مجمع الزوائد ومنبع الفوائد

سیدنا عیاض بن حماد رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ایک دوسرے کو برا کہنے والے دو افراد میں گناہ اس شخص پر ہوتا ہے ، جس نے آغاز کیا ہو ، جب تک مظلوم نے زیادتی نہ کی ہو اور ایک دوسرے کو برا کہنے والے دو افراد دو شیطان ہوتے ہیں ، وہ دونوں ایک دوسرے کے مقابلے میں جھوٹ بولتے ہیں اور ایک دوسرے کے مقابلے میں باطل بات کا دعویٰ کرتے ہیں ۔ “

ایک روایت میں یہ الفاظ ہیں : سیدنا عیاض رضی اللہ عنہ بیان کرتے ہیں : میں نے عرض کی : یا رسول اللہ ! میری قوم کے ایک فرد نے مجھے برا کہا: ، وہ مجھ سے کمتر حیثیت رکھتا ہے ، کیا مجھ پر کوئی حرج ہو گا کہ اگر میں اس سے بدلہ لوں ؟ ۔ ۔ ۔ ۔ ۔ ۔ ۔ بعد راوی نے حسب سابق حدیث ذکر کی ہے ۔
یہ روایت امام أحمد ، امام بزار اور امام طبرانی نے معجم کبیر اور معجم اوسط میں نقل کی ہے امام أحمد کے رجال صحیح کے رجال ہیں ۔

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ایک دوسرے کو برا کہنے والے دو افراد جو کچھ بھی کہتے ہیں تو اس کا وبال ان میں سے آغاز کرنے والے پر ہی ہوتا ہے ، جب تک مظلوم زیادتی نہیں کرتا ۔ “
یہ روایت امام ابویعلیٰ نے اپنے استاد ابوعلی سے نقل کی ہے ، اور میں اس سے واقف نہیں ہوں ۔ اس روایت کے بقیہ رجال کی توثیق کی گئی ہے ۔