مجمع الزوائد ومنبع الفوائد

سیدنا ثوبان رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت کے دن تین چیزیں عرش کے ساتھ لپٹی ہوئی ہوں گی ، رشتے داری ، جو یہ کہے گی : اے اللہ ! بے شک میں تیری وجہ سے ہوں تو مجھے کاٹا نہ جائے ، امانت ، جو یہ کہے گی : اے اللہ ! میں تیری مدد سے ہوں ، تو میرے حوالے سے خیانت نہ کی جائے ، اور نعمت ، جو یہ کہے گی : اے اللہ ! میں تیری مدد سے ہوں ، تو میرا انکار ( یا ناشکری ) نہ کی جائے ۔ “
یہ روایت امام بزار نے نقل کی ہے ، اس کی سند میں ایک راوی یزید بن ربیعہ رحبی ہے اور وہ متروک ہے ، ابن عدی کہتے ہیں : مجھے امید ہے کہ اس میں کوئی حرج نہیں ہو گا ۔

سیدنا ابوہریرہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” رحم ( یعنی رشتے داری ) رحمان ( کے فضل ) کا ایک حصہ ہے ، وہ ( یعنی رحم ) یہ کہتا ہے : اے میرے پروردگار ! مجھے کاٹ دیا گیا ہے ، اے میرے پروردگار ! میرے ساتھ برا سلوک کیا گیا ، اے میرے پروردگار ! میرے ساتھ ظلم کیا گیا ، اے میرے پروردگار ! اے میرے پروردگار ! ( یعنی یہ ہوا اور وہ ہوا ) تو پروردگار اسے جواب دیتا ہے : ” کیا تم اس بات سے راضی نہیں ہو ؟ کہ جو تمہیں ملا کے رکھے گا ، میں اُسے ملا دوں گا اور جو تمہیں کاٹے گا ، میں اُسے کاٹ دوں گا ۔ “ ( علامہ ہیثمی فرماتے ہیں : ) میں یہ کہتا ہوں : ان صحابی کے حوالے سے ” صحیح “ میں ایک حدیث مذکور ہے ، جو اس حدیث کے علاوہ ہے ۔
یہ روایت امام أحمد نے نقل کی ہے اور اس کے رجال صحیح کے رجال ہیں ، صرف محمد بن عبدالجبار نامی راوی کا معاملہ مختلف ہے اور وہ ثقہ ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کے حوالے سے یہ بات نقل کرتے ہیں ( آپ صلی اللہ علیہ وسلم نے ارشاد فرمایا ہے : ) ” بے شک رحم ( یعنی رشتے داری ) رحمان سے لپٹا ہوا ہے ، رحمان اُسے ملاتا ہے جو اس کو ملاتا ہے اور رحمان اُسے کاٹ دیتا ہے جو اس ( رشتے داری ) کو کاٹ دیتا ہے ۔ “
یہ روایت امام أحمد اور امام بزار نے نقل کی ہے اور امام طبرانی نے اس کی مانند نقل کی ہے ، اس کی سند میں ایک راوی صالح مولیٰ توأمہ ہے ، جو اختلاط کا شکار ہو گیا تھا ، اس روایت کے بقیہ رجال صحیح کے رجال ہیں ۔

سیدنا عبداللہ بن عمرو بن العاص رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” قیامت کے دن رحم ( یعنی رشتے داری ) کو یوں رکھا جائے گا کہ اس کا سوت کاتنے کے آلے کی طرح کا خمدار وجود ہو گا ، اور وہ تیز اور فصیح زبان میں بات چیت کرے گا اور وہ اس کو ملائے گا ، جس نے اسے ملا کے رکھا ہو گا اور اسے کاٹ دے گا ، جس نے اُسے کاٹ کے رکھا ہو گا ۔ “
یہ روایت امام أحمد اور امام طبرانی نے نقل کی ہے ، امام أحمد کے رجال صحیح کے رجال ہیں ، صرف ابوثمامہ ثقفی کا معاملہ مختلف ہے ، ابن حبان نے اسے ثقہ قرار دیا ہے ۔

سیدنا عبداللہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک رحم ( یعنی رشتے داری ) عرش کے ساتھ معلق ہو گا ۔ “
یہ روایت امام أحمد اور امام طبرانی نے نقل کی ہے اور اس کے رجال ثقہ ہیں ۔

سیدنا سعید بن زید رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” سب سے بڑا سود ( یعنی سب سے بڑا گناہ ) یہ ہے کہ کسی مسلمان کی عزت پر ناحق حملہ کیا جائے ، اور بے شک رحم ( یعنی رشتے داری ) رحمان ( کے فضل ) کا حصہ ہے ، جو شخص اس کو کاٹتا ہے ، اللہ تعالیٰ اس پر جنت کو حرام قرار دے دیتا ہے ۔ “
یہ روایت امام أحمد اور امام بزار نے نقل کی ہے ، امام أحمد کے رجال صحیح کے رجال ہیں ، صرف نوفل بن مساحق کا معاملہ مختلف ہے اور وہ ثقہ ہے ۔

سیدنا عامر بن ربیعہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ فرماتا ہے : رحم میرے ( فضل کا ) ایک حصہ ہے ، جو شخص اسے ملائے گا میں اسے ملاؤں گا اور جو شخص اسے کاٹے گا میں اُسے کاٹ دوں گا ۔ “
یہ روایت امام طبرانی نے نقل کی ہے اور امام ابویعلیٰ نے اس کی مانند نقل کی ہے اور امام بزار نے نقل کی ہے ، تاہم انہوں نے یہ الفاظ نقل نہیں کیے ہیں : اللہ تعالیٰ نے یہ فرمایا ہے ۔ ۔ ۔ ۔ ۔ ۔ ۔ “ ۔ اس کی سند میں ایک راوی عاصم بن عبیداللہ ہے ، جسے جمہور نے ضعیف قرار دیا ہے ، عجلی کہتے ہیں : اس میں کوئی حرج نہیں ہے ۔

سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” رحم ایک شعبہ ہے ، جو رحمان کو تھامے ہوئے ہو گا ، اور اپنے حق کے بارے میں اس کی بارگاہ میں مناجات کرے گا تو پروردگار فرمائے گا : کیا تم اس بات سے راضی نہیں ہو ؟ کہ جو تمہیں ملائے گا ، میں اُسے ملاؤں گا اور جو تمہیں کاٹے گا ، میں اُسے کاٹ دوں گا ، اور جو تمہیں ملائے گا ، وہ مجھ سے مل جائے گا اور جو تمہیں کاٹے گا ، مجھ سے لاتعلق ہو جائے گا ۔ “
یہ روایت امام طبرانی نے نقل کی ہے اس کی سند میں ایک راوی موسیٰ بن عبیدہ ربذی ہے اور وہ ضعیف ہے ۔

سیدنا جریر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ نے لوح محفوظ میں ، یہ بات آسمان اور زمین کی تخلیق سے پہلے لکھ دی تھی کہ بے شک میں رحمان ہوں ، رحیم ہوں اور میں نے رحم کو پیدا کیا ہے اور میں نے اس کے لئے ایسا نام رکھا ہے جو میرے اسماء سے متعلق ہے ، تو جو شخص اُسے ملائے گا تو میں اسے ملاؤں گا اور جو شخص اسے کاٹ دے گا ، میں اُسے کاٹ دوں گا ۔ “
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی حکم بن عبداللہ ابومطیع ہے اور وہ متروک ہے ۔

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بے شک رحم ایک شعبہ ہے ، جس نے عرش کو تھاما ہوا ہے ، وہ فصیح زبان میں بات چیت کرے گا اور یہ کہے گا : اے اللہ ! تو اس کو ملا ، جس نے مجھے ملایا اور تو اس کو کاٹ دے ، جس نے مجھے کاٹا ، تو اللہ تعالیٰ فرمائے گا : میں رحمان و رحیم ہوں اور میں نے رحم ( یعنی رشتے داری ) کے لئے اپنے اسم سے متعلق نام تجویز کیا ہے ، تو جو شخص اس کو ملائے گا تو میں اسے ملاؤں گا اور جو شخص اس کے ٹکڑے کرے گا ، میں اسے کاٹ دوں گا ۔ “
یہ روایت امام بزار نے نقل کی ہے اور اس کی سند حسن ہے ۔

سیدنا عبدالرحمن بن عوف رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت کے دن رحم پکار کر یہ کہے گا : جس نے مجھے ملایا تھا ، اللہ تعالیٰ اسے ملائے گا اور جس نے مجھے کاٹا تھا ، اللہ تعالیٰ اسے کاٹ دے گا ۔ “ ( علامہ ہیثمی فرماتے ہیں : ) میں یہ کہتا ہوں ان صحابی کے لئے ایک حدیث منقول ہے جسے امام ابوداؤد اور دیگر حضرات نے نقل کیا ہے اور وہ اس روایت کے علاوہ ہے ۔
یہ روایت امام بزار نے نقل کی ہے ، اس کی سند میں راویوں کی ایک جماعت ایسی ہے جن سے میں واقف نہیں ہوں ۔

سیدنا ابوہریرہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” ہر جمعرات کو ، شب جمعہ میں ، انسانوں کے اعمال ( اللہ تعالیٰ کی بارگاہ میں ) پیش کیے جاتے ہیں ، تو رشتے داری کے حقوق کو پامال کرنے والے شخص کا عمل قبول نہیں کیا جاتا ۔ “
یہ روایت امام أحمد نے نقل کی ہے اور اس کے رجال ثقہ ہیں ۔

اعمش بیان کرتے ہیں : سیدنا عبداللہ بن مسعود رضی اللہ عنہ صبح کی نماز کے بعد حلقے میں بیٹھ جاتے تھے اور یہ فرماتے تھے : ” رشتے داری کے حقوق کو پامال کرنے والے شخص کو میں اللہ کا واسطہ دے کر یہ کہتا ہوں کہ وہ ہمارے پاس سے اُٹھ جائے کیونکہ اب ہم اپنے پروردگار سے دعا کرنے کا ارادہ رکھتے ہیں اور آسمان کے دروازے رشتے داری کے حقوق کو پامال کرنے والے شخص کے لئے بند رہتے ہیں ۔ “
یہ روایت امام طبرانی نے نقل کی ہے اور اس کے رجال صحیح کے رجال ہیں ، البتہ اعمش نامی راوی نے سیدنا عبداللہ بن مسعود رضی اللہ عنہ کا زمانہ نہیں پایا ہے ۔

سیدنا عبداللہ بن ابواوفیٰ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بے شک فرشتے ایسی قوم پر نازل نہیں ہوتے ہیں ، جن کے درمیان رشتے داری کے حقوق کو پامال کرنے والا کوئی شخص موجود ہو ۔ “
یہ روایت امام طبرانی نے نقل کی ہے ، اس کی سند میں ایک راوی ابوادام محاربی ہے اور وہ کذاب ہے ۔

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم نے خطبہ دیتے ہوئے صلہ رحمی کے بارے میں ترغیب دی ۔
یہ روایت امام طبرانی نے معجم اوسط میں نقل کی ہے اور اس کی سند حسن ہے ، یہ مکمل روایت بیٹیوں کے لئے کھڑے ہونے کے باب میں آئے گی ، اگر اللہ نے چاہا ۔

خثعم قبیلے سے تعلق رکھنے والے ایک صاحب بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا ، آپ اپنے اصحاب کے درمیان موجود تھے ، میں نے عرض کی : آپ ہی وہ ہیں ؟ جو یہ کہتے ہیں : کہ آپ اللہ کے رسول ہیں ؟ نبی اکرم صلی اللہ علیہ وسلم نے جواب دیا : جی ہاں ! راوی کہتے ہیں : میں نے عرض کی : یا رسول اللہ ! اللہ تعالیٰ کے نزدیک کون سا عمل سب سے زیادہ پسندیدہ ہے ؟ نبی اکرم صلی اللہ علیہ وسلم نے فرمایا : اللہ تعالیٰ پر ایمان رکھنا ، راوی کہتے ہیں : میں نے عرض کی : پھر کون سا ہے ؟ آپ صلی اللہ علیہ وسلم نے فرمایا : پھر صلہ رحمی کرنا ، راوی کہتے ہیں : میں نے عرض کی : یا رسول اللہ ! پھر کون سا ہے ؟ آپ نے فرمایا : پھر نیکی کا حکم دینا اور برائی سے منع کرنا ، میں نے عرض کی : یا رسول اللہ ! اللہ تعالیٰ کے نزدیک کون سا عمل سب سے زیادہ ناپسندیدہ ہے ؟ آپ نے فرمایا : کسی کو اللہ کا شریک قرار دینا ، میں نے عرض کی : یا رسول اللہ ! پھر کون سا ہے ؟ آپ نے فرمایا : رشتے داری کے حقوق کو پامال کرنا ، میں نے عرض کی : یا رسول اللہ ! پھر کون سا ہے ؟ آپ صلی اللہ علیہ وسلم نے فرمایا : برائی کے بارے میں حکم دینا اور نیکی سے منع کرنا ۔
یہ روایت امام ابویعلیٰ نے نقل کی ہے اور اس کے رجال صحیح کے رجال ہیں ، صرف نافع بن خالد طاحی کا معاملہ مختلف ہے اور وہ ثقہ ہے ۔

سیدنا انس بن مالک رضی اللہ عنہ نبی اکرم صلی اللہ علیہ وسلم کے بارے میں یہ بات نقل کرتے ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” بے شک صدقہ کرنا اور صلہ رحمی کرنا ، ان دونوں کے ذریعے اللہ تعالیٰ عمر میں اضافہ کرتا ہے اور ان دونوں کے ذریعے بری موت کو دور کر دیتا ہے ، اور ان دونوں کے ذریعے اللہ تعالیٰ ناپسندیدہ چیز اور تکلیف دہ چیز کو پرے کر دیتا ہے ۔ “
یہ روایت امام ابویعلیٰ نے نقل کی ہے اس کی سند میں ایک راوی صالح مری ہے اور وہ ضعیف ہے ۔

سیدنا ابوبکرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” کوئی بھی گناہ رشتے داری کے حقوق کو پامال کرنے ، خیانت کرنے اور جھوٹ بولنے کے مقابلے میں ، اس بات کا زیادہ لائق نہیں ہے کہ اللہ تعالیٰ اس کے مرتکب شخص کو ( دنیا میں ) جلدی سزا دیدے اور اس کے ہمراہ آخرت میں اس کے لئے عذاب تیار رکھے ، اور جس نیکی کا سب سے زیادہ جلدی اجر و ثواب ملتا ہے ، وہ صلہ رحمی ہے ، یہاں تک کہ کسی گھرانے کے لوگ غریب ہوتے ہیں اور پھر اُن کے اموال زیادہ ہو جاتے ہیں اور ان کی تعداد زیادہ ہو جاتی ہے ، جبکہ وہ رشتے داری کے حقوق کا خیال رکھتے ہیں ۔ “ ( علامہ ہیثمی فرماتے ہیں : ) میں یہ کہتا ہوں : یہ روایت امام ابوداؤد نے بہت زیادہ اختصار کے ساتھ نقل کی ہے ۔
یہ روایت امام طبرانی نے اپنے استاد عبداللہ بن موسیٰ ابوعثمان انطاکی کے حوالے سے نقل کی ہے اور میں اس سے واقف نہیں ہوں اس روایت کے بقیہ رجال ثقہ ہیں ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ کچھ لوگوں کے علاقے کو آباد کرتا ہے اور انہیں اموال عطا کرتا ہے ، اور اس نے جب سے انہیں پیدا کیا ہے کبھی ان کی طرف غصے نہیں دیکھا ہو گا ، عرض کی گئی : یا رسول اللہ ! اس کی وجہ کیا ہے ؟ آپ صلی اللہ علیہ وسلم نے فرمایا : کیونکہ وہ ایک دوسرے کے ساتھ رشتے کے حقوق کا خیال رکھتے ہیں ۔ “
یہ روایت امام طبرانی نے نقل کی ہے اور اس کی سند حسن ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب بھی کسی گھرانے کے لوگ ایک دوسرے کے ساتھ صلہ رحمی کرتے ہیں ، تو اللہ تعالیٰ ان کا رزق ان کے لئے جاری کرتا ہے اور وہ لوگ اللہ کی پناہ میں ہوتے ہیں ۔ “
یہ روایت امام طبرانی نے نقل کی ہے ، اس کی سند میں ایک راوی عبیداللہ بن ولید وصافی ہے اور وہ ضعیف ہے ۔

عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” رشتے داری کے حقوق کا خیال رکھو ! خواہ سلام کے ذریعے ہی ہو ۔ “
یہ روایت امام بزار نے نقل کی ہے اس کی سند میں ایک راوی براء بن عبداللہ بن یزید غنوی ہے اور وہ ضعیف ہے ۔

سیدنا ابوطفیل رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” سلام کے ذریعے صلہ رحمی کرو ۔ “
یہ روایت امام طبرانی نے نقل کی ہے ، اس کی سند میں ایسا راوی ہے ، جس کا نام بیان نہیں کیا گیا ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم لوگ اپنے انساب کا علم حاصل کرو ، تاکہ اس کے ذریعے تم صلہ رحمی کر سکو ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابواسباط ہے اور وہ ضعیف ہے ۔

سیدنا علاء بن خارجہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تم اپنے انساب کا اتنا علم حاصل کرو کہ اس کے ذریعے تم صلہ رحمی کر سکو ، کیونکہ صلہ رحمی اہل خانہ کے لئے محبت کا ، مال میں اضافے کا اور زندگی لمبی ہونے کا باعث ہے ۔ “
یہ روایت امام طبرانی نے نقل کی ہے اور اس کے رجال کی توثیق کی گی ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک سب سے زیادہ جلدی ( ثواب دلانے والی ) اطاعت ، صلہ رحمی ہے ، اور کسی گھرانے کے لوگ گنہگار ہوتے ہیں ، لیکن جب وہ صلہ رحمی کرتے ہیں تو ان کے اموال زیادہ ہو جاتے ہیں ، اور ان کی تعداد زیادہ ہو جاتی ہے ۔ “
یہ روایت امام طبرانی نے معجم اوسط میں نقل کی ہے اس کی سند میں ایک راوی ابودھماء نصری ہے اور وہ انتہائی ضعیف ہے ۔

سیدنا عمرو بن سہیل رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” رشتے داروں کے ساتھ اچھا سلوک کرنا ، مال میں اضافے کا ، اہل خانہ میں محبت کا ، اور زندگی طویل ہونے کا باعث ہے ۔ “
یہ روایت امام طبرانی نے معجم اوسط میں نقل کی ہے اور اس کی سند میں ایسے راوی ہیں ، جن سے میں واقف نہیں ہوں ۔

سیدنا علی بن ابوطالب رضی اللہ عنہ ، نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص یہ پسند کرتا ہو کہ اُس کی عمر زیادہ ہو اس کے رزق میں کشادگی ہو اور اس سے بری موت کو پرے کر دیا جائے ، اسے اللہ تعالیٰ سے ڈرتے رہنا چاہیے اور رشتے داری کے حقوق کا خیال رکھنا چاہیے ۔ “
یہ روایت عبدالله بن أحمد ، امام بزار اور امام طبرانی نے معجم اوسط میں نقل کی ہے ، امام بزار کے رجال صحیح کے رجال ہیں ، صرف عاصم بن ضمرہ کا معاملہ مختلف ہے اور وہ ثقہ ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ان سے فرمایا : ” جو شخص کو نرمی میں سے حصہ دے دیا گیا ، تو اسے دنیا و آخرت کی بھلائی میں سے اس کا حصہ دے دیا گیا ، رشتے داری کے حقوق کا خیال رکھنا ، اچھا پڑوسی ہونا اور اچھے اخلاق ہونا ، بستیوں کو آباد کرتے ہیں اور عمر میں اضافہ کرتے ہیں ۔ “
یہ روایت امام أحمد نے نقل کی ہے اور اس کے رجال ثقہ ہیں ، صرف یہ ہے کہ عبدالرحمن بن قاسم نے سیدہ عائشہ رضی اللہ عنہا سے سماع نہیں کیا ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” تورات میں یہ تحریر ہے کہ جو شخص یہ پسند کرتا ہو کہ اس کی عمر میں اضافہ ہو ، اس کے رزق میں اضافہ ہو ، اسے صلہ رحمی کرنی چاہیے ۔ “
یہ روایت امام بزار نے نقل کی ہے ، اس کی سند میں ایک راوی سعید بن بشیر ہے ، جسے شعبہ اور ایک جماعت نے ثقہ قرار دیا ہے یحیی بن معین اور دیگر حضرات نے اسے ضعیف کہا: ہے ، اس روایت کے بقیہ رجال ثقہ ہیں ۔

سیدنا ابودرداء رضی اللہ عنہ بیان کرتے ہیں : لوگوں نے نبی اکرم صلی اللہ علیہ وسلم کے سامنے رشتے داری کا ذکر کیا ، ہم نے عرض کی : جو شخص صلہ رحمی کرتا ہے ، کیا اس کی عمر زیادہ ہو جاتی ہے ؟ نبی اکرم صلی اللہ علیہ وسلم نے ارشاد فرمایا : ” عمر میں اضافہ نہیں ہوتا ، کیونکہ اللہ تعالیٰ نے ارشاد فرمایا ہے : ” جب اُن کا آخری وقت آ جاتا ہے ، تو نہ وہ ایک گھڑی مؤخر ہوتا ہے اور نہ پہلے ہوتا ہے “ لیکن یہ ہے کہ اس سے مراد یہ ہو گا کہ ایسی نیک اولاد ہوتی ہے جو اس کے بعد بھی اس کے لئے دعا کرتی رہتی ہے اور اس کا ثواب اسے ملتا رہتا ہے ، تو یہ اس طرح ہے جیسے اُس کی عمر میں اضافہ ہو گیا ۔ “
یہ روایت امام طبرانی نے معجم صغیر اور معجم اوسط میں نقل کی ہے ، اس کی سند میں کوئی متروک راوی نہیں ہے ، لیکن ان لوگوں کو ضعیف قرار دیا گیا ہے ۔

سیدنا عبداللہ بن عباس رضی اللہ عنہما بیان کرتے ہیں : قریش کو شدید قحط سالی لاحق ہو گئی ، یہاں تک کہ وہ ہڈی کے ساتھ لگے ہوئے ( چھچھڑے ) بھی کھانے لگے ، اس وقت قریش میں کوئی بھی نبی اکرم صلی اللہ علیہ وسلم اور سیدنا عباس بن عبدالمطلب رضی اللہ عنہ سے زیادہ خوشحال نہیں تھا ، تو نبی اکرم صلی اللہ علیہ وسلم نے سیدنا عباس رضی اللہ عنہ سے کہا: ” اے چچا جان ! آپ جانتے ہیں کہ آپ کے بھائی جناب ابوطالب کے بال بچے زیادہ ہیں اور قریش کو جو صورت حال لاحق ہوئی ہے وہ آپ ملاحظہ فرما رہے ہیں ، آپ ہمارے ساتھ ان کے پاس چلیں ، تاکہ ہم ان کے اہل خانہ میں سے کچھ کا ذمہ اپنے ذمے لے لیں ، تو یہ دونوں جناب ابوطالب کے پاس گئے ، اُن دونوں نے کہا: اے ابوطالب ! آپ کی قوم کو اس صورت حال کا سامنا ہے جو آپ ملاحظہ فرما رہے ہیں اور ہم یہ جانتے ہیں کہ آپ بھی ان میں سے ایک ہیں ، ہم اس لئے آئے ہیں کہ تاکہ آپ کے اہل خانہ میں سے بعض کا ذمہ خود لے لیں ، تو جناب ابوطالب نے کہا: تم عقیل کو میرے لئے رہنے دو اور باقی جو تم دونوں پسند کرو ، تو کر لو ، تو نبی اکرم صلی اللہ علیہ وسلم نے سیدنا علی رضی اللہ عنہ کو لے لیا اور سیدنا عباس رضی اللہ عنہ سے سیدنا جعفر رضی اللہ عنہ کو لے لیا ، یہ دونوں مسلسل اسی طرح رہے ، یہاں تک کہ یہ دونوں بے نیاز ہو گئے ۔ “ سلیمان بن داؤد بیان کرتے ہیں : سیدنا جعفر رضی اللہ عنہ حبشہ کی سرزمین کی طرف ہجرت کر کے تشریف لے جانے تک مسلسل سیدنا عباس رضی اللہ عنہ کے ساتھ رہے تھے ۔
یہ روایت امام بزار نے نقل کی ہے ، اس کی سند میں ایسے راوی ہیں ، جن سے میں واقف نہیں ہوں ۔

سیدنا جابر رضی اللہ عنہ بیان کرتے ہیں : سیدہ جویریہ رضی اللہ عنہا نے نبی اکرم صلی اللہ علیہ وسلم کی خدمت میں عرض کی : میں یہ چاہتی ہوں کہ میں یہ غلام آزاد کر دوں ، تو نبی اکرم صلی اللہ علیہ وسلم نے ارشاد فرمایا : ” تم یہ اپنے اُس ماموں کو دیدو جو دیہات میں رہتا ہے ، یہ اُس کے کام کاج کر دے گا ، یہ تمہارے لئے زیادہ اجر کا باعث ہو گا ۔ “
یہ روایت امام بزار نے نقل کی ہے اور اس کے رجال صحیح کے رجال ہیں ۔