مجمع الزوائد ومنبع الفوائد

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” لا اله الا الله کے ماننے والے مسلسل بھلائی پر گامزن رہیں گے ، جب تک وہ اس چیز کا خیال رکھیں گے کہ ان کے دنیاوی معاملات ان کے دین میں کوئی کمی تو نہیں کر رہے ، اور جب وہ اس بات کی پرواہ نہیں کریں گے کہ ان کی دنیا کی بہتری کی وجہ سے ، ان کے دین میں کیا کمی ہو رہی ہے ؟ تو پھر انہیں لوٹا دیا جائے گا ( یا مسترد کر دیا جائے گا ) اور یہ کہا: جائے گا : تم لوگ بچے نہیں تھے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عمرو بن عبدالغفار ہے اور وہ متروک ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” لا اله الا الله اپنے پڑھنے والے سے مسلسل ( عذاب یا ناراضگی ) کو پرے کرتا رہے گا ، جب تک اس کو پڑھنے والے اس چیز کا خیال رکھیں گے کہ انہیں جو دنیا نصیب ہو رہی ہے ، اس کے حوالے سے ان کا دین سلامت ہے ؟ لیکن جب اس کلمے کو پڑھنے والے ، اس بات کی پرواہ نہیں کریں گے کہ ان کی دنیا کی سلامتی کی وجہ سے ، اُن کے دین کا کتنا نقصان ہو رہا ہے ؟ اور پھر بھی وہ لا الہ الا اللہ پڑھیں گے ، تو ان سے کہا: جائے گا : تم غلط بیانی کر رہے ہو ۔ “
یہ روایت امام بزار نے نقل کی ہے اس کی سند میں ایک راوی عبداللہ بن محمد بن عجلان ہے اور وہ انتہائی ضعیف ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” لا اله الا اللہ بندے کو اللہ تعالیٰ کی ناراضگی سے روکے رکھتا ہے ، جب تک بندہ اپنے دنیاوی سودوں کو اپنے دین پر ترجیح نہیں دیتا ، جب وہ ایسا کر لے اور پھر وہ لا الہ الا اللہ پڑھے ، تو اللہ تعالیٰ فرماتا ہے : تم نے غلط بیانی کی ہے ۔ “
یہ روایت امام ابویعلیٰ نے نقل کی ہے اور اس کی سند حسن ہے ۔