مجمع الزوائد ومنبع الفوائد

سیدنا عقبہ بن خالد لیثی رضی اللہ عنہ بیان کرتے ہیں : نبی اکرم صلی اللہ علیہ وسلم نے ایک جنگی مہم بھیجی ، ان لوگوں نے دشمن پر حملہ کیا ، دشمن میں سے ایک شخص بھاگا ، مہم کے افراد میں سے ایک شخص اس کے پیچھے گیا ، اس کے پاس تلوار تھی ، جو اس نے لہرائی ہوئی تھی ، دشمن سے تعلق رکھنے والے شخص نے کہا: میں مسلمان ہوں ، میں مسلمن ہوں ، لیکن پیچھے جانے والے نے اس کی بات پر توجہ نہیں دی اور اس پر حملہ کر کے اسے قتل کر دیا ، جب یہ بات نبی اکرم صلی اللہ علیہ وسلم کو بتائی گئی ، تو نبی اکرم صلی اللہ علیہ وسلم نے اس بارے میں سخت ناراضگی کا اظہار کیا ، قتل کرنے والے شخص کو اس بات کی اطلاع ملی ، راوی بیان کرتے ہیں : نبی اکرم صلی اللہ علیہ وسلم خطبہ دے رہے تھے ، اسی دوران قتل کرنے والا شخص بولا: یا رسول اللہ ! اللہ کی قسم ! اس شخص نے جو بات کہی تھی ، وہ صرف قتل سے بچنے کے لئے کہی تھی ، نبی اکرم صلی اللہ علیہ وسلم نے اس شخص سے اور اس طرف کے لوگوں سے منہ پھیر لیا اور اپنا خطبہ جاری رکھا ، راوی بیان کرتے ہیں : پھر اس شخص نے دوبارہ کھڑے ہو کر عرض کی : یا رسول اللہ ! اس شخص نے جو بات کہی تھی وہ صرف قتل سے بچنے کے لئے کہی تھی ، نبی اکرم صلی اللہ علیہ وسلم نے اس شخص سے اور اس کی طرف موجود لوگوں سے منہ پھیر لیا ، اس شخص سے صبر نہیں ہوا ، یہاں تک کہ تیسری مرتبہ اس نے یہ بات کی ، تو نبی اکرم صلی اللہ علیہ وسلم اس کی طرف متوجہ ہوئے ، آپ کے چہرے سے ناراضگی کا اظہار ہو رہا تھا ، آپ نے ارشاد فرمایا : ” اللہ تعالیٰ نے مجھے اس چیز کی اجازت نہیں دی ہے کہ میں کسی مومن کو قتل کروں “ یہ بات آپ نے تین مرتبہ ارشاد فرمائی ۔
یہ روایت امام ابویعلیٰ نے نقل کی ہے امام أحمد نے اسے اختصار کے ساتھ نقل کیا ہے ، تاہم انہوں نے سیدنا عقبہ بن خالد رضی اللہ عنہ کی بجائے لفظ ” عقبہ بن مالک “ نقل کیا ہے ۔
یہ روایت امام طبرانی نے طویل روایت کے طور پر نقل کی ہے اور اس کے رجال ثقہ ہیں صرف بشر بن عابس لیثی کا معاملہ مختلف ہے اور وہ ثقہ ہے ۔

سیدنا جندب بن سفیان رضی اللہ عنہ بیان کرتے ہیں : میں نبی اکرم صلی اللہ علیہ وسلم کے پاس موجود تھا ، اسی دوران ایک مہم کا خوشخبری سنانے والا شخص آیا ، جس مہم کو نبی اکرم صلی اللہ علیہ وسلم نے بھیجا تھا ، اس نے آپ کو بتایا کہ اللہ تعالیٰ کی مدد شامل حال ہوئی اور اس لشکر کی مدد ہو گئی اور اللہ تعالیٰ نے ان لوگوں کو فتح نصیب کی ۔ ۔ ۔ ۔ ۔ ۔ ۔ اس کے بعد راوی نے اس کی مانند حدیث نقل کی ہے ، جو سیدنا جندب بن سفیان رضی اللہ عنہ کے حوالے سے پہلے گزر چکی ہے اور اس میں یہ الفاظ ہیں : نبی اکرم صلی اللہ علیہ وسلم نے اس وقت یہ ارشاد فرمایا : ” عنقریب میرے بعد ایسے فتنے ہوں گے ، جو تاریک رات کے ٹکڑوں کی مانند ہوں گے ، ان میں آدمی صبح کے وقت مسلمان ہو گا اور شام کے وقت کافر ہو چکا ہو گا ، یا شام کو مسلمان ہو گا اور صبح کے وقت کافر ہو چکا ہو گا ، مسلمانوں میں سے ایک شخص نے عرض کی : یا رسول اللہ ! اُس وقت ہمیں کیا کرنا چاہیے ؟ نبی اکرم صلی اللہ علیہ وسلم نے فرمایا : تم اپنے گھروں میں داخل ہو جانا اور چھپ جانا ، حاضرین میں سے ایک صاحب نے عرض کی : اس بارے میں آپ کی کیا رائے ہے ؟ کہ اگر ہم میں سے کسی ایک کے گھر میں وہ شخص داخل ہو جاتا ہے ، تو نبی اکرم صلی اللہ علیہ وسلم نے ارشاد فرمایا : اس ( اپنے گھر میں موجود ) شخص کو اپنا ہاتھ روک کے رکھنا چاہیے ، اور اللہ کا مقتول بندہ بننا چاہیے ، اللہ کا قاتل بندہ نہیں بننا چاہیے ، کیونکہ آدمی اسلام کے قبہ میں ہوتا ہے ، پھر وہ اپنے بھائی کا مال کھاتا ہے اور اس کا خون بہاتا ہے ، اپنے پروردگار کی نافرمانی کرتا ہے ، اپنے خالق کا کفر کرتا ہے ، تو اُس کے لئے جہنم واجب ہو جاتی ہے ۔ “
یہ روایت امام ابویعلیٰ نے نقل کی ہے ، اس کی سند میں ایک راوی عبدالحمید بن بہرام ہے اور ایک راوی شہر بن حوشب ہے ان دونوں کی توثیق کی گئی ہے اور ان دونوں میں ضعف پایا جاتا ہے ۔

ابوعمران بیان کرتے ہیں : میں نے سیدنا جندب رضی اللہ عنہ سے کہا: میں نے ان لوگوں کی ، یعنی سیدنا عبداللہ بن زبیر رضی اللہ عنہما کی بیعت کر لی ہے ، اور وہ لوگ یہ چاہتے ہیں کہ میں ان لوگوں کے ساتھ نکل کر شام کی طرف جاؤں ، تو انہوں ( یعنی سیدنا جندب رضی اللہ عنہ ) نے فرمایا : تم رک جاؤ ! میں نے کہا: وہ لوگ نہیں مانتے ہیں ، انہوں نے کہا: تم مال فدیہ کے طور پر دے دو ! میں نے کہا: وہ لوگ اس بات پر اصرار کر رہے ہیں کہ میں ان کے ساتھ تلوار لے کر حصہ لوں ، تو سیدنا جندب رضی اللہ عنہ نے فرمایا : مجھے فلاں شخص نے یہ بات بیان کی ہے کہ نبی اکرم صلی اللہ علیہ وسلم نے ارشاد فرمایا ہے : ” قیامت کے دن مقتول اپنے قاتل کو لے کر آئے گا اور عرض کرے گا : اے میرے پروردگار ! اس شخص سے پوچھ ! کہ اس نے مجھے کیوں قتل کیا تھا ؟ شعبہ نامی راوی کہتے ہیں : میرا خیال ہے روایت میں یہ الفاظ بھی ہیں : اللہ تعالیٰ فرمائے گا : تم نے اسے کیوں قتل کیا تھا ؟ تو وہ عرض کرے گا : میں نے فلاں شخص کی حکومت کی خاطر اسے قتل کیا تھا ۔ “ راوی کہتے ہیں : تو سیدنا جندب رضی اللہ عنہ نے کہا: تم اس چیز سے بچ کے رہنا ۔
یہ روایت امام أحمد اور امام طبرانی نے نقل کی ہے اور اس کے رجال صحیح کے رجال ہیں ۔

سیدنا عبادہ بن قرص رضی اللہ عنہ بیان کرتے ہیں : مسلمانوں میں سے ایک شخص نے کفار سے تعلق رکھنے والے ایک شخص پر حملہ کیا ، اس نے اسے نیزہ مارا تو دوسرے شخص نے مڑ کر اس کی طرف دیکھا اور بولا: میں مسلمان ہوں ، لیکن پہلے شخص نے اسے قتل کر دیا ، اس بات کا تذکرہ نبی اکرم صلی اللہ علیہ وسلم کے سامنے کیا گیا ، تو نبی اکرم صلی اللہ علیہ وسلم نے ارشاد فرمایا : کیا اس کے یہ کہنے کے بعد کہ میں مسلمان ہوں ، تم نے اسے قتل کر دیا ؟ اس شخص نے عرض کی : یا رسول اللہ ! میں نے اسے نیزہ مارا تھا ، نبی اکرم صلی اللہ علیہ وسلم نے مجھ سے منہ پھیر لیا ، آپ نے ارشاد فرمایا : مجھے اس بات کی اجازت نہیں دی گئی کہ کوئی شخص کسی مسلمان کو قتل کر دے ۔ “
یہ روایت امام طبرانی نے نقل کی ہے ، اس کی سند میں ایک راوی عدی بن فضل تیمی ہے اور وہ متروک ہے ۔

حسن بیان کرتے ہیں : اس قتل کرنے والے شخص کا جب انتقال ہوا اور اس کی قوم کے افراد نے اسے دفن کیا ، تو زمین نے اُسے باہر پھینک دیا ، انہوں نے دوبارہ اسے دفن کیا ، تو زمین نے اسے باہر پھینک دیا ، ایسا تین مرتبہ ہوا ، تو ان لوگوں نے اسے پہاڑ کے درمیان میں ڈال دیا اور اس پر پتھر پھینک دیے ، پھر درندوں نے اُسے کھا لیا ۔ ابن ابوزناد بیان کرتے ہیں : مجھ تک
یہ روایت پہنچی ہے کہ جب نبی اکرم صلی اللہ علیہ وسلم کو اس بات کی اطلاع ملی کہ زمین نے اسے باہر پھینک دیا ہے ، تو آپ صلی اللہ علیہ وسلم نے ارشاد فرمایا : ” زمین اُس شخص کو بھی قبول کر لیتی ہے ، جو اس سے زیادہ برا ہو ، لیکن اللہ تعالیٰ نے یہ ارادہ کیا کہ وہ اپنی بارگاہ میں خون کی اہمیت تمہیں دکھا دے ۔ “ ( علامہ ہیثمی فرماتے ہیں ) میں یہ کہتا ہوں :
یہ روایت امام طبرانی نے ضمیرہ کے حالات میں محلم بن جثامہ کے واقعہ کے بعد نقل کی ہے اور اس کی سند منقطع ہے ۔

سیدنا ابوہریرہ رضی اللہ عنہ اور سیدنا ابوسعید خدری رضی اللہ عنہ بیان کرتے ہیں : نبی اکرم صلی اللہ علیہ وسلم نے خطبہ دیتے ہوئے دریافت کیا : یہ کون سا دن ہے ؟ لوگوں نے عرض کی : یہ حرمت والا دن ہے ، آپ نے ارشاد فرمایا : تمہاری جانیں ، تمہارے اموال ، ایک دوسرے کے لئے اسی طرح قابل احترام ہیں ، جس طرح تمہارے اس دن کی ، تمہارے اس مہینے میں ، تمہارے اس شہر میں حرمت ہے ۔ “ ( علامہ ہیثمی فرماتے ہیں ) میں یہ کہتا ہوں سیدنا ابوسعید خدری رضی اللہ عنہ کی نقل کردہ حدیث کو امام ابن ماجہ نے بھی روایت کیا ہے ۔
یہ روایت امام بزار نے نقل کی ہے اور اس کے رجال صحیح کے رجال ہیں ۔

سیدنا عمار بن یاسر رضی اللہ عنہ بیان کرتے ہیں : نبی اکرم صلی اللہ علیہ وسلم نے ہمیں خطبہ دیتے ہوئے دریافت کیا : یہ کون سا دن ہے ؟ ہم نے عرض کی : یہ قربانی کا دن ہے ، آپ نے دریافت کیا : یہ کون سا مہینہ ہے ؟ ہم نے عرض کی : یہ ذوالحج کا حرمت والا مہینہ ہے ، آپ نے دریافت کیا : یہ کون سا شہر ہے ؟ ہم نے عرض کی : یہ حرمت والا شہر ہے ، نبی اکرم صلی اللہ علیہ وسلم نے ارشاد فرمایا : تو تمہاری جانیں ، تمہارے اموال اور تمہاری عزتیں ایک دوسرے کے لئے اُسی طرح قابل احترام ہیں ، جس طرح یہ دن تمہارے لے قابل احترام ہے ، جو تمہارے اس مہینے میں ، تمہارے اس شہر میں ہے ، خبردار ! موجود افراد غیر موجود لوگوں تک تبلیغ کر دیں ۔ “
یہ روایت امام ابویعلیٰ نے ، امام طبرانی نے معجم اوسط میں نقل کی ہے ، اس کی سند میں ایک راوی عبدالرحمن بن عمرو بن جبلہ ہے اور وہ متروک ہے ۔

سیدنا براء رضی اللہ عنہ اور سیدنا زید بن ارقم رضی اللہ عنہ بیان کرتے ہیں : ہم نے نبی اکرم صلی اللہ علیہ وسلم کو یہ ارشاد فرماتے ہوئے سنا بے : ” بے شک تمہاری جانیں اور تمہارے اموال ایک دوسرے کے لئے اسی طرح قابل احترام ہیں ، جس طرح تمہارے اس دن کی ، تمہارے اس مہینے میں ، تمہارے اس شہر میں حرمت ہے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی موسیٰ بن عثمان حضرمی ہے اور وہ متروک ہے ۔ ( علامہ ہیثمی فرماتے ہیں ) میں یہ کہتا ہوں : اس سے پہلے کتاب الحج اور کتاب الدیات میں اس نوعیت کی احادیث گزر چکی ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قتل کرنے والا شخص قتل کرتے ہوئے مومن نہیں ہوتا ، زنا کرنے والا شخص زنا کرتے ہوئے مومن نہیں ہوتا ، شراب پینے والا شخص شراب پیتے ہوئے مومن نہیں ہوتا ، کوئی چیز اچکنے والا شخص اس چیز کو اچکتے ہوئے مومن نہیں ہوتا ، اس سے ایمان یوں الگ ہو جاتا ہے ، جس طرح آدمی اپنی قمیص کو اُتارتا ہے ، جب وہ ایمان کی طرف رجوع کرتا ہے ، تو ایمان بھی اس کی طرف لوٹ آتا ہے ، جب وہ رجوع کرتا ہے ، تو ایمان بھی اس کی طرف لوٹ آتا ہے ۔ “ ( علامہ ہیثمی فرماتے ہیں ) میں یہ کہتا ہوں :
یہ روایت صحیح میں اختصار کے ساتھ منقول ہے ۔
یہ روایت امام بزار نے نقل کی ہے اس کی سند میں ایک راوی مبارک بن حسان ہے ، جسے یحیی بن معین اور دیگر حضرات نے ثقہ قرار دیا ہے ، امام ابوداؤد اور دیگر حضرات نے اسے ضعیف کہا: ہے ، اس روایت کے بقیہ رجال ثقہ ہیں ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” میرے بعد کافر نہ ہو جانا کہ ایک دوسرے کی گردنیں اڑانے لگو ۔ “
یہ روایت امام أحمد ، امام ابویعلیٰ ، امام بزار اور امام طبرانی نے نقل کی ہے اور ان کے رجال صحیح کے رجال ہیں ۔

سیدنا صنابحی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں دوسری اُمتوں کے سامنے تمہاری کثرت پر فخر کا اظہار کروں گا ، تو تم میرے بعد دوبارہ کافر نہ ہو جانا کہ ایک دوسرے کی گردنیں مارنے لگو ۔ “ ( علامہ ہیثمی فرماتے ہیں ) میں یہ کہتا ہوں
یہ روایت امام ابن ماجہ نے اختصار کے ساتھ نقل کی ہے ۔
یہ روایت امام أحمد اور امام ابویعلیٰ نے نقل کی ہے ، اس روایت کی سند میں ایک راوی مجالد بن سعید ہے اور اس میں اختلاف پایا جاتا ہے ۔

سیدنا جابر بن عبداللہ رضی اللہ عنہما روایت کرتے ہیں نبی اکرم صلی اللہ علیہ وسلم نے ارشاد فرمایا : ” تم لوگ آج دین پر قائم ہو اور میں تمہاری کثرت پر دیگر امتوں کے سامنے فخر کا اظہار کروں گا تم میرے بعد الٹے قدموں پلٹ نہ جانا ۔ “
یہ روایت امام أحمد ، امام ابویعلیٰ نے اور امام طبرانی نے معجم اوسط میں نقل کی ہے اس کی سند میں ایک راوی مجالد ہے اور اس کے بارے میں اختلاف پایا جاتا ہے اس روایت کے بقیہ رجال ثقہ ہیں ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم نے اپنے اصحاب سے ارشاد فرمایا : ” میں ( قیامت کے دن ) تم لوگوں کو ایسی حالت میں ہرگز نہ پاؤں کہ تم میرے بعد کافر ہو گئے تھے اور ایک دوسرے کی گردنیں مارنے لگے تھے ۔ “
یہ روایت امام بزار اور امام ابویعلیٰ نے نقل کی ہے ، اس کی سند میں ایک راوی مبارک بن سحیم ہے اور وہ متروک ہے ۔

سیدنا اسامہ بن زید رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم میرے بعد دوبارہ کافر نہ ہو جانا کہ ایک دوسرے کی گردنیں اڑانے لگو ۔ “
یہ روایت امام طبرانی نے معجم اوسط میں نقل کی ہے اور اس کی سند میں ایسا راوی ہے ، جس سے میں واقف نہیں ہوں ۔

سیدنا عبادہ بن صامت رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” قیامت کے دن اللہ تعالیٰ ہر گناہ معاف کر دے گا ، البتہ اس شخص کا معاملہ مختلف ہے ، جو مشرک ہونے کے عالم میں مرا ہو ، یا جس نے کسی مؤمن کو جان بوجھ کر قتل کیا ہو ۔ “
یہ روایت امام بزار نے نقل کی ہے اور اس کے رجال ثقہ ہیں ۔

عامر شعبی بیان کرتے ہیں : جب مروان نے ضحاک بن قیس سے جنگ کرنے کا ارادہ کیا ، تو اس نے سیدنا ایمن بن خریم اسدی رضی اللہ عنہ کو پیغام بھیجا اور یہ کہا: کیا آپ یہ بات پسند کریں گے کہ ہمارے ساتھ جنگ میں حصہ لیں ، انہوں نے جواب دیا : میرے والد اور میرے چچا کو غزوہ بدر میں شرکت کا شرف حاصل ہے ، اُن دونوں نے مجھے یہ تلقین کی تھی کہ میں ایسے کسی شخص کے ساتھ جنگ نہ کروں ، جو اس بات کی گواہی دیتا ہو کہ اللہ تعالیٰ کے علاوہ اور کوئی معبود نہیں ہے ، اگر تم میرے پاس جہنم سے بچ جانے کا ( کوئی حکم ) لے کر آتے ہو ، تو میں تمہارے ساتھ جنگ کر لوں گا ، اس نے کہا: آپ تشریف لے جائیں ، اس نے ان پر تنقید کی اور انہیں برا بھلا کہا: ، تو سیدنا ایمن بن خریم اسدی رضی اللہ عنہ نے یہ اشعار کہے : ” میں ایسے شخص کے ساتھ جنگ نہیں کروں گا ، جو نماز ادا کرتا ہو اور جنگ کا مقصد ، صرف قریش سے تعلق رکھنے والے ایک شخص کی حکمرانی ہو ، اسے تو اس کی حکمرانی مل جائے گی اور میرے ذمہ گناہ لازم آئے گا ، میں جہالت اور طیش سے اللہ کی پناہ مانگتا ہوں ، کیا میں کسی وجہ کے بغیر کسی مسلمان کے ساتھ جنگ کروں ، یہ چیز تو مجھے کوئی فائدہ نہیں دے گی ، خواہ میں جب تک بھی زندہ رہوں ۔ “
یہ روایت امام ابویعلیٰ نے نقل کی ہے ، امام طبرانی نے اس کی مانند نقل کی ہے ، تاہم انہوں نے یہ الفاظ نقل کے ہیں : ” میں ایسے کسی شخص کو قتل نہیں کروں گا ، جو نماز ادا کرتا ہو ۔ “ اور اس میں یہ الفاظ ہیں : ” پھسل جانے اور طیش سے اللہ کی پناہ ہے ۔ “ اور اس میں یہ الفاظ بھی ہیں : ” کیا میں کسی جرم کے بغیر ، کسی مسلمان کو قتل کر دوں ۔ “
یہ روایت امام ابویعلیٰ نے نقل کی ہے اور اس کے رجال صحیح کے رجال ہیں ، صرف زکریا بن یحیی زحمویہ کا معاملہ مختلف ہے اور وہ ثقہ ہے ۔

سیدنا ابوسعید خدری رضی اللہ عنہ بیان کرتے ہیں : نبی اکرم صلی اللہ علیہ وسلم کے زمانہ اقدس میں ایک شخص قتل ہو گیا ، نبی اکرم صلی اللہ علیہ وسلم خطبہ دینے کے لئے ( منبر پر ) چڑھے آپ نے ارشاد فرمایا : کیا تم لوگ یہ بات نہیں جانتے ہو کہ تمہارے درمیان اس مقتول کو کس نے قتل کیا ہے ، یہ بات آپ نے تین مرتبہ دریافت کی ، تو لوگوں نے یہی کہا: کہ اللہ جانتا ہے ، ہم نہیں جانتے ، نبی اکرم صلی اللہ علیہ وسلم نے ارشاد فرمایا : ” اس ذات کی قسم ! جس کے دست قدرت میں محمد کی جان ہے ، اگر تمام آسمان والے اور تمام زمین والے کسی مومن کو قتل کرنے پر اکٹھے ہو جائیں ، تو اللہ تعالیٰ ان سب کو جہنم میں داخل کر دے گا ، اور ہم اہل بیت سے جو بھی شخص بغض رکھے گا ، اللہ تعالیٰ اسے اوندھے منہ جہنم میں ڈال دے گا ۔ “
یہ روایت امام بزار نے نقل کی ہے ، اس کی سند میں ایک راوی داؤد بن عبدالحمید ہے اور اس کے علاوہ دیگر ضعیف راوی ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم کے زمانہ اقدس میں ایک شخص قتل ہو گیا ، جس کے قاتل کا پتہ نہیں چل سکا ، نبی اکرم صلی اللہ علیہ وسلم منبر پر چڑھے آپ نے ارشاد فرمایا : ” اے لوگو ! کیا ایک شخص قتل ہو گیا ہے ؟ جبکہ میں تمہارے درمیان موجود ہوں ، اور اس کے قتل کرنے والے کا پتہ نہیں چل سکا ؟ اگر آسمان والے اور زمین والے سب اکٹھے ہو کر کسی مسلمان کو قتل کر دیں ، تو اللہ تعالیٰ کسی گنتی اور حساب کے بغیر ان سب کو عذاب دے گا ۔ “
یہ روایت امام طبرانی نے نقل کی ہے اور اس کے رجال صحیح کے رجال ہیں ، صرف عطاء بن ابومسلم کا معاملہ مختلف ہے ، ابن حبان نے اسے ثقہ قرار دیا ہے اور ایک جماعت نے اسے ضعیف کہا: ہے ۔

سیدنا ابوبکره رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اگر تمام آسمان اور زمین والے کسی مسلمان کے قتل پر اکٹھے ہو جائیں ، تو اللہ تعالیٰ ان سب کو ان کے چہروں کے بل جہنم میں ڈال دے گا ۔ “
یہ روایت امام طبرانی نے معجم صغیر میں نقل کی ہے ، اس کی سند میں ایک راوی جسر بن فرقد ہے اور وہ ضعیف ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اگر تمام آسمان والے اور زمین والے کسی مومن کے قتل پر اکٹھے ہو جائیں ، تو اللہ تعالیٰ انہیں جہنم میں ڈال دے گا ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابوحمزہ اعور ہے اور وہ متروک ہے ، ابوحاتم کہتے ہیں : اس کی حدیث کو نوٹ کیا جائے گا ، اس روایت کے بقیہ رجال صحیح کے رجال ہیں ۔

سیدنا عبداللہ بن عمر رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جب کوئی شخص چل کر دوسرے شخص کے پاس جائے اور اسے قتل کر دے ، تو مقتول جنت میں جائے گا اور قاتل جہنم میں جائے گا ۔ “
یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ( قیامت کے دن ) مقتول آئے گا ، اُس نے اپنے قاتل کو پکڑا ہوا ہو گا اور اس کی رگوں سے خون نکل رہا ہو گا ، وہ رب العزت کی بارگاہ میں آئے گا اور عرض کرے گا : اے میرے پروردگار ! تو اس سے پوچھ ! کہ اس نے مجھے کیوں قتل کیا تھا ؟ اللہ تعالیٰ اس شخص سے فرمائے گا : تم نے اسے کیوں قتل کیا تھا ؟ تو قاتل جواب دے گا : میں نے اس لئے اسے قتل کیا تھا تاکہ غلبہ فلاں شخص کو مل جائے ، تو اس سے کہا: جائے گا : غلبہ تو اللہ تعالیٰ کے لئے مخصوص ہے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی فیض بن وثیق ہے اور وہ کذاب ہے ۔

سیدنا عبداللہ بن عباس رضی اللہ عنہما کے بارے میں یہ بات منقول ہے : ایک شخص نے ان سے سوال کیا اور کہا: اے ابوعباس ! کیا قاتل کے لئے توبہ کی گنجائش ہے ؟ سیدنا عبداللہ بن عباس رضی اللہ عنہما نے حیرانگی کا اظہار کرتے ہوئے فرمایا : تم نے کیا کہا: ؟ اس شخص نے اپنے سوال کو دہرایا ، تو سیدنا عبداللہ بن عباس رضی اللہ عنہما نے پھر یہ کہا: تم نے کیا کہا: ؟ یہ مکالمہ دو یا شاید تین مرتبہ ہوا ، پھر سیدنا عبداللہ بن عباس رضی اللہ عنہما نے فرمایا : میں نے تمہارے نبی صلی اللہ علیہ وسلم کو یہ ارشاد فرماتے ہوئے سنا ہے : ” ( قیامت کے دن ) مقتول آئے گا ، اس نے ایک ہاتھ میں اپنا سر پکڑا ہوا ہو گا اور دوسرے ہاتھ میں اس نے قاتل پکڑا ہوا ہو گا ، اس کی رگوں سے خون بہہ رہا ہو گا ، یہاں تک کہ وہ اسے ساتھ لے کر عرش کے پاس آئے گا ، پھر مقتول تمام جہانوں کے پروردگار کی بارگاہ میں عرض کرے گا کہ اس نے مجھے قتل کیا تھا ، تو اللہ تعالیٰ قاتل سے فرمائے گا : تم برباد ہو گئے ! پھر اس قاتل کو جہنم کی طرف لے جایا جائے گا ۔ “ ( علامہ ہیثمی فرماتے ہیں ) میں یہ کہتا ہوں :
یہ روایت امام ترمذی نے آخری حصے کے اختصار کے ساتھ نقل کی ہے ۔
یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” کوئی حرج نہیں ہے ، البتہ مسلمان کے قتل کا معاملہ مختلف ہے ۔ “ یہ بات آپ صلی اللہ علیہ وسلم نے تین مرتبہ ارشاد فرمائی ۔
یہ روایت امام طبرانی نے معجم اوسط میں نقل کی ہے اور اس کی سند میں ایک راوی لیث بن ابوسلیم ہے اور وہ مدلس ہے ۔

سیدنا جندب بن عبداللہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص یہ کر سکتا ہو کہ اس کے اور جنت کے درمیان مٹھی بھر خون رکاوٹ نہ بنے ، جو ( خون ) اس نے بہایا ہو ، یوں جیسے وہ مرغی ذبح کرتا ہے ، تو ایسا شخص جب بھی جنت کے کسی دروازے پر آئے گا ، تو وہ خون اس کے اور جنت کے دروازے کے درمیان رکاوٹ بن جائے گا اور تم میں سے جو شخص یہ استطاعت رکھتا ہو ، اسے اپنے پیٹ میں پاکیزہ چیز داخل کرنی چاہیے ، کیونکہ انسان میں سے ، سب سے پہلے اس کا پیٹ بدبودار ہوتا ہے ۔ “
یہ روایت امام طبرانی نے معجم اوسط اور معجم کبیر میں نقل کی ہے اور اس کے رجال صحیح کے رجال ہیں ۔

حسن بصری ، سیدنا جندب رضی اللہ عنہ کے بارے میں یہ بات بیان کرتے ہیں : میں مصعب کی حکومت کے زمانے میں اُن کے پاس بیٹھا ہوا تھا ، انہوں نے فرمایا : یہ لوگ قتل و غارت گری کر رہے ہیں اور دنیا کے بارے میں ایک دوسرے کا ساتھ دے رہے ہیں ، بلند عمارتیں تعمیر کر رہے ہیں ، میں اللہ کی قسم اٹھا کر یہ کہتا ہوں کہ تھوڑے عرصے ہی بعد تم پر وہ زمانہ آ جائے گا کہ جب ایک مضبوط اونٹ اور اس کی چادریں اور پالان کی لکڑیاں تم میں سے کسی ایک شخص کے نزدیک ، بڑے گھر سے زیادہ محبوب ہوں گی ۔ ۔ ۔ ۔ ۔ ۔ ۔ ۔ “ اس کے بعد راوی نے حسب سابق روایت ذکر کی ہے ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

عبدالملک بن مروان بیان کرتے ہیں : میں اس حکومتی عہدے کا نگران بننے سے پہلے مدینہ منورہ میں سیدہ بریرہ رضی اللہ عنہا کی خدمت میں بیٹھا کرتا تھا ، وہ یہ فرماتی تھیں : اے عبدالملک ! میں تمہارے بارے میں یہ سمجھتی ہوں کہ تمہارے اندر یہ خصوصیات اور صلاحیتیں پائی جاتیں کہ تم اس اُمت کی حکومت کے نگران بنو ، اگر تم اس کے نگران بن گئے ، تو تم خون بہانے سے بچنا ، کیونکہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” ایک شخص کو جنت کے دوازے سے پیچھے کر دیا جائے گا کہ وہ جنت کی طرف دیکھے ، اُس کی وجہ وہ خون ہو گا ، جو اس نے کسی مسلمان کا ناحق طور پر بہایا ہو گا ۔ “
یہ روایت امام طبرانی نے نقل کی ہے اس کی سند میں ایک راوی عبدالخالق بن زید بن واقد ہے اور وہ ضعیف ہے ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بے شک اللہ تعالیٰ نے فتنے کے دوران کسی ایسی چیز کو حلال قرار نہیں دیا ، جسے اس نے اس سے پہلے حرام قرار دیا ہو ، تم میں سے کسی ایک شخص کا کیا معاملہ ہے ؟ کہ وہ اپنے بھائی کے پاس آ کر اسے سلام کرے گا ، پھر اس کے بعد جب وہ اس کے پاس آئے گا تو اُسے قتل کر دے گا ۔ “
یہ روایت امام طبرانی نے نقل کی ہے اس کی سند میں ایک راوی عبدالملک بن محمد صنعانی ہے ، جسے ایوب بن سلیمان اور دیگر حضرات نے ثقہ قرار دیا ہے اور اس میں ضعف پایا جاتا ہے ۔

سیدنا عبداللہ بن مسعود رضی اللہ عنہ فرماتے ہیں : انسان اپنے دین کے بارے میں مسلسل گنجائش میں رہتا ہے ، جب تک اس نے حرام طور پر کسی قتل کا ارتکاب نہ کیا ہو ، جب وہ حرام طور پر قتل کا ارتکاب کر دے ، تو اس سے حیاء الگ کر دی جاتی ہے ۔

ایک روایت میں یہ الفاظ ہیں : ” بندے اللہ تعالیٰ کے پردے میں مسلسل رہتے ہیں ، جب تک وہ عبادت کرتے رہتے ہیں اور انہوں نے حرام طور پر خون نہیں بہایا ہوتا ہے ۔ “ پہلی روایت کی سند کے رجال صحیح کے رجال ہیں ، البتہ ابراہیم نامی راوی نے سیدنا عبداللہ بن مسعود رضی اللہ عنہ سے سماع نہیں کیا ہے ۔

سیدنا عبداللہ بن مسعود رضی اللہ عنہ مرفوع حدیث کے طور پر یہ بات نقل کرتے ہیں : ( نبی اکرم صلی اللہ علیہ وسلم نے ارشاد فرمایا ہے : ) ” کسی شخص کے ہاتھوں کا خون سے رنگا جانا تمہیں اچھا نہ لگے کیونکہ اللہ تعالیٰ کی بارگاہ میں اس کے لئے ایک ایسا قتل کرنے والا ( عذاب کا فرشتہ ) ہو گا ، جسے موت نہیں آئے گی اور تمہیں کوئی ایسا شخص اچھا نہ لگے ، جس نے حرام طور پر کوئی مال کمایا ہو ، کیونکہ اگر وہ اس مال میں سے خرچ کرے گا ، تو وہ اس کی طرف سے قبول نہیں ہو گا ، اگر وہ اس مال کو روک کے رکھے گا ، تو اس کے لئے اس مال میں برکت نہیں رکھی جائے گی ، اور اگر وہ مر جائے گا اور اس مال کو چھوڑ جائے گا ، تو وہ مال جہنم تک جانے کے لئے اس کا زاد راہ ہو گا ۔ “
یہ روایت امام طبرانی نے نقل کی ہے ، اس کی سند میں ایک راوی نضر بن حمید ہے اور وہ ضعیف ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص نصف کلمے کے ہمراہ ، کسی ناحق قتل میں حصہ دار ہوا ہو ، جب وہ قیامت کے دن آئے گا ، تو اس کی دونوں آنکھوں کے درمیان یہ لکھا ہوا ہو گا : یہ اللہ کی رحمت سے مایوس ہے ۔ “
یہ روایت امام طبرانی نے نقل کی ہے ، اس کی سند میں ایک راوی عبداللہ بن خراش ہے ، جسے امام بخاری رحمہ اللہ اور ایک جماعت نے ضعیف قرار دیا ہے ، جبکہ ابن حبان نے اسے ثقہ کہا: ہے ، وہ فرماتے ہیں : یہ بعض اوقات غلطی کر جاتا ہے ، اس روایت کے بقیہ رجال ثقہ ہیں ۔

سیدنا عبداللہ بن مسعود رضی اللہ عنہ فرماتے ہیں : جب لوگ فتنے میں واقع ہو جائیں گے ، تو یہ کہیں گے : تم لوگوں کے لئے کوئی نمونہ نکالو ! تو تم یہ کہنا : برائی میں میرے لیے کوئی نمونہ نہیں ہے ۔
یہ روایت امام طبرانی نے نقل کی ہے ، اس کی سند میں ایک راوی خدیج بن معاویہ ہے ، جسے امام أحمد اور دیگر حضرات نے ثقہ قرار دیا ہے اور ایک جماعت نے اسے ضعیف کہا: ہے ۔

حمید بن ہلال بیان کرتے ہیں : جب فتنہ پھیل گیا تو سیدنا عمران بن حصین رضی اللہ عنہ نے حجیر بن ربیع عدوی سے فرمایا : تم اپنی قوم کی طرف جاؤ اور انہیں فتنے میں حصہ لینے سے منع کرو ، انہوں نے کہا: مجھے ان کے درمیان نمایاں حیثیت حاصل نہیں ہے اور میری بات نہیں مانی جاتی ، تو سیدنا عمران رضی اللہ عنہ نے فرمایا : تم انہیں میری طرف سے یہ پیغام دو اور انہیں اس سے منع کر دو ، راوی کہتے ہیں : میں نے سیدنا عمران رضی اللہ عنہ کو سنا : انہوں نے اللہ کی قسم اٹھا کر یہ کہا: کہ اگر میں ایک سیاہ فام حبشی غلام ہوؤں اور بکریوں میں رہ کر پہاڑ کی چوٹی پر ان کو چراتا رہوں ، یہاں تک کہ میری موت مجھ تک آ جائے ، تو یہ میرے نزدیک اس سے زیادہ محبوب ہو گا کہ میں نے کسی جنگ میں کسی ایک فریق کی طرف سے تیر مارا ہو ، خواہ وہ نشانے تک پہنچا ہو یا نہ پہنچا ہو ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

ابن سیرین بیان کرتے ہیں : جب سیدنا سعد بن ابی وقاص رضی اللہ عنہ سے یہ کہا: گیا : آپ جنگ میں حصہ کیوں نہیں لیتے ؟ آپ اہل شوریٰ میں سے ہیں اور آپ کسی اور کے مقابلے میں اس معاملے کے زیادہ حق دار ہیں ، تو انہوں نے فرمایا : میں اس وقت تک جنگ میں حصہ نہیں لوں گا ، جب تک وہ لوگ میرے پاس ایسی تلوار لے کر نہیں آتے ، جس کی دو آنکھیں ہوں ، ایک زبان ہو ، دو ہونٹ ہوں اور وہ کافر کے مقابلے میں مومن کو پہچان سکتی ہو ، اگر ایسا ہو گا تو میں جنگ میں حصہ لوں گا ، کیونکہ مجھے جہاد کا پتہ ہے ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔