مجمع الزوائد ومنبع الفوائد

سیدنا حذیفہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کی خدمت میں عرض کی : یا رسول اللہ ! ہم نیکی کا حکم دینا اور برائی سے منع کرنا کب چھوڑیں گے ؟ جبکہ یہ دونوں نیکوکار لوگوں کے اعمال کے سردار ہیں ؟ نبی اکرم صلی اللہ علیہ وسلم نے فرمایا : اس وقت ( چھوڑیں گے ) جب تمہیں وہی چیز لاحق ہو گی ، جو بنی اسرائیل کو لاحق ہوئی تھی ، میں نے عرض کی : یا رسول اللہ ! بنی اسرائیل کو کیا چیز لاحق ہوئی تھی ؟ نبی اکرم صلی اللہ علیہ وسلم نے ارشاد فرمایا : ” جب تمہارے بہترین لوگ ، تمہارے گنہگار لوگوں کے سامنے مداھنت کریں گے ( یعنی جو اُن لوگوں کے من میں ہو گا اس کے برخلاف ظاہر کریں گے ) اور علم ، تمہارے بدترین لوگوں میں چلا جائے گا اور بادشاہی تمہارے کمسن لوگوں میں چلی جائے گی ، تو اُس وقت تمہیں فتنے اپنی لپیٹ میں لے لیں گے ، جو حملہ آور ہونے والے ہوں گے اور تم پر حملہ کیا جائے گا ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عمار بن سیف ہے ، جسے عجلی اور دیگر حضرات نے ثقہ قرار دیا ہے اور ایک جماعت نے اسے ضعیف کہا: ہے ، اس روایت کے بقیہ رجال ثقہ ہیں اور اس کے بعض رجال کے بارے میں اختلاف پایا جاتا ہے ۔

سیدنا معاذ بن جبل رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” آخری زمانے میں ایسے لوگ ہوں گے ، جو کھلے عام ( گناہ ) کرنے والے ہوں گے اور پوشیدہ طور پر ( گناہ کرنے ) کے دشمن ہوں گے ، انہوں نے عرض کی : یا رسول اللہ ! اس کی وجہ کیا ہو گی ؟ نبی اکرم صلی اللہ علیہ وسلم نے ارشاد فرمایا : کیونکہ وہ ایک دوسرے سے رغبت رکھتے ہوں گے اور ایک دوسرے سے ڈرتے بھی ہوں گے ۔ “
یہ روایت امام بزار نے اور امام طبرانی نے معجم اوسط میں نقل کی ہے اس کی سند میں ایک راوی ابوبکر بن ابومریم ہے اور وہ ضعیف ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” آخری زمانے میں عنقریب ایسے لوگ آئیں گے ، جن کے چہرے آدمیوں کے چہرے جیسے ہوں گے ، اور ان کے دل شیاطین کے دلوں جیسے ہوں گے ، وہ چیر پھاڑ کرنے والے بھیڑیوں کی مانند ہوں گے ، ان کے دلوں میں کوئی رحمت نہیں ہو گی ، وہ بہت زیادہ خون بہانے والے ہوں گے اور کسی قبیح چیز سے نہیں رکیں گے ، اگر تم ان کی پیروی کرو گے ، تو وہ تمہیں پس پشت ڈال دیں گے اور اگر تم ان سے چھپنے کی کوشش کرو گے ، تو وہ تمہیں تلاش کریں گے ، اگر وہ تمہارے ساتھ بات چیت کریں گے ، تو تمہارے ساتھ جھوٹ بولیں گے ، اگر تم انہیں امین بناؤ گے ، تو وہ تمہارے ساتھ خیانت کریں گے ، ان کے بچے خبیث ہوں گے ، ان کے نوجوان شاطر ہوں گے اور بوڑھے نیکی کا حکم نہیں دیں گے اور برائی سے منع نہیں کریں گے ، اُن کے حوالے سے عزت حاصل کرنا ، درحقیقت ذلت ہو گا اور ان کے پاس ، جو ( مال وغیرہ ) موجود ہے ، اس کو حاصل کرنے کی کوشش کرنا ، غربت ہو گی ، ان کے درمیان بردبار شخص گمراہ ہو گا ، ان کے درمیان نیکی کا حکم دینے والا شخص تہمت یافتہ ہو گا ، ان کے درمیان مؤمن کمزور ہو گا ، ان کے درمیان فاسق کو نمایاں حیثیت حاصل ہو گی ، ان کے درمیان سنت ، بدعت ہو گی اور ان کے درمیان بدعت ، سنت ہو گی ، اس وقت اللہ تعالیٰ ان لوگوں پر ان میں سے بدترین لوگوں کو مسلط کر دے گا ، پھر ان کے نیک لوگ دعا کریں گے ، لیکن وہ قبول نہیں ہو گی ۔ “
یہ روایت امام طبرانی نے معجم صغیر اور معجم اوسط میں نقل کی ہے ، اس کی سند میں ایک راوی محمد بن معاویہ نیشاپوری ہے اور وہ متروک ہے ۔

سیدنا سلمان فارسی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب قول ظاہر ہو جائے ، اور عمل کو چھپا لیا جائے اور زبانوں میں اختلاف آ جائے اور دل ایک دوسرے سے بغض رکھنے لگیں اور ہر رشتہ دار اپنی رشتہ داری کے حقوق پامال کرنے لگے ، تو ایسی صورت میں اللہ تعالیٰ ان لوگوں پر لعنت کرے گا ، انہیں بہرہ کر دے گا اور اُن کی بینائی ختم کر دے گا ۔ “
یہ روایت امام طبرانی نے معجم اوسط اور معجم کبیر میں نقل کی ہے ، اس کی سند میں راویوں کی ایک جماعت ایسی ہے ، جن سے میں واقف نہیں ہوں ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” لوگوں پر ایک ایسا زمانہ آئے گا کہ وہ بھیڑیے ہوں گے اور جو شخص بھیٹریا نہیں ہو گا ، تو بھیڑیے اُسے کھا لیں گے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایسے راوی ہیں ، جن سے میں واقف نہیں ہوں ۔