مجمع الزوائد ومنبع الفوائد

سیدنا علی بن ابوطالب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” راستے کے درمیانی حصے میں خواتین کا حصہ نہیں ہے انہیں اس کے کناروں پر چلنا چاہیے اور ان کی چلتے ہوئے آواز محسوس نہیں ہونی چاہیے ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عبدالعزیز بن یحیی مدنی ہے اور وہ کذاب ہے امام حاکم رحمہ اللہ نے اسے ثقہ قرار دیا ہے ۔

سیدنا عمر بن حماس رضی اللہ عنہ جنہیں صحابی ہونے کا شرف حاصل ہے ۔ وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” خواتین کو راستے کے درمیانی حصے میں چلنے کا حق نہیں ہے ۔ “
یہ روایت امام طبرانی نے معجم اوسط میں اپنے استاد اسحاق بن حاجب کے حوالے سے نقل کی ہے اور میں اس سے واقف نہیں ہوں ۔

سیدنا عبداللہ بن مسعود رضی اللہ عنہ فرماتے ہیں : ایک ایسا اونٹ جو تارکول سے لتھڑا ہوا ہو ، وہ میرے سامنے آئے ، یہ میرے نزدیک اس سے زیادہ پسندیدہ ہو گا کہ کوئی ایسی عورت میرے سامنے آئے ، جس نے عطر لگایا ہوا ہو ۔
یہ روایت امام طبرانی نے نقل کی ہے ۔ اس کی سند میں ایک راوی ابوزعراء ہے ، جسے عجلی اور ابن حبان نے ثقہ قرار دیا ہے ، اور اس کے بارے میں کلام کیا گیا ہے ۔ اس روایت کے بقیہ رجال صحیح کے رجال ہیں ۔