جنت میں داخل نہیں ہو گا ، جس کا پڑوسی اس کے بوائق ( یعنی شر ) سے خوفزدہ ہو ۔ “
یہ روایت امام طبرانی نے نقل کی ہے ، اس کی سند میں ایک راوی یوسف بن سفر ہے اور وہ متروک ہے ۔

سیدنا عبداللہ بن مسعود رضی اللہ عنہ بیان کرتے ہیں : ایک شخص سیدہ فاطمہ رضی اللہ عنہا کے پاس آیا اور اس نے دریافت کیا : اے اللہ کے رسول کی صاحبزادی ! کیا اللہ کے رسول صلی اللہ علیہ وسلم نے آپ کے پاس کوئی ایسی چیز چھوڑی ہے ، جسے آپ خصوصی چیز قرار دیتی ہوں ؟ تو سیدہ فاطمہ رضی اللہ عنہا نے فرمایا : اے کنیز ! تم وہ جریدہ لے کر آؤ ! اس کنیز نے اُسے تلاش کیا ، لیکن وہ اسے نہیں ملا ، تو سیدہ فاطمہ رضی اللہ عنہا نے فرمایا : تمہارا ستیاناس ہو ، تم اُسے تلاش کرو ! کیونکہ وہ میرے نزدیک حسن اور حسین کے برابر ہے ، اس کنیز نے اسے تلاش کیا ، تو پتہ چلا کہ اس نے جھاڑو دی تھی اور وہ اس کچرے کے درمیان موجود ہے ، اس تحریر میں یہ بات لکھی ہوئی تھی : سیدنا محمد صلی اللہ علیہ وسلم نے ارشاد فرمایا ہے : ” وہ شخص مومنین میں سے نہیں ہے ، جس کا پڑوسی اُس کے بوائق ( یعنی شر ) سے محفوظ نہ ہو ، جو شخص اللہ تعالیٰ اور آخرت کے دن پر ایمان رکھتا ہو ، اسے اپنے مہمان کی عزت افزائی کرنی چاہیے ، اور جو شخص اللہ تعالیٰ اور آخرت کے دن پر ایمان رکھتا ہو ، اسے اپنے پڑوسی کو اذیت نہیں پہنچانی چاہئے ، اور جو شخص اللہ تعالیٰ اور آخرت کے دن پر ایمان رکھتا ہو ، اُسے بھلائی کی بات کرنی چاہیے ، ورنہ خاموش رہنا چاہیے ، بے شک اللہ تعالیٰ زندہ ، بردبار ، پاکدامن ، مانگنے سے بچنے والے شخص سے محبت کرتا ہے ، اور وہ بدتمیزی کرنے والے بدزبان شخص اور لپٹ کر مانگنے والے شخص کو ناپسند کرتا ہے ، بے شک حیاء ایمان کا حصہ ہے ، اور ایمان جنت میں ہو گا ، اور فحش کلامی ( یا بدزبانی ) برائی کا حصہ ہے ، اور برائی ، جہنم میں ہو گی ۔ “
یہ روایت امام طبرانی نے نقل کی ہے ، اس کی سند میں ایک راوی سوار بن مصعب ہے اور وہ متروک ہے ۔

سیدنا ابوجحیفہ یہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا ، اور اس نے اپنے پڑوسی کی شکایت کی تو نبی اکرم صلی اللہ علیہ وسلم نے ارشاد فرمایا : تم اپنا سامان راستے میں رکھ دو ! اس شخص نے سامان رکھ دیا ، لوگ وہاں سے گزرتے اور اس ( کے پڑوسی ) پر لعنت کرتے ( اس شخص کا پڑوسی ) شخص نبی اکرم صلی اللہ علیہ وسلم کے پاس آیا ، اس نے عرض کی : یا رسول اللہ ! مجھے لوگوں کی طرف سے کس صورتحال کا سامنا کرنا پڑ رہا ہے ؟ نبی اکرم صلی اللہ علیہ وسلم نے دریافت کیا : تمہیں اُن کی طرف سے کس صورتحال کا سامنا ہے ؟ اس نے بتایا : وہ مجھ پر لعنت کرتے ہیں ، نبی اکرم صلی اللہ علیہ وسلم نے فرمایا : ” لوگوں سے پہلے اللہ تعالیٰ نے تم پر لعنت کی ہے ۔ “ اس ( پڑوسی ) نے عرض کی : میں دوبارہ ایسا نہیں کروں گا ، پھر وہ شخص نبی اکرم صلی اللہ علیہ وسلم کے پاس آیا ، جس نے اس کی شکایت کی تھی ، تو نبی اکرم صلی اللہ علیہ وسلم نے فرمایا : تم اپنا سامان اٹھا لو ! کیونکہ تمہاری کفایت ہو گئی ہے ۔
یہ روایت امام طبرانی نے نقل کی ہے ، امام بزار نے اس کی مانند نقل کی ہے ، تاہم اس میں یہ الفاظ ہیں : تم اپنا سامان راستے پر رکھ دو ! ( راوی کو شک ہے ، یا شاید یہ الفاظ ہیں : ) راستے کی پشت پر رکھ دو ! اس شخص نے اس ( سامان ) کو رکھ دیا ، تو ہر گزرنے والا شخص دریافت کرتا تھا : تمہارا کیا معاملہ ہے ؟ وہ شخص جواب دیتا : میرے پڑوسی نے مجھے اذیت پہنچائی ہے ، تو گزرنے والا شخص اس پڑوسی کے خلاف دعا کرتا ، اُس شخص کا پڑوسی آیا اور بولا: تم اپنا سامان واپس لے جاؤ ! میں تمہیں کبھی اذیت نہیں پہنچاؤں گا ۔ اس روایت کی سند میں ایک راوی ابوعمر منبہی ہے ، شریک اس سے روایت نقل کرنے میں منفرد ہے ، اس روایت کے بقیہ رجال ثقہ ہیں ۔

سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” پڑوسی کو تھوڑی سی تکلیف بھی نہیں پہنچائی جائے گی ۔ “
یہ روایت امام طبرانی نے نقل کی ہے ، اور اس کے رجال ثقہ ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اپنے پڑوسی کے گھر میں جھانک کر دیکھے ، اور اپنے مسلمان بھائی کی پوشیدہ چیز کی طرف نظر کرے ، یا اُس کی بیوی کے بال ، یا اس عورت کے جسم کا کوئی حصہ دیکھے ، تو اللہ تعالیٰ کے ذمہ یہ بات لازم ہے کہ وہ اُس شخص کو جہنم میں داخل کر دے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی یحیی بن عنبسہ ہے اور وہ حدیث ایجاد کرنے والا شخص ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم ایک غزوہ میں شرکت کے لئے تشریف لے جانے لگے ، تو آپ صلی اللہ علیہ وسلم نے ارشاد فرمایا : آج ہمارے ساتھ کوئی ایسا شخص نہ رہے ، جس نے اپنے پڑوسی کو اذیت پہنچائی ہو ، حاضرین میں سے ایک شخص بولا: میں نے اپنے پڑوسی کی دیوار کی بنیاد کے پاس پیشاب کیا تھا ، نبی اکرم صلی اللہ علیہ وسلم نے فرمایا : تم آج ہمارے ساتھ نہ رہو ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی یحیی بن عبدالحمید حمانی ہے اور وہ ضعیف ہے ۔