مجمع الزوائد ومنبع الفوائد

سیدنا عبداللہ بن عمرو رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا ، اس نے عرض کی : یا رسول اللہ ! میرے کچھ رشتے دار ہیں ، جن کے ساتھ میں اچھا سلوک کرتا ہوں اور وہ میرے ساتھ برا سلوک کرتے ہیں ، میں درگزر کرتا ہوں اور وہ میرے ساتھ زیادتی کرتے ہیں ، میں اچھائی کرتا ہوں اور وہ برائی کرتے ہیں ، تو کیا میں انہیں ان کا بدلہ دوں ؟ نبی اکرم صلی اللہ علیہ وسلم نے ارشاد فرمایا : ” جی نہیں ! ایسی صورت میں تم سب لوگوں کو چھوڑا جائے گا ، البتہ تم اضافی چیز وصول کر لو اور ان کے ساتھ صلہ رحمی کرو ، تمہارے ساتھ مسلسل ایک فرشتہ رہے گا ، جو اللہ تعالیٰ کی طرف سے مددگار ہو گا ، جب تک تم ایسا کرتے رہو گے ۔ “
یہ روایت امام أحمد نے نقل کی ہے اس کی سند میں ایک راوی حجاج بن ارطاۃ ہے اور وہ مدلس ہے ، اس روایت کے بقیہ رجال ثقہ ہیں ۔

سیدنا ابوذر غفاری رضی اللہ عنہ بیان کرتے ہیں : میرے خلیل صلی اللہ علیہ وسلم نے مجھے یہ تلقین کی تھی کہ اللہ تعالیٰ کے بارے میں کسی ملامت کرنے والے کی ملامت مجھے اپنی گرفت میں نہ لے اور آپ نے مجھے صلہ رحمی کرنے کی تلقین کی تھی ، اگرچہ ( دوسرا رشتہ دار ) پیٹھ پھیر رہا ہو ۔ ۔ ۔ ۔ ۔ ۔ ۔ ۔ ۔ اس کے بعد راوی نے پوری حدیث ذکر کی ہے ۔
یہ روایت امام طبرانی نے معجم صغیر اور معجم کبیر میں ایک طویل حدیث کے ضمن میں نقل کی ہے ، یہ امام بزار نے بھی نقل کی ہے ، امام طبرانی کے رجال صحیح کے رجال ہیں ، صرف سلام بن منذر کا معاملہ مختلف ہے اور وہ ثقہ ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تین چیزیں جس شخص میں ہوں گی ، اللہ تعالیٰ اس سے آسان حساب لے گا اور اپنی رحمت کے ذریعے اسے جنت میں داخل کر دے گا ، لوگوں نے عرض کی : یا رسول اللہ ! وہ کیا ہیں ؟ میرے ماں باپ آپ پر قربان ہوں ، نبی اکرم صلی اللہ علیہ وسلم نے ارشاد فرمایا : ” جو شخص تمہیں محروم رکھے تم اُسے دو ! جو شخص قطع رحمی کرے ، تم اُس کے ساتھ صلہ رحم کرو ، اور جو شخص تمہارے ساتھ ۔ زیادتی کرے ، تو اس سے درگزر کرو ، جب تم ایسا کرو گے ، تو اللہ تعالیٰ تمہیں اپنی رحمت کے فضل سے جنت میں داخل کر دے گا ۔ “
یہ روایت امام بزار نے امام طبرانی نے معجم اوسط میں نقل کی ہے ، اس کی سند میں ایک راوی سلیمان بن داؤد یمامی ہے اور وہ متروک ہے ۔