مجمع الزوائد ومنبع الفوائد

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ کا غضب اس شخص پر شدید ہوتا ہے ، جو یہ گمان کرتا ہے کہ وہ بادشاہوں کا بادشاہ ہے ( یعنی جس کا نام شہنشاہ ہو ) ۔ “
یہ روایت امام طبرانی نے نقل کی ہے ۔ اس کی سند میں ایک راوی ابوشیبہ ابراہیم بن عثمان ہے ، اور وہ متروک ہے ۔

سیدنا عبداللہ بن مسعود رضی اللہ عنہ فرماتے ہیں : نبی اکرم صلی اللہ علیہ وسلم نے اس بات سے منع کیا ہے کہ کوئی شخص اپنے غلام یا اپنے بیٹے کا نام حارث یا مرہ یا ولید یا حکم یا ابوالحکم یا افلح یا نجیح یا یسار رکھے ، آپ صلی اللہ علیہ وسلم نے ارشاد فرمایا ہے : ” اللہ تعالیٰ کے نزدیک سب سے پسندیدہ نام وہ ہے ، جس کے ذریعے اس کی عبدیت کا اظہار ہوتا ہو ، اور سب سے زیادہ سچا نام ہمام ہے ۔ “
یہ روایت امام طبرانی نے معجم اوسط اور معجم کبیر میں نقل کی ہے ۔ اس کی سند میں ایک راوی محمد بن محصن عکاشی ہے ، اور وہ متروک ہے ۔

سیدنا بریده رضی اللہ عنہ فرماتے ہیں : نبی اکرم صلی اللہ علیہ وسلم نے اس بات سے منع کیا ہے کہ کلب یا کلیب نام رکھا جائے ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی صالح بن حبان ہے اور وہ ضعیف ہے ۔

مسلم بن عبدالله ازدی بیان کرتے ہیں : سیدنا عبداللہ بن قرط ازدی رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے ، نبی اکرم صلی اللہ علیہ وسلم نے ان سے دریافت کیا : تمہارا نام کیا ہے ؟ انہوں نے جواب دیا : شیطان بن قرط ۔ تو نبی اکرم صلی اللہ علیہ وسلم نے فرمایا : تم عبداللہ بن قرط ہو ۔
یہ روایت امام أحمد نے نقل کی ہے ، اور اس کے رجال ثقہ ہیں ۔

سیدنا عبداللہ بن قرط رضی اللہ عنہ کے بارے میں یہ بات منقول ہے کہ وہ نبی اکرم صلی اللہ علیہ وسلم کی خدمت میں حاضر ہوئے ، نبی اکرم صلی اللہ علیہ وسلم نے ان سے دریافت کیا : تمہارا نام کیا ہے ؟ انہوں نے جواب دیا : شیطان بن قرط ۔ نبی اکرم صلی اللہ علیہ وسلم نے ارشاد فرمایا : تم عبداللہ بن قرط ہو ۔
یہ روایت امام طبرانی نے نقل کی ہے ، اور اس کے رجال ثقہ ہیں ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ایک شخص کو دوسرے شخص سے یہ کہتے ہوئے سنا ، تمہارا نام کیا ہے ، تو دوسرے نے جواب دیا : شہاب ۔ تو نبی اکرم صلی اللہ علیہ وسلم نے فرمایا : تم ہشام ہو ۔
یہ روایت امام أحمد نے نقل کی ہے ، اور امام طبرانی نے معجم اوسط میں اس کی مانند نقل کی ہے ، اور اس کی سند میں ایک راوی عمران قطان ہے ، جسے ابن حبان اور دیگر حضرات نے ثقہ قرار دیا ہے ، اور اس میں ضعف پایا جاتا ہے ۔ اس روایت کے بقیہ رجال صحیح کے رجال ہیں ۔

جہینہ قبیلے سے تعلق رکھنے والے ایک صاحب بیان کرتے ہیں : نبی اکرم صلی اللہ علیہ وسلم نے انہیں یہ کہتے ہوئے سنا : اے حرام ! تو آپ نے فرمایا : اے حلال ۔
یہ روایت امام أحمد نے نقل کی ہے ، اور اس کے رجال صحیح کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم کا گزر ایک جگہ سے ہوا جس کا نام غدرہ تھا تو آپ نے اس کا نام خضرہ ( یعنی سرسبز و شاداب ) رکھا ۔
یہ روایت امام ابویعلیٰ نے اور امام طبرانی نے معجم اوسط میں نقل کی ہے ، امام ابویعلیٰ کے رجال صحیح کے رجال ہیں ۔

سیدہ عائشہ صدیقہ رضی اللہ عنہا کے حوالے سے یہ بات منقول ہے ۔ وہ بیان کرتی ہیں : نبی اکرم صلی اللہ علیہ وسلم جب کوئی برا نام سنتے تھے ، تو آپ اسے تبدیل کر دیتے تھے ایک مرتبہ آپ کا گزر ایک بستی سے ہوا جس کا نام عقرہ ( یعنی بانجھ یا بنجر ) تھا ، تو آپ نے اس کا نام خضرہ ( یعنی سرسبز و شاداب ) رکھ دیا ۔
یہ روایت امام طبرانی نے معجم صغیر میں نقل کی ہے ، اور اس کے رجال صحیح کے رجال ہیں ۔

سیدنا بشیر بن خصاصیہ رضی اللہ عنہ بیان کرتے ہیں : وہ نبی اکرم صلی اللہ علیہ وسلم کی خدمت میں حاضر ہوئے وہ بیان کرتے ہیں : ان کا نام زحم تھا ، تو نبی اکرم صلی اللہ علیہ وسلم نے ان کا نام بشیر رکھا ۔
یہ روایت امام أحمد نے نقل کی ہے ، اور اس کے رجال صحیح کے رجال ہیں ۔

سیدنا بشیر بن خصاصیہ رضی اللہ عنہ کی اہلیہ سیدہ جہدمہ رضی اللہ عنہا بیان کرتی ہیں : سیدنا بشیر رضی اللہ عنہ کا نام پہلے زحم تھا ، تو نبی اکرم صلی اللہ علیہ وسلم نے ان کا نام بشیر رکھ دیا ۔
یہ روایت امام طبرانی نے نقل کی ہے ۔ اس کی سند میں ایک راوی ابوجناب ہے اور وہ مدلس ہے ۔ اس روایت کے بقیہ رجال صحیح کے رجال ہیں ۔

سیدنا ہشام بن عامر رضی اللہ عنہ بیان کرتے ہیں وہ نبی اکرم صلی اللہ علیہ وسلم کی خدمت میں حاضر ہوئے نبی اکرم صلی اللہ علیہ وسلم نے ان سے دریافت کیا : تمہارا نام کیا ہے ؟ انہوں نے جواب دیا : شہاب ۔ تو نبی اکرم صلی اللہ علیہ وسلم نے فرمایا : بلکہ تم ہشام ہو ۔
یہ روایت امام طبرانی نے نقل کی ہے ۔ اس کی سند میں ایک راوی علی بن زید ہے ، اور وہ حسن الحدیث ہے ، اور اس میں ضعف پایا جاتا ہے ۔ اس روایت کے بقیہ رجال صحیح کے رجال ہیں ۔

سیدنا عتبہ بن عبدسلمی رضی اللہ عنہ بیان کرتے ہیں : نبی اکرم صلی اللہ علیہ وسلم کے پاس جب کوئی شخص آتا اور اس کا نام ایسا ہوتا جو آپ کو پسند نہ ہوتا تو آپ اسے تبدیل کر دیتے تھے ، ہم نبی اکرم صلی اللہ علیہ وسلم کی خدمت میں حاضر ہوئے ، ہم سات آدمی تھے جن کا تعلق بنو سلیم سے تھا ، ہم میں سب سے بڑے سیدنا عرباض بن ساریہ رضی اللہ عنہ تھے ، تو ہم سب نے ایک ساتھ آپ کی بیعت کی ۔
یہ روایت امام طبرانی نے نقل کی ہے اور اس کے رجال ثقہ ہیں ، اس کے بعض راویوں کے بارے میں اختلاف پایا جاتا ہے ۔

سیدنا علی رضی اللہ عنہ بیان کرتے ہیں : جب حسن پیدا ہوا تو انہوں نے اس کا نام حمزہ رکھا ، جب حسین پیدا ہوا تو انہوں نے ان کا نام اپنے چچا کے نام پر جعفر رکھا ، سیدنا علی رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھے بلایا اور ارشاد فرمایا : مجھے یہ حکم دیا گیا ہے کہ میں اپنے ان دونوں بیٹوں کے نام تبدیل کر دوں ( سیدنا علی رضی اللہ عنہ کہتے ہیں ) میں نے عرض کی : اللہ اور اس کا رسول زیادہ بہتر جانتے ہیں تو نبی اکرم صلی اللہ علیہ وسلم نے ان دونوں کے نام حسن اور حسین رکھے ۔
یہ روایت امام أحمد نے نقل کی ہے اور امام ابویعلیٰ نے اس کی مانند نقل کی ہے ، اور امام بزار نے اور امام طبرانی نے نقل کی ہے ۔ اس کی سند میں ایک راوی عبداللہ بن محمد بن عقیل ہے ، جس کی نقل کردہ حدیث حسن ہے ۔ اس روایت کے بقیہ رجال صحیح کے رجال ہیں ۔

سیدنا علی رضی اللہ عنہ بیان کرتے ہیں : جب حسن پیدا ہوا تھا تو نبی اکرم صلی اللہ علیہ وسلم تشریف لائے آپ نے ارشاد فرمایا : تم میرا بیٹا مجھے دکھاؤ ، تم لوگوں نے اس کا کیا نام رکھا ہے ؟ میں نے جواب دیا : حرب ، نبی اکرم صلی اللہ علیہ وسلم نے ارشاد فرمایا : جی نہیں بلکہ یہ حسن ہے ، سیدنا علی رضی اللہ عنہ بیان کرتے ہیں : جب حسین پیدا ہوا تو میں نے اس کا نام حرب رکھ دیا ، نبی اکرم صلی اللہ علیہ وسلم تشریف لائے ، آپ نے فرمایا : تم میرا بیٹا مجھے دکھاؤ ، تم لوگوں نے اس کا کیا نام رکھا ہے ؟ میں نے جواب دیا : حرب تو نبی اکرم صلی اللہ علیہ وسلم نے فرمایا : جی نہیں بلکہ یہ حسین ہے ، جب تیسرا بیٹا پیدا ہوا تو میں نے اس کا نام حرب رکھا ، نبی اکرم صلی اللہ علیہ وسلم تشریف لائے ، آپ نے فرمایا : میرا بیٹا مجھے دکھاؤ ، تم لوگوں نے اس کا کیا نام رکھا ہے ؟ میں نے عرض کی : حرب ، تو نبی اکرم صلی اللہ علیہ وسلم نے فرمایا : بلکہ یہ محسن ہے ، پھر آپ نے ارشاد فرمایا : میں ان کے نام سیدنا ہارون علیہ السلام کے بیٹوں کے نام پر بشر ، بشیر اور مبشر رکھتا ہوں ۔
یہ روایت امام أحمد اور امام بزار نے نقل کی ہے ، تاہم انہوں نے یہ الفاظ نقل کئے ہیں : ” میں ان کے نام سیدنا ہارون علیہ السلام کے بیٹوں کے نام پر جبر ، جبیر اور مجبر رکھتا ہوں ۔ “
یہ روایت امام طبرانی نے بھی نقل کی ہے امام أحمد اور امام بزار کے رجال صحیح کے رجال ہیں صرف ہانی بن ہانی کا معاملہ مختلف ہے ، اور وہ ثقہ ہے ۔

سیدنا علی رضی اللہ عنہ بیان کرتے ہیں : جب حسن پیدا ہوا تو میں نے اس کا نام حرب رکھا کیونکہ مجھے یہ بات پسند تھی کہ میری کنیت ابوحرب ہو ، نبی اکرم صلی اللہ علیہ وسلم تشریف لائے ، آپ نے اسے گھٹی دی پھر آپ نے دریافت کیا : تم نے میرے بیٹے کا کیا نام رکھا ہے ؟ ہم نے عرض کی : حرب ۔ نبی اکرم صلی اللہ علیہ وسلم نے فرمایا : یہ حسن ہے ۔ پھر حسین پیدا ہوا تو میں نے اس کا نام حرب رکھ دیا ۔ نبی اکرم صلی اللہ علیہ وسلم تشریف لائے آپ نے اسے گھٹی دی آپ نے دریافت کیا : تم نے میرے بیٹے کا کیا نام رکھا ہے ؟ ہم نے عرض کی : حرب ۔ نبی اکرم صلی اللہ علیہ وسلم نے فرمایا : یہ حسین ہے ۔
یہ روایت امام بزار نے نقل کی ہے اور امام طبرانی نے اس کی مانند مختلف اسانید کے ساتھ نقل کی ہے جن میں سے ایک کے رجال صحیح کے رجال ہیں ۔

سیدنا سلمان فارسی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں نے ان دونوں کے ( راوی بیان کرتے ہیں : یعنی سیدنا امام حسن رضی اللہ عنہ اور سیدنا امام حسین رضی اللہ عنہ کے ) نام سیدنا ہارون علیہ السلام کے دونوں بیٹوں کے نام پر شبر اور شبیر رکھے ہیں ۔ “
یہ روایت امام طبرانی نے نقل کی ہے ۔ اس کی سند میں ایک راوی بردعہ بن عبدالرحمن ہے ، اور وہ ضعیف ہے ۔ آگے چل کر ایک خاتون کی نقل کردہ حدیث آئے گی جس کا نام سودہ ہے ۔ وہ سیدنا امام حسن رضی اللہ عنہ کے مناقب سے متعلق باب میں آئے گی ، اگر اللہ نے چاہا ۔

سیدہ رائطہ بنت مسلم رضی اللہ عنہا اپنے والد کا یہ بیان نقل کرتی ہیں ، میں نبی اکرم صلی اللہ علیہ وسلم کے ساتھ غزوہ حنین میں شریک ہوا ، آپ نے دریافت کیا : تمہارا کیا نام ہے ؟ میں نے جواب دیا : غراب ۔ نبی اکرم صلی اللہ علیہ وسلم نے فرمایا : تم مسلم ہو ۔
یہ روایت امام طبرانی نے نقل کی ہے امام ابویعلیٰ نے نقل کی ہے ، اور امام بزار نے اس کی مانند نقل کی ہے ۔ سیدہ رائطہ رضی اللہ عنہا نامی خاتون کو کسی نے ضعیف قرار نہیں دیا اور کسی نے اس کی توثیق بھی نہیں کی ہے ، امام ابویعلیٰ کے بقیہ رجال ثقہ ہیں ۔

سیدنا سعید بن یربوع رضی اللہ عنہ بیان کرتے ہیں : نبی اکرم صلی اللہ علیہ وسلم نے دریافت کیا : ہم میں سے کون بڑا ہے ؟ انہوں نے عرض کی : آپ مجھ سے بڑے ہیں ، اور مجھ سے زیادہ بہتر ہیں لیکن میری عمر کے سال زیادہ ہیں ، تو نبی اکرم صلی اللہ علیہ وسلم نے ان کا نام سعید رکھا ۔ انہوں نے یہ بتایا تھا : ان کا نام صرم ہے ۔ وہ کہتے ہیں : پھر وہ چیز مجھ سے چلی گئی ان کی مراد یہ ہے کہ ان کا نام صرم تھا ۔
یہ روایت امام طبرانی نے مختلف اسانید کے ساتھ نقل کی ہے ، اور امام بزار نے اختصار کے ساتھ نقل کی ہے ، اور اس کے رجال ثقہ ہیں ۔

سیدنا عبدالرحمن بن عوف رضی اللہ عنہ بیان کرتے ہیں : میرا نام پہلے عبدعمرو تھا ، تو نبی اکرم صلی اللہ علیہ وسلم نے میرا نام عبدالرحمن رکھا ۔
یہ روایت امام بزار نے نقل کی ہے ۔ اس کی سند میں ایک راوی یعقوب بن محمد زہری ہے اور وہ ضعیف ہے ۔

سیدنا عبداللہ بن حارث بن جزء رضی اللہ عنہ بیان کرتے ہیں : ایک شخص جو نبی اکرم صلی اللہ علیہ وسلم کی خدمت میں حاضر ہوا تھا ، اور اس نے اسلام قبول کر لیا تھا ، اس کا غریب الوطنی کے عالم میں انتقال ہو گیا ، نبی اکرم صلی اللہ علیہ وسلم اس کی قبر کے پاس کھڑے ہوئے تھے ، آپ نے دریافت کیا : تمہارا نام کیا ہے ؟ میں نے عرض کی : عاص ۔ آپ نے سیدنا عمر رضی اللہ عنہ کے صاحبزادے سے فرمایا : تمہارا نام کیا ہے ؟ انہوں نے جواب دیا : عاص ۔ آپ نے عاص سے دریافت کیا : تمہارا نام کیا ہے ؟ انہوں نے جواب دیا : عاص ۔ نبی اکرم صلی اللہ علیہ وسلم نے فرمایا : تم لوگ اللہ کے بندے ہو ، تم اسے قبر میں اتارو ! راوی کہتے ہیں : تو ہم نے اپنے ساتھی کو قبر میں اتارا ، جب ہم قبر سے باہر نکلے تو ہمارے نام تبدیل ہو چکے تھے ( یعنی ہمارے نام عبداللہ رکھے جا چکے تھے ) ۔
یہ روایت امام بزار اور امام طبرانی نے نقل کی ہے ۔ اس کی سند میں ایک راوی عبداللہ بن صالح ہے ، جو لیث کا کاتب ہے ۔ اس کی توثیق کی گئی ہے ، ایک سے زیادہ افراد نے اسے ضعیف قرار دیا ہے ، امام بزار کے بقیہ رجال صحیح کے رجال ہیں ۔

سیدنا عتبہ بن عبد رضی اللہ عنہ کے بارے میں یہ بات منقول ہے ۔ وہ کہتے ہیں : وہ کچھ افراد سمیت آئے وہ لوگ یہ چاہتے تھے کہ اپنے نام تبدیل کر لیں ، راوی کہتے ہیں : جب نبی اکرم صلی اللہ علیہ وسلم نے مجھے دیکھا تو مجھے بلایا میں کمسن لڑکا تھا ، آپ نے دریافت کیا : تمہارا نام کیا ہے ؟ میں نے جواب دیا : عطلہ بن عبد ۔ نبی اکرم صلی اللہ علیہ وسلم نے فرمایا : بلکہ تم عتبہ بن عبد ہو ، تم اپنی تلوار مجھے دکھاؤ ، نبی اکرم صلی اللہ علیہ وسلم نے اسے میان سے نکالا ، اسے دیکھا تو وہ ایک ایسی تلوار تھی جو پتلی تھی اور کمزور تھی ، نبی اکرم صلی اللہ علیہ وسلم نے فرمایا : تم اس کے ذریعے ضرب نہ لگانا بلکہ اسے چبھو دینا ۔
یہ روایت امام طبرانی نے مختلف حوالوں سے نقل کی ہے ، جن میں سے بعض کے رجال ثقہ ہیں ۔

سیدنا عتبہ رضی اللہ عنہ کے حوالے سے یہ بات منقول ہے کہ جب انہوں نے نبی اکرم صلی اللہ علیہ وسلم کی بیعت کی تو نبی اکرم صلی اللہ علیہ وسلم نے ان سے فرمایا : تمہارا نام کیا ہے ؟ انہوں نے جواب دیا : شیبہ ۔ تو نبی اکرم صلی اللہ علیہ وسلم نے فرمایا : تم عتبہ بن عبد ہو ۔
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا براء بن عازب رضی اللہ عنہ بیان کرتے ہیں : نبی اکرم صلی اللہ علیہ وسلم نے ایک شخص سے دریافت کیا : تمہارا نام کیا ہے ؟ اس نے جواب دیا : نعم ۔ تو نبی اکرم صلی اللہ علیہ وسلم نے فرمایا : بلکہ تم عبداللہ ہو ۔
یہ روایت امام طبرانی نے معجم کبیر اور معجم اوسط میں نقل کی ہے ، اور اس کے رجال ثقہ ہیں ۔

علی بن جہم بلوی اپنے والد کا یہ بیان نقل کرتے ہیں : ہم جمعہ کے دن نبی اکرم صلی اللہ علیہ وسلم کی خدمت میں حاضر ہوئے آپ نے ہم سے دریافت کیا کہ ہم کون ہیں تو ہم نے عرض کی : ہم بنو عبدمناف ہیں ، نبی اکرم صلی اللہ علیہ وسلم نے فرمایا : تم بنو عبداللہ ہو ۔
یہ روایت امام طبرانی نے نقل کی ہے ۔ اس کی سند میں ایک راوی یعقوب بن محمد زہری ہے ، اور وہ متروک ہے ۔

سیدنا حکم بن سعید رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں آپ کی بیعت کرنے کے لئے حاضر ہوا ، آپ نے دریافت کیا : تمہارا نام کیا ہے ؟ میں نے جواب دیا : حکم تو آپ نے فرمایا : بلکہ تم عبداللہ ہو ۔
یہ روایت امام طبرانی نے نقل کی ہے ۔ انہوں نے یہ بات بیان کی ہے کہ یہ صاحب غزوہ بدر میں شہید ہونے کے طور پر قتل ہوئے تھے ، اس کی سند میں ایک راوی ابوامیہ بن یعلیٰ ہے اور وہ متروک ہے ۔

سیدنا حکم بن سعید بن العاص رضی اللہ عنہ بیان کرتے ہیں : وہ نبی اکرم صلی اللہ علیہ وسلم کی خدمت میں حاضر ہوئے ، انہوں نے نبی اکرم صلی اللہ علیہ وسلم کو سلام کیا ، نبی اکرم صلی اللہ علیہ وسلم نے ان سے دریافت کیا : تمہارا نام کیا ہے ؟ انہوں نے جواب دیا : حکم ۔ تو نبی اکرم صلی اللہ علیہ وسلم نے فرمایا : تم عبداللہ ہو ، تو انہوں نے عرض کی : یا رسول اللہ ! میں عبداللہ ہوں ۔
یہ روایت امام طبرانی نے نقل کی ہے ۔ انہوں نے اس روایت اور اس سے پہلے والی روایت کے درمیان فرق کیا ہے ، اور
یہ روایت اس باب میں نقل کی ہے ، جس میں راوی کا نام عبداللہ ہو ، اور اس سے پہلے والی روایت اس باب میں نقل کی ہے ، جس میں راوی کا نام حکم ہو ، اس روایت کے رجال ثقہ ہوں گے اگر اللہ نے چاہا ۔

سیدنا قیوم رضی اللہ عنہ جن کی کنیت ابوعبید ہے ، وہ بیان کرتے ہیں : میں سیدنا ابوراشد ازدی رضی اللہ عنہ کے ساتھ نبی اکرم صلی اللہ علیہ وسلم کی خدمت میں وفد کی شکل میں حاضر ہوا ، نبی اکرم صلی اللہ علیہ وسلم نے ابوراشد سے دریافت کیا : تمہارا نام کیا ہے ؟ انہوں نے جواب دیا : عبدالعزیٰ ابومعاویہ ، نبی اکرم صلی اللہ علیہ وسلم نے فرمایا : بلکہ تم عبدالرحمن ابوراشد ہو ، پھر آپ نے دریافت کیا : تمہارے ساتھ یہ کون ہے ؟ انہوں نے جواب دیا : یہ میرا غلام ہے ۔ نبی اکرم صلی اللہ علیہ وسلم نے دریافت کیا : اس کا نام کیا ہے ؟ انہوں نے جواب دیا : قیوم ۔ نبی اکرم صلی اللہ علیہ وسلم نے ارشاد فرمایا : بلکہ یہ عبدالقیوم ابوعبیدہ ہے ۔
یہ روایت امام طبرانی نے نقل کی ہے ۔ اس کی سند میں راویوں کی ایک جماعت ایسی ہے جن سے میں واقف نہیں ہوں ۔

سیدنا ابوقرصافہ رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھ سے دریافت کیا : کیا تمہارے پسماندگان میں کوئی ہے ؟ میں نے عرض کی : میرا ایک بھائی ہے ۔ نبی اکرم صلی اللہ علیہ وسلم نے فرمایا : تم اسے لے کے آؤ ، راوی کہتے ہیں : میں اپنے بھائی کو لے کے آیا ، وہ ایک کمسن لڑکا تھا وہ میرے ساتھ آیا ، جب وہ نبی اکرم صلی اللہ علیہ وسلم کے قریب ہوا ، تو وہ بھاگ گیا ، میں نے اسے پکڑا ، اس کے دونوں ہاتھ اور پاؤں ملائے پھر میں اسے نبی اکرم صلی اللہ علیہ وسلم کے پاس لے کے آیا ، اس نے اسلام قبول کر لیا اور نبی اکرم صلی اللہ علیہ وسلم کی بیعت کر لی ، اس کا نام میسم تھا ، نبی اکرم صلی اللہ علیہ وسلم نے مجھ سے دریافت کیا : اے ابوقرصافہ ! اس کا نام کیا ہے ؟ میں نے عرض کی : میسم ، نبی اکرم صلی اللہ علیہ وسلم نے فرمایا : بلکہ اس کا نام مسلم ہے ، میں نے عرض کی : یا رسول اللہ ! مسلم آپ کے ساتھ رہے گا ۔
یہ روایت امام طبرانی نے نقل کی ہے ۔ اس کی سند میں راویوں کی ایک جماعت ایسی ہے ، جن سے میں واقف نہیں ہوں ۔

سیدنا عبداللہ بن سلام رضی اللہ عنہ بیان کرتے ہیں : زمانہ جاہلیت میں میرا نام غیلان تھا تو نبی اکرم صلی اللہ علیہ وسلم نے میرا نام عبداللہ رکھ دیا ۔ ( علامہ ہیثمی فرماتے ہیں : ) میں یہ کہتا ہوں
یہ روایت امام ابن ماجہ نے نقل کی ہے ، تاہم اس میں یہ الفاظ نہیں ہیں : ” زمانہ جاہلیت میں میرا نام غیلان تھا ۔ “
یہ روایت امام طبرانی نے نقل کی ہے ۔ اس کی سند میں ایک راوی یحیی بن یعلیٰ ہے ، اور وہ ضعیف ہے ۔

سیدنا اصرم رضی اللہ عنہ بیان کرتے ہیں : میں نے عرض کی : یا رسول اللہ ! میں نے ایک غلام خریدا ہے آپ اللہ تعالیٰ سے اس کے لئے برکت کی دعا کیجئے اور اس کا نام تبدیل کر دیجئے ، نبی اکرم صلی اللہ علیہ وسلم نے دریافت کیا : تمہارا نام کیا ہے ؟ میں نے عرض کی : اصرم ، نبی اکرم صلی اللہ علیہ وسلم نے فرمایا : بلکہ تم زرعہ ہو ، تم اس کا نام کیا رکھنا چاہتے ہو ؟ انہوں نے عرض کی : زراع ، نبی اکرم صلی اللہ علیہ وسلم نے فرمایا : وہ عاصم ہے ۔
یہ روایت امام طبرانی نے نقل کی ہے ، اور اس کے رجال ثقہ ہیں ۔

سیدنا اسامہ بن اخدری رضی اللہ عنہ بیان کرتے ہیں : بنو شقرہ سے تعلق رکھنے والے ایک صاحب جن کا نام اصرم تھا ۔ وہ کچھ لوگوں کے ساتھ نبی اکرم صلی اللہ علیہ وسلم کی خدمت میں حاضر ہوئے ، وہ بیان کرتے ہیں : وہ اپنے حبشی غلام کو لے کر نبی اکرم صلی اللہ علیہ وسلم کے پاس آئے جسے انہوں نے اس علاقے سے خریدا تھا ۔ انہوں نے نبی اکرم صلی اللہ علیہ وسلم کی خدمت میں عرض کی : یا رسول اللہ ! میں نے اسے خریدا ہے ، میں یہ چاہتا ہوں کہ آپ اس کا نام تبدیل کر دیں اور اس کے لئے برکت کی دعا کر دیں ، نبی اکرم صلی اللہ علیہ وسلم نے دریافت کیا : تمہارا نام کیا ہے ؟ میں نے عرض کی : اصرم ، نبی اکرم صلی اللہ علیہ وسلم نے فرمایا : تم زرعہ ہو ، آپ نے دریافت کیا : تم اس کا کیا نام رکھنا چاہتے ہو ؟ انہوں نے عرض کی : میں اس کا نام راعی رکھنا چاہتا ہوں ، نبی اکرم صلی اللہ علیہ وسلم نے فرمایا : یہ عاصم ہے ، پھر نبی اکرم صلی اللہ علیہ وسلم نے اپنی مٹھی بند کر لی ۔
( علامہ ہیثمی فرماتے ہیں : ) میں یہ کہتا ہوں : یہ روایت امام ابوداؤد نے اختصار کے ساتھ نقل کی ہے ، جس میں حبشی غلام کا واقعہ مذکور ہے ۔
یہ روایت امام طبرانی نے نقل کی ہے ، اور اس کے رجال ثقہ ہیں ۔

سیدنا مسعود رضی اللہ عنہ بیان کرتے ہیں : نبی اکرم صلی اللہ علیہ وسلم نے ان کا نام مطاع رکھا اور ان سے یہ فرمایا : تم اپنی قوم میں مطاع ( پیشوا ) ہو گے ، آپ نے ان سے فرمایا : تم اپنے ساتھیوں کے پاس جاؤ آپ نے انہیں ایک ابلق گھوڑا دیا اور انہیں جھنڈا عطا کیا اور فرمایا : جو شخص میرے اس جھنڈے کے نیچے داخل ہو گا وہ عذاب سے محفوظ رہے گا ۔ “
یہ روایت امام طبرانی نے نقل کی ہے ۔ اس کی سند میں راویوں کی ایک جماعت ایسی ہے جن سے میں واقف نہیں ہوں ۔

سیدنا ابوجحیفہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو دیکھا آپ کے پاس ایک کپڑا لایا گیا جس پر شیطان لکھا گیا تھا ، تو آپ کے حکم کے تحت اسے مٹا دیا گیا ، آپ نے فرمایا : میں شیطان سے اللہ کی پناہ مانگتا ہوں ۔
یہ روایت امام طبرانی نے مرفوع اور موقوف ( دونوں طرح سے ) نقل کی ہے اور ان دونوں کے رجال صحیح کے رجال ہیں ، البتہ طبرانی نے مرفوع حدیث کی بہ نسبت موقوف روایت کو زیادہ مستند قرار دیا ہے ۔

ابوبکر بن ابومریم اپنے والد کے حوالے سے اپنے دادا کا یہ بیان نقل کرتے ہیں : میں نبی اکرم صلی اللہ علیہ وسلم کی خدمت میں حاضر ہوا ، میں نے عرض کی : میرے ہاں بیٹی پیدا ہوئی ہے ۔ نبی اکرم صلی اللہ علیہ وسلم نے ارشاد فرمایا : گزشتہ رات مجھ پر سورت مریم نازل ہوئی ہے ، تو تم اس بچی کا نام مریم رکھو تو اس بچی کا نام مریم رکھا گیا ۔
یہ روایت امام طبرانی نے نقل کی ہے ۔ اس کی سند میں ایک راوی سلیمان بن سلمہ خبائری ہے ، اور وہ متروک ہے ۔

سیدنا سہیل بن سعد رضی اللہ عنہ بیان کرتے ہیں : نبی اکرم صلی اللہ علیہ وسلم کے اصحاب میں سے ایک شخص کا نام اسود تھا ، تو نبی اکرم صلی اللہ علیہ وسلم نے اس کا نام ابیض رکھا ۔
یہ روایت امام طبرانی نے معجم اوسط میں نقل کی ہے اور اس کی سند حسن ہے ۔

سیدنا عبدالرحمن بن سمرہ رضی اللہ عنہ بیان کرتے ہیں : زمانہ جاہلیت میں میرا نام عبدکلال تھا ، تو نبی اکرم صلی اللہ علیہ وسلم نے میرا نام عبدالرحمن رکھا ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ناصح ابوالعلاء ہے اور وہ ضعیف ہے ۔

عکرمہ بیان کرتے ہیں : سیدنا عبدالرحمن بن سمرہ کا نام عبدکلوب تھا ، نبی اکرم صلی اللہ علیہ وسلم نے ان کا نام عبدالرحمن رکھا تھا ، ایک مرتبہ وہ نبی اکرم صلی اللہ علیہ وسلم کے پاس سے گزرے ، نبی اکرم صلی اللہ علیہ وسلم اس وقت وضو کر رہے تھے ، آپ نے ارشاد فرمایا : عبدالرحمن ادھر آؤ ! نبی اکرم صلی اللہ علیہ وسلم نے ان سے فرمایا : تم کبھی حکومت طلب نہ کرنا کیونکہ اگر تم نے اسے طلب کیا اور تم نے اسے ترجیح دی تو تمہیں اس کے حوالے کر دیا جائے گا ، اور اگر تم نے اسے طلب نہ کیا تو اس بارے میں تمہاری مدد کی جائے گی ۔
یہ روایت امام طبرانی نے معجم اوسط ” مرسل “ روایت کے طور پر اسحاق بن عبداللہ بن کیسان کے حوالے سے نقل کی ہے ، اور وہ راوی ضعیف ہے ۔