مجمع الزوائد ومنبع الفوائد

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” ہر درخت کا پھل ہوتا ہے اور دل کا پھل ، اولاد ہے ، بے شک اللہ تعالیٰ اس شخص پر رحم نہیں کرتا ، جو اپنی اولاد پر رحم نہیں کرتا ، اس ذات کی قسم ! جس کے دست قدرت میں میری جان ہے ، جنت میں صرف رحم کرنے والا شخص داخل ہو گا ، ہم نے عرض کی : یا رسول اللہ ! ہم میں سے ہر ایک شخص رحم کرتا ہے ، نبی اکرم صلی اللہ علیہ وسلم نے ارشاد فرمایا : اس رحمت یہ مراد نہیں ہے کہ تم میں سے کوئی ایک شخص اپنے ساتھی پر رحم کرے ، بلکہ رحمت سے مراد یہ ہے کہ وہ لوگوں پر رحم کرے ۔ “
یہ روایت امام بزار نے نقل کی ہے ، اس کی سند میں ایک راوی ابومہدی سعید بن سنان ہے اور وہ ضعیف اور متروک ہے ، صدقہ بن خالد بیان کرتے ہیں : ابومہدی سعید بن سنان ، جو اہل حمص کے مؤذن ہیں ، انہوں نے مجھے یہ حدیث بیان کی اور وہ ثقہ اور پسندیدہ فرد ہیں ، راوی کہتے ہیں : اس حکایت کی سند مستند نہیں ہے ۔

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اولاد ، دل کا پھل ہوتی ہے اور یہ آدمی کو کمزور کنجوس اور غمگین ( پریشان ) کر دیتی ہے ۔ “
یہ روایت امام ابویعلیٰ اور امام بزار نے نقل کی ہے اس کی سند میں ایک راوی عطیہ عوفی ہے اور وہ ضعیف ہے ۔

سیدنا اشعث بن قیس رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں ” کندہ “ کے وفد کے ہمراہ حاضر ہوا ، آپ صلی اللہ علیہ وسلم نے مجھ سے فرمایا : کیا تمہاری اولاد ہے ؟ میں نے عرض کی : جب میں آپ کی طرف نکل کر آنے والا تھا ، تو اس وقت میرے ہاں بیٹا پیدا ہوا ہے ، جو جمد کی صاحبزادی سے ہوا ہے ، میری یہ خواہش تھی کہ اس کی جگہ مجھے یہ چیز مل جاتی ہے کہ میں لوگوں کو سیر ہو کے کھانا کھلا سکتا ، نبی اکرم صلی اللہ علیہ وسلم نے فرمایا : تم یہ بات نہ کہو ، اولاد میں آنکھوں کی ٹھنڈک ہوتی ہے اور اگر اولاد کا انتقال ہو جائے تو اجر بھی ہوتا ہے ، تم یہ بات کہتے ہو ، اولاد تو آدمی کو بزدل اور غمگین کر دیتی ہے ، اولاد تو بزدل اور غمگین کر دیتی ہے ۔ “
یہ روایت امام أحمد اور امام طبرانی نے نقل کی ہے ، اس کی سند میں ایک راوی مجالد بن سعید ہے اور وہ ضعیف ہے ، ویسے اس کی توثیق کی گی ہے ، امام أحمد کے بقیہ رجال صحیح کے رجال ہیں ۔

سیدنا اسود بن خلف رضی اللہ عنہ نبی اکرم صلی اللہ علیہ وسلم کے بارے میں یہ بات نقل کرتے ہیں : سیدنا امام حسن رضی اللہ عنہ ( جو بچے تھے ) آپ صلی اللہ علیہ وسلم نے انہیں پکڑ کر انہیں بوسہ دیا ، پھر آپ صلی اللہ علیہ وسلم لوگوں کی طرف متوجہ ہوئے اور آپ صلی اللہ علیہ وسلم نے ارشاد فرمایا : ” بے شک اولاد کنجوس ، سخت اور بزدل کر دیتی ہے ۔ “
یہ روایت امام بزار نے نقل کی ہے اور اس کے رجال ثقہ ہیں ۔

سیدنا عبداللہ بن عمرو رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو منبر پر دیکھا آپ لوگوں کو خطبہ دے رہے تھے ، اسی دوران سیدنا امام حسین بن علی رضی اللہ عنہما ( جو اس وقت بچے تھے ) وہ آئے ، ان کی گردن میں ایک کپڑا تھا جسے وہ کھینچ رہے تھے اور اس کی وجہ سے انہیں ٹھوکر لگی اور وہ گر گئے ، تو نبی اکرم صلی اللہ علیہ وسلم منبر سے نیچے اُتر کر ان کی طرف جانے لگے ، جب لوگوں نے یہ صورت حال ملاحظہ کی تو انہوں نے بچے کو پکڑ لیا اور اسے لے کر نبی اکرم صلی اللہ علیہ وسلم کے پاس آ گئے ، نبی اکرم صلی اللہ علیہ وسلم نے انہیں لیا اور گود میں بٹھا کر ارشاد فرمایا : ” اللہ تعالیٰ شیطان کو برباد کرے ! اولاد آزمائش ہے ، اللہ کی قسم ! اللہ کی قسم ! میں یہی بات جانتا ہوں ، میں منبر سے نیچے اترا ، یہاں تک اسے لے آیا ۔ “
یہ روایت امام طبرانی نے اپنے استاد کے حوالے سے نقل کی ہے ، اور اس کا اسم منسوب بیان نہیں کیا اور اس کے حوالے سے اسے عبداللہ بن علی جارودی سے نقل کیا ہے ، میں ان دونوں سے واقف نہیں ہوں ، اس روایت کے بقیہ رجال ثقہ ہیں ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جس بھی گھرانے میں لڑکا پیدا ہوتا ہے ، تو ان کے درمیان ایسا غلبہ آ جاتا ہے ، جو پہلے نہیں تھا ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ہاشم بن صالح ہے ، جس کا ذکر ابن ابوحاتم نے کیا ہے ، انہوں نے اس پر جرح بھی نہیں کی اور اس کی توثیق بھی نہیں کی ، اس روایت کے بقیہ رجال کی توثیق کی گی ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب بچی پیدا ہوتی ہے ، تو اللہ تعالیٰ اس کی طرف ایک فرشتے کو بھیجتا ہے جو برکت ڈالتا ہے اور یہ کہتا ہے : ایک کمزور وجود ، جو ایک کمزور وجود میں سے نکلا ہے ، اس کی دیکھ بھال کرنے والے شخص کی قیامت تک مدد کی جائے گی ، جب بچہ پیدا ہوتا ہے ، تو اللہ تعالیٰ آسمان کی طرف سے ، اس کے پاس ایک فرشتہ بھیجتا ہے ، وہ اس کی دونوں آنکھوں کے درمیان بوسہ دیتا ہے اور یہ کہتا ہے : اللہ تعالیٰ نے تمہیں سلام کہا: ہے ۔ “
یہ روایت امام طبرانی نے معجم اوسط میں اپنے استاد بکر کے حوالے سے نقل کی ہے ، انہوں نے اس کا اسم منسوب نہیں کیا ، اس کے حوالے سے یہ عبداللہ بن سلیمان مصری کے حوالے سے منقول ہے اور میں ان دونوں سے واقف نہیں ہوں ، اس روایت کے بقیہ رجال ثقہ ہیں ۔

سیدنا نبیط ، یعنی سیدنا نبیط بن شریط رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب کسی شخص کے ہاں بیٹی پیدا ہوتی ہے ، تو اللہ تعالیٰ فرشتوں کو بھیجتا ہے ، جو یہ کہتے ہیں : تم پر سلام ہو ! اے اس گھر والو ! پھر وہ لوگ اُس بچی کو اپنے پروں کے ذریعے ڈھانپ لیتے ہیں ، اور اپنے ہاتھ اس کے سر پر پھیرتے ہیں ، اور یہ کہتے ہیں : ایک کمزور وجود جو ایک کمزور وجود سے نکلا ہے ، اس کی دیکھ بھال کرنے والے کی قیامت کے دن تک مدد ہو گی ۔ “
یہ روایت امام طبرانی نے معجم صغیر میں نقل کی ہے ، اس کی سند میں راویوں کی ایک جماعت ایسی ہے ، جن سے میں واقف نہیں ہوں ۔

سیدنا عقبہ بن عامر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم بیٹیوں کو ناپسند نہ کرو ! کیونکہ وہ محبت رکھنے والی اور ( بہت ) قیمتی ہوتی ہیں ۔ “
یہ روایت امام أحمد اور امام طبرانی نے نقل کی ہے ، اس کی سند میں ایک راوی ابن لہیعہ ہے اور اس کی نقل کردہ حدیث حسن ہے اس روایت کے بقیہ رجال ثقہ ہیں ۔

سیدنا سائب بن یزید رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا امام حسن رضی اللہ عنہ کا بوسہ لیا ، اقرع بن حابس نے آپ صلی اللہ علیہ وسلم کی خدمت میں عرض کی : میرے دس بچے ہیں ، میں نے اُن میں سے کسی کو کبھی بوسہ نہیں دیا ، تو نبی اکرم صلی اللہ علیہ وسلم نے ارشاد فرمایا : ” اللہ تعالیٰ اس شخص پر رحم نہیں کرتا ، جو لوگوں پر رحم نہیں کرتا ۔ “
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب والد اپنی اولاد کی طرف دیکھتا ہے اور خوش ہوتا ہے ، تو والد کو ایک جان ( یعنی غلام یا کنیز ) آزاد کرنے کا ثواب ملتا ہے ، عرض کی گی : یا رسول اللہ ! اگر وہ تین سو ساٹھ مرتبہ دیکھے ؟ تو نبی اکرم صلی اللہ علیہ وسلم نے فرمایا : اللہ تعالیٰ سب سے بڑا ہے ۔ “
یہ روایت امام طبرانی نے معجم کبیر اور معجم اوسط میں نقل کی ہے ، انہوں نے اس میں یہ بات کہی ہے : کہ یہ روایت نبی اکرم صلی اللہ علیہ وسلم سے صرف اسی سند کے ساتھ منقول ہے اور اس کی سند حسن ہے ، اس کی سند میں ایک راوی ابراہیم بن اعین ہے ، جسے ابن حبان نے ثقہ قرار دیا ہے اور دیگر حضرات نے اسے ضعیف کہا: ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اولاد کی خوشبو ، جنت کی خوشبو کا حصہ ہے ۔ “
یہ روایت امام طبرانی نے معجم صغیر اور معجم اوسط میں اپنے استاد محمد بن عثمان بن سعید کے حوالے سے نقل کی ہے اور وہ راوی ضعیف ہے ۔

سیدنا انس رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کے پاس موجود تھا ، اس کا بیٹا اس کے پاس آیا ، اس شخص نے اس کو بوسہ دیا اور اسے اپنے زانوں پر بٹھا لیا ، پھر اس کی بیٹی اس کے پاس آئی ، تو اُس شخص نے اسے اپنے آگے بٹھا لیا ، نبی اکرم صلی اللہ علیہ وسلم نے فرمایا : ” تم نے ان دونوں کے درمیان برابری کیوں نہیں رکھی ؟ “ ۔
یہ روایت امام بزار نے نقل کی ہے ، وہ کہتے ہیں : ہمارے بعض اصحاب نے ہمیں یہ حدیث بیان کی ہے ، انہوں نے اس راوی کا نام بیان نہیں کیا ، اس روایت کے بقیہ رجال ثقہ ہیں ۔