مجمع الزوائد ومنبع الفوائد

سیدنا جابر بن عبداللہ رضی اللہ عنہما بیان کرتے ہیں : ہم لوگ نبی اکرم صلی اللہ علیہ وسلم کے ساتھ تھے اسی دوران ایک بدبودار ہوا آئی ، تو نبی اکرم صلی اللہ علیہ وسلم نے دریافت کیا : کیا تم لوگ جانتے ہو یہ کس چیز کی ہوا ہے ؟ یہ ان لوگوں کی بُو ہے جو اہل ایمان کی غیبت کرتے ہیں ۔ “
یہ روایت امام أحمد نے نقل کی ہے اور اس کے رجال ثقہ ہیں ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم نے ہمیں غیبت کرنے اور غیبت سننے سے منع کیا ہے ۔

اسی سند کے ساتھ یہ بات منقول ہے ۔ وہ بیان کرتے ہیں : نبی اکرم صلی اللہ علیہ وسلم نے چغلی کرنے اور چغلی سننے سے منع کیا ہے ۔ یہ دونوں روایات امام طبرانی نے معجم کبیر اور معجم اوسط میں نقل کی ہیں ، اس کی سند میں ایک راوی فرات بن سائب ہے ، اور وہ متروک ہے ۔

ان کے حوالے سے یہ بات منقول ہے ۔ وہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” چغلی کرنا برا کہنا اور حمیت ، جہنم میں ہوں گی اور یہ کسی مومن کے سینے میں اکٹھی نہیں ہو سکتی ہیں ۔ “
یہ روایت امام طبرانی نے محمد بن یزید بن سنان کی اپنے والد سے نقل کردہ روایت کے طور پر نقل کی ہے اور یہ دونوں ضعیف ہیں ویسے ان دونوں کی توثیق کی گئی ہے ۔

سیدنا علی رضی اللہ عنہ کے بارے میں یہ بات منقول ہے ۔ وہ فرماتے ہیں : بری بات کہنے والا اور اسے سننے والا گناہ میں برابر ہوتے ہیں ۔
یہ روایت امام ابویعلیٰ نے نقل کی ہے ، اور اس کے رجال صحیح کے رجال ہیں ، صرف حسان بن کریب کا معاملہ مختلف ہے ، اور وہ ثقہ ہے ۔

سیدنا عبدالله بن بسر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” حسد کرنے والے ، چغلی کرنے والے ، کہانت کرنے والے کا مجھ سے کوئی تعلق نہیں ہے ، اور میرا ان سے کوئی تعلق نہیں ہے ، پھر نبی اکرم صلی اللہ علیہ وسلم نے یہ آیت تلاوت کی : ” وہ لوگ جو مومن مردوں اور مومن عورتوں کو ان کے کسی عمل ( یعنی جرم ) کے بغیر اذیت پہنچاتے ہیں تو ایسے لوگ بہتان اور واضح گناہ کا بوجھ اٹھاتے ہیں ۔ “
یہ روایت امام طبرانی نے نقل کی ہے ۔ اس کی سند میں ایک راوی سلیمان بن سلمہ خبائری ہے اور وہ متروک ہے ۔

سیدنا ابوبرزہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” خبردار ! جھوٹ چہرے کو سیاہ کر دیتا ہے اور چغلی قبر کے عذاب کا باعث ہے ۔ “
یہ روایت امام ابویعلیٰ اور امام طبرانی نے نقل کی ہے ۔ اس کی سند میں ایک راوی زیاد بن منذر ہے اور وہ کذاب ہے ۔

سیدنا جابر بن عبداللہ رضی اللہ عنہ اور سیدنا ابوسعید خدری رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” غیبت زنا سے زیادہ سخت ہے ۔ عرض کی گئی : وہ کیسے ؟ آپ نے فرمایا : ایک شخص زنا کرتا ہے پھر وہ توبہ کرتا ہے ، تو اللہ تعالیٰ اس کی توبہ قبول کر لیتا ہے ، لیکن غیبت کرنے والے شخص کی اس وقت تک توبہ قبول نہیں ہوتی ، جب تک متعلقہ فرد اس کو معاف نہیں کرتا ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عباد بن کثیر ثقفی ہے اور وہ متروک ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص دنیا میں اپنے بھائی کا گوشت کھاتا ہے ، قیامت کے دن اسے اس کے قریب کیا جائے گا ، اور اس سے کہا: جائے گا : تم اس کے زندہ ہونے کے عالم میں اس کو کھاؤ ، جس طرح تم نے اسے مردہ ہونے کے طور پر کھایا تھا ، تو وہ اس کو کھائے گا اور ماتھے پر بل ڈالے گا اور چیخے گا ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ابن اسحاق ہے ، اور وہ مدلس ہے ، اور ایک ایسا راوی ہے جس سے میں واقف نہیں ہوں ۔

ان کے حوالے سے یہ بات منقول ہے ۔ وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” ایک شخص کو لایا جائے گا ، جو دنیا میں لوگوں کی غیبت کیا کرتا تھا تو اس سے کہا: جائے گا : تم اپنے مردہ بھائی کا گوشت کھاؤ ، جس طرح تم نے اس کے زندہ ہونے کے عالم میں اس کا گوشت کھایا تھا ۔ ۔ ۔ ۔ ۔ ۔ ۔ “ ۔ اس کے بعد راوی نے حسب سابق حدیث ذکر کی ہے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ابن اسحاق ہے اور وہ مدلس ہے ۔ اس روایت کے بقیہ رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : جس رات نبی اکرم صلی اللہ علیہ وسلم کو معراج کروائی گئی ، نبی اکرم صلی اللہ علیہ وسلم نے جہنم میں دیکھا تو وہاں کچھ لوگ تھے جو مردار کھا رہے تھے ، آپ نے دریافت کیا : اے جبرائیل ! یہ کون لوگ ہیں ؟ انہوں نے بتایا : یہ وہ لوگ ہیں ، جو لوگوں کا گوشت کھایا کرتے تھے ، پھر آپ نے ایک شخص کو دیکھا جو نیلی آنکھوں ، بکھرے ہوئے گھنگھریالے بالوں والا تھا ، تو آپ صلی اللہ علیہ وسلم نے دریافت کیا : اے جبرائیل یہ کون ہے ؟ انہوں نے یہ بتایا : یہ ( سیدنا صالح علیہ السلام ) اونٹنی کے پاؤں کاٹنے والا شخص ہے ۔
یہ روایت امام أحمد نے نقل کی ہے ۔ اس کی سند میں ایک راوی قابوس ہے اور وہ ثقہ ہے اور اس میں ضعف پایا جاتا ہے ۔ اس روایت کے بقیہ رجال صحیح کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے اپنے اصحاب سے فرمایا : ” کیا تم یہ جانتے ہو کہ اللہ تعالیٰ کے نزدیک سب سے بڑا زنا کیا ہے ؟ لوگوں نے عرض کی : اللہ اور اس کا رسول زیادہ بہتر جانتے ہیں ، نبی اکرم صلی اللہ علیہ وسلم نے فرمایا : اللہ تعالیٰ کے نزدیک سب سے بڑا زنا یہ ہے کہ کسی مسلمان شخص کی عزت کو حلال قرار دیا جائے ، پھر آپ نے یہ آیت تلاوت کی : ” جو لوگ مومن مردوں اور مومن خواتین کو ان کے کسی عمل کے بغیر اذیت پہنچاتے ہیں ۔ ۔ ۔ ۔ ۔ ۔ ۔ “ ۔
یہ روایت امام ابویعلیٰ نے نقل کی ہے اور اس کے رجال صحیح کے رجال ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” سب سے بڑا زنا یہ ہے کہ آدمی اپنے بھائی کی عزت پر حملہ آور ہو ۔ “
یہ روایت امام بزار نے دو استاد کے ساتھ نقل کی ہے ، اور ان دونوں میں سے ایک کے رجال صحیح کے رجال ہیں ، صرف محمد بن ابونعیم کا معاملہ مختلف ہے ، اور اس میں ضعف پایا جاتا ہے ۔

سیدنا یوسف بن عبداللہ بن سلام رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” سب سے بڑا زنا یہ ہے کہ کوئی شخص اپنے مسلمان بھائی کی عزت پر حملہ آور ہو ۔ “
یہ روایت امام طبرانی نے معجم اوسط میں اپنے استاد محمد بن موسیٰ ایلی کے حوالے سے عمرو بن یحیی ابلی سے نقل کی ہے ، اور میں ان دونوں سے واقف نہیں ہوں ، اس روایت کے بقیہ رجال ثقہ ہیں ۔

سیدنا ابوبکرہ رضی اللہ عنہ بیان کرتے ہیں : ایک مرتبہ میں نبی اکرم صلی اللہ علیہ وسلم کے ساتھ چلتا ہوا جا رہا تھا آپ نے میرا ہاتھ پکڑا ہوا تھا ، آپ کی بائیں طرف ایک اور شخص تھا ، ہمارے سامنے دو قبریں آئیں ، تو نبی اکرم صلی اللہ علیہ وسلم نے ارشاد فرمایا : ” ان دونوں کو عذاب ہو رہا ہے اور ان دونوں کو ( بظاہر ) کسی بڑے گناہ کی وجہ سے عذاب نہیں ہو رہا ( یعنی ایسا بڑا گناہ جس سے بچنا مشکل ہو ) تم میں سے کون شخص میرے پاس ایک شاخ لے کر آئے گا ۔ راوی کہتے ہیں : ہم دونوں گئے اور میں اپنے ساتھی سے پہلے شاخ لے کے آ گیا ، نبی اکرم صلی اللہ علیہ وسلم نے اسے دو حصوں میں تقسیم کیا اور ایک قبر پر ایک ٹکڑا رکھ دیا اور دوسری قبر پر دوسرا ٹکڑا رکھ دیا اور ارشاد فرمایا : جب تک یہ دونوں تر رہیں گی ، ان دونوں کے عذاب میں تخفیف رہے گی ، اور ان دونوں کو غیبت کرنے اور پیشاب ( کے چھینٹوں سے ) نہ بچنے کی وجہ سے عذاب ہو رہا ہے ۔ “
( علامہ ہیثمی فرماتے ہیں : ) میں یہ کہتا ہوں امام ابن ماجہ نے اس روایت کا کچھ حصہ نقل کیا ہے ۔
یہ روایت امام أحمد نے نقل کی ہے ، اور اس کے رجال صحیح کے رجال ہیں ، صرف بحر بن مرار کا معاملہ مختلف ہے اور وہ ثقہ ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم کا گزر ایک شخص ( کی قبر ) کے پاس سے ہوا ، جسے اس کی قبر میں چغلی کرنے کی وجہ سے عذاب دیا جا رہا تھا ۔
یہ روایت امام طبرانی نے معجم اوسط میں نقل کی ہے اور اس کی سند میں ایک راوی خلید بن دعلج ہے اور وہ متروک ہے ۔

سیدنا یعلیٰ بن سیابہ رضی اللہ عنہ بیان کرتے ہیں : نبی اکرم صلی اللہ علیہ وسلم کے بارے میں انہیں یہ بات پتہ ہے کہ آپ قبر کے پاس تشریف لائے ، جس کے مردے کو عذاب ہو رہا تھا ، آپ نے ارشاد فرمایا : یہ شخص لوگوں کا گوشت کھایا کرتا تھا ، پھر آپ نے ایک تر شاخ منگوائی اور اسے اس کی قبر پر رکھ دیا اور ارشاد فرمایا : ہو سکتا ہے کہ جب تک یہ شاخ تر رہے ۔ اس وقت تک اس شخص کے ( عذاب میں ) تخفیف ہو ۔
یہ روایت امام طبرانی نے معجم اوسط میں نقل کی ہے ، اور امام أحمد نے ایک طویل حدیث کے ضمن میں نقل کی ہے ، جو آگے چل کر نبوت کی علامات سے متعلق باب میں آئے گی ، اس کی سند میں ایک راوی عاصم بن بہدلہ ہے ، اور وہ ثقہ ہے اور اس میں ضعف پایا جاتا ہے ۔ اس روایت کے بقیہ رجال ثقہ ہیں ۔

سیدہ اسماء بنت یزید رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” کیا میں تمہیں تمہارے سب سے بہتر لوگوں کے بارے میں نہ بتاؤں ؟ لوگوں نے عرض کی : جی ہاں یا رسول اللہ ! نبی اکرم صلی اللہ علیہ وسلم نے ارشاد فرمایا : یہ کہ جب وہ دکھائی دیں تو اللہ کی یاد آ جائے ، پھر آپ نے ارشاد فرمایا : کیا میں تمہیں تمہارے سب سے برے لوگوں کے بارے میں نہ بتاؤں ؟ وہ چغلی کرنے والے اور دوستوں کے درمیان فساد پیدا کرنے والے اور شریف لوگوں کے بارے میں سرکشی تلاش کرنے والے لوگ ہیں ۔ “
یہ روایت امام أحمد نے نقل کی ہے اس کی سند میں ایک راوی شہر بن حوشب ہے ، جسے ایک سے زیادہ افراد نے ثقہ قرار دیا ہے ۔ اس کی اسانید میں سے ایک کے بقیہ رجال صحیح کے رجال ہیں ۔

سیدنا عبدالرحمن بن غنم رضی اللہ عنہ بیان کرتے ہیں : ان تک نبی اکرم صلی اللہ علیہ وسلم کے حوالے سے یہ حدیث پہنچی ہے ( آپ صلی اللہ علیہ وسلم نے ارشاد فرمایا ہے : ) ” اللہ کے بندوں میں سب سے بہتر وہ لوگ ہیں جب انہیں دیکھا جائے تو اللہ یاد آ جائے اور اللہ کے بندوں میں سب سے برے وہ لوگ ہیں ، جو چغلی کرتے ہیں ، دوستوں کے درمیان علیحدگی پیدا کرتے ہیں ، اور شریف لوگوں کے بارے میں سرکشی تلاش کرتے ہیں ۔ “
یہ روایت امام أحمد نے نقل کی ہے ۔ اس کی سند میں ایک راوی شہر بن حوشب ہے ۔ اس روایت کے بقیہ رجال صحیح کے رجال ہیں ۔

سیدنا عبادہ بن صامت رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” میری امت کے بہترین لوگ وہ ہیں ، جو نظر آئیں تو اللہ تعالیٰ یاد آ جائے اور میری امت کے برے لوگ وہ ہیں ، جو چغلی کرتے ہیں ، دوستوں کے درمیان علیحدگی پیدا کرتے ہیں اور شریف لوگوں کے بارے میں سرکشی تلاش کرتے ہیں ۔ “
یہ روایت امام طبرانی نے نقل کی ہے ۔ اس کی سند میں ایک راوی یزید بن ربیعہ ہے ، اور وہ متروک ہے ۔

سیدنا براء رضی اللہ عنہ بیان کرتے ہیں : نبی اکرم صلی اللہ علیہ وسلم نے ہمیں خطبہ دیا ( آپ کی آواز اتنی بلند تھی ) کہ وہ گھروں میں موجود پردہ دار خواتین تک آ رہی تھی ( یہاں ایک لفظ کے بارے میں راوی کو شک ہے کہ لفظ گھروں استعمال ہوا ہے یا لفظ پردے استعمال ہوا ہے ) آپ نے فرمایا : اے وہ گروہ جو اپنی زبان کے ذریعے ایمان لے آیا ہے ، لیکن ایمان اس کے دل میں داخل نہیں ہوا ہے ، تم لوگ مسلمانوں کی غیبت نہ کرو ، ان کے پوشیدہ معاملات کی جستجو نہ کرو کیونکہ جو شخص اپنے بھائی کے پوشیدہ معاملے کی جستجو کرے گا ، اللہ تعالیٰ اس کے پوشیدہ معاملے کی طرف متوجہ ہو گا ، اور جس شخص کے پوشیدہ معاملے کی طرف اللہ تعالیٰ متوجہ ہو گا ، اس کو اس کے گھر میں بیٹھے رہنے کے دوران رسوائی کا شکار کر دے گا ۔ “
یہ روایت امام ابویعلیٰ نے نقل کی ہے اور اس کے رجال ثقہ ہیں ۔

سیدنا بریدہ رضی اللہ عنہ بیان کرتے ہیں : ہم نے نبی اکرم صلی اللہ علیہ وسلم کے پیچھے ظہر کی نماز ادا کی ، جب آپ نماز پڑھ کے فارغ ہوئے ، تو آپ غصے کے عالم میں ہماری طرف متوجہ ہوئے اور بلند آواز میں آپ نے ارشاد فرمایا : جو آواز گھروں میں موجود خواتین تک بھی جا رہی تھی ، آپ نے فرمایا : ” اے وہ گروہ جس نے اسلام قبول کر لیا ہے لیکن ایمان اس کے دل میں داخل نہیں ہوا ہے ، تم لوگ مسلمانوں کی مذمت نہ کرو ، ان کے پوشیدہ معاملات کی جستجو نہ کرو کیونکہ جو شخص اپنے مسلمان بھائی کے پوشیدہ معاملے کی جستجو کرے گا ، اللہ تعالیٰ اس کے پردے کو پھاڑ دے گا اور اس کے پوشیدہ معاملے کو ظاہر کر دے گا ، خواہ وہ اپنے گھر کے پردے میں موجود ہو ۔ “
یہ روایت امام طبرانی نے معجم کبیر میں نقل کی ہے اور معجم اوسط میں اس کی مانند نقل کی ہے ، اور انہوں نے یہ الفاظ ” تم مسلمانوں کی مذمت نہ کرو “ اس کی جگہ یہ الفاظ نقل کئے ہیں : ” تم مسلمانوں کو اذیت نہ پہنچاؤ ۔ “ اس کی سند میں ایک راوی رمیح بن ہلال طائی ہے ۔ ابوحاتم کہتے ہیں : یہ مجہول ہے ۔ ابوتمیلہ یحیی بن واضح کے علاوہ اور کسی نے اس سے روایت نقل نہیں کی ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے خطبہ ارشاد فرمایا جس کی آواز گھروں میں موجود پردہ دار خواتین تک جا رہی تھی ، آپ نے فرمایا : ” اے وہ گروہ جو اپنی زبان کے ذریعے ایمان لے آئے ہیں لیکن ایمان ان کے دل میں داخل نہیں ہوا ، تم لوگ اہل ایمان کو اذیت نہ پہنچاؤ اور ان کے پوشیدہ معاملات کی جستجو نہ کرو کیونکہ جو شخص اپنے مسلمان بھائی کے پوشیدہ معاملے کی جستجو کرے گا ، اللہ تعالیٰ اس کے پردے کو پھاڑ دے گا ، اور جس شخص کے پوشیدہ معاملے کی طرف اللہ تعالیٰ متوجہ ہو گا اسے رسوائی کا شکار کر دے گا ، خواہ وہ ( شخص ) اپنے گھر کے اندر موجود ہو ۔ “
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا ابوہریرہ رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے پاس موجود تھے ، ایک شخص نے عرض کی : یا رسول اللہ ! فلاں شخص کتنا عاجز ہے ( راوی کو شک ہے شاید یہ الفاظ ہیں : ) فلاں شخص کتنا کمزور ہے ، تو نبی اکرم صلی اللہ علیہ وسلم نے ارشاد فرمایا : تم نے اپنے ساتھی کی غیبت کی ہے اور تم نے اس کا گوشت کھایا ہے ۔
یہ روایت امام ابویعلیٰ اور امام طبرانی نے معجم اوسط میں نقل کی ہے اور ان کے الفاظ یہ ہیں : ” ایک شخص نبی اکرم صلی اللہ علیہ وسلم کے پاس سے اٹھ کے گیا ، لوگوں نے اس کے اٹھنے میں عاجز ہونا دیکھا تو یہ کہا: فلاں شخص کتنا عاجز ہے ۔ نبی اکرم صلی اللہ علیہ وسلم نے ارشاد فرمایا : تم لوگوں نے اپنے بھائی کو کھایا ہے اور تم لوگوں نے اس کی غیبت کی ہے ۔ “ ان دونوں روایات کی سند میں ایک راوی محمد بن ابوحمید ہے ، اور ایک قول کے مطابق حماد ہے ، اور وہ انتہائی ضعیف ہے ۔

سیدنا عبداللہ بن مسعود رضی اللہ عنہ بیان کرتے ہیں ہم لوگ نبی اکرم صلی اللہ علیہ وسلم کے پاس موجود تھے ، ایک شخص اٹھ کر گیا ، تو اس کے بعد ایک اور شخص نے اس کے بارے میں کچھ کہا: ، تو نبی اکرم صلی اللہ علیہ وسلم نے فرمایا : تم خلال کرو ، اس نے عرض کی : یا رسول اللہ ! میں کس وجہ سے خلال کروں ، میں نے کوئی گوشت کھایا ہے ؟ نبی اکرم صلی اللہ علیہ وسلم نے فرمایا : تم نے اپنے بھائی کا گوشت کھایا ہے ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

سیدنا معاذ بن جبل رضی اللہ عنہ بیان کرتے ہیں : میں نبی اکرم صلی اللہ علیہ وسلم کے پاس موجود تھا ، لوگوں نے آپ کے سامنے ایک شخص کا ذکر کیا اور یہ کہا: کہ فلاں شخص کتنا عاجز ہے ، تو نبی اکرم صلی اللہ علیہ وسلم نے فرمایا : تم لوگوں نے اپنے بھائی کی غیبت کی ہے ، لوگوں نے عرض کی : یا رسول اللہ ! ہم نے اس کے بارے میں اگر کوئی ایسی بات کی ہو ، جو اس میں نہ ہو ، تو نبی اکرم صلی اللہ علیہ وسلم نے ارشاد فرمایا : اگر تم ایسی بات کرو جو اس میں نہ ہو ، تو تم نے اس پر بہتان لگایا ہو گا ۔
یہ روایت امام طبرانی نے نقل کی ہے ۔ اس کی سند میں ایک راوی علی بن عاصم ہے اور وہ ضعیف ہے ۔