مجمع الزوائد ومنبع الفوائد

سیدنا ابودرداء رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب اللہ تعالیٰ نے سیدنا آدم علیہ السلام کو پیدا کیا ، تو اُن کے دائیں کندھے پر ہاتھ مار کر چیونٹیوں کی طرح کی سفید رنگ کی ، اُن کی اولاد کو نکالا ، پھر ان کے بائیں کندھے پر ہاتھ مار کر سیاہ رنگ کی اُن کی اولاد کو نکالا ، جو کوئلے کی مانند تھے ، پھر اللہ تعالیٰ نے دائیں طرف والے لوگوں کے بارے میں یہ فرمایا : یہ جنت میں جائیں گے اور مجھے اس کی پرواہ نہیں ہے ، اور جو بائیں ہتھیلی میں تھے ان کے بارے میں یہ فرمایا : یہ جہنم میں جائیں گے اور مجھے اس کی پرواہ نہیں ہے ۔ “
یہ روایت امام أحمد ، امام بزار اور امام طبرانی نے نقل کی ہے اور اس کے رجال صحیح کے رجال ہیں ۔

ابونضرہ بیان کرتے ہیں : نبی اکرم صلی اللہ علیہ وسلم کے اصحاب سے تعلق رکھنے والے ایک صاحب ، جنہیں ابوعبداللہ کہا: جاتا تھا ، ان کے شاگرد ان کی عیادت کرنے کے لئے ان کے پاس آئے ، تو وہ رو رہے تھے ، لوگوں نے ان سے دریافت کیا : آپ کیوں رو رہے ہیں ؟ کیا اللہ کے رسول صلی اللہ علیہ وسلم نے آپ سے یہ ارشاد نہیں فرمایا ہے : اپنی مونچھیں پست رکھو اور پھر انہیں ایسے ہی رکھنا ، یہاں تک تم مجھ سے آ ملو ! تو ان صاحب نے جواب دیا : جی ہاں ! لیکن میں نے نبی اکرم صلی اللہ علیہ وسلم کو یہ بھی ارشاد فرماتے ہوئے سنا ہے : ” بے شک اللہ تعالیٰ نے دائیں ہاتھ میں کچھ لوگوں کو لیا اور دوسرے ہاتھ میں دوسرے لوگوں کو لیا اور فرمایا : ” یہ اُس ( یعنی جنت ) کے لئے ہیں اور یہ اُس ( یعنی جہنم ) کے لئے ہیں اور مجھے کوئی پرواہ نہیں ہے ۔ “ ( پھر ان صحابی نے فرمایا : ) مجھے نہیں معلوم میں اُن میں سے کون سی مٹھی میں تھا ؟
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا عبدالرحمن بن قتادہ سلمی رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ” اللہ تعالیٰ نے سیدنا آدم علیہ السلام کو پیدا کیا اور پھر ان کی پشت سے مخلوق ( یعنی بنی نوع انسان ) کو لیا اور فرمایا : یہ لوگ جنت میں جائیں گے اور مجھے کوئی پرواہ نہیں ہے اور یہ ( دوسرے ) لوگ جہنم میں جائیں گے اور مجھے کوئی پرواہ نہیں ہے ۔ “ ایک صاحب نے عرض کی : یا رسول اللہ ! پھر ہم کس بنیاد پر عمل کریں ؟ نبی اکرم صلی اللہ علیہ وسلم نے فرمایا : تقدیر ( کے حکم ) کے واقع ہونے کی صورت ( کے مطابق تم عمل کرو ) ۔
یہ روایت امام أحمد نے نقل کی ہے اور اس کے رجال ثقہ ہیں ۔

سیدنا انس رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا : ” اللہ تعالیٰ نے مٹھی میں ( بنی نوع انسان ) کو لیا اور فرمایا : یہ میری رحمت ، جنت کے لئے ہیں ، پھر ایک اور مٹھی میں ( دوسرے لوگوں کو ) لیا اور فرمایا : یہ جہنم کے لئے ہیں ، اور میں کوئی پرواہ نہیں کرتا ۔ “
یہ روایت امام ابویعلیٰ نے نقل کی ہے ، اس کی سند میں ایک راوی حکم بن سنان باہلی ہے ، ابوحاتم کہتے ہیں : اسے بہت زیادہ وہم لاحق ہوتا ہے ، یہ قوی نہیں ہے ، تاہم اس کا محل صدق ہے ، اس کی حدیث کو نوٹ کیا جائے گا ، جمہور نے اسے ضعیف قرار دیا ہے ، اس روایت کے بقیہ رجال صحیح کے رجال ہیں ۔

سیدنا ابوموسیٰ اشعری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب اللہ تعالیٰ نے سیدنا آدم علیہ السلام کو پیدا کیا ، تو اُن کی مٹی کو مٹھی میں لیا ، اُسے دو مٹھیوں میں لیا ، دائیں مٹھی میں کچھ کو لیا اور بائیں میں کچھ کو لیا ، دائیں مٹھی والے لوگوں کے بارے میں اس نے فرمایا : یہ جنت میں جائیں گے اور میں اس کی کوئی پرواہ نہیں کرتا ، اور دوسرے ہاتھ والے لوگوں کے بارے میں فرمایا : یہ لوگ جہنم میں جائیں گے اور میں کوئی پرواہ نہیں کرتا ، پھر اللہ تعالیٰ نے ان لوگوں کو واپس سیدنا آدم علیہ السلام کی پشت میں رکھ دیا ، تو اب تک وہ اسی بنیاد پر نسل در نسل پیدا ہو رہے ہیں ۔ “
یہ روایت امام بزار نے نقل کی ہے ، امام طبرانی نے معجم کبیر اور مجم اوسط میں نقل کی ہے ، اس کی سند میں ایک راوی روح بن مسیب ہے ، یحیی بن معین کہتے ہیں : یہ کم درجہ کا صالح شخص ہے ، دیگر حضرات نے اسے ضعیف قرار دیا ہے ۔

سیدنا ابوسعید خدری رضی اللہ عنہ نبی اکرم صلی اللہ علیہ وسلم کے حوالے سے یہ بات نقل کرتے ہیں : اللہ تعالیٰ نے دونوں مٹھیوں کے بارے میں یہ فرمایا : یہ ( ایک مٹھی والے لوگ ) جنت میں جائیں گی اور میں کوئی پرواہ نہیں کرتا اور یہ ( دوسری مٹھی والے لوگ ) جہنم میں جائیں گی اور میں کوئی پرواہ نہیں کرتا ۔ “
یہ روایت امام بزار نے نقل کی ہے اور اس کے رجال صحیح کے رجال ہیں ، البتہ نمر بن ہلال کا معاملہ مختلف ہے اور ابوحاتم نے اُسے ثقہ قرار دیا ہے ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کے حوالے سے یہ بات نقل کرتے ہیں : ” اللہ تعالیٰ نے دو مٹھیوں کے بارے میں یہ فرمایا ہے : یہ لوگ اس ( یعنی جنت ) کے لئے ہیں اور یہ لوگ اس ( یعنی جہنم ) کے لئے ہیں ، نبی اکرم صلی اللہ علیہ وسلم نے ارشاد فرمایا : تو لوگ متفرق قسم کے ہو گئے اور تقدیر کے حکم کے حساب سے اُن میں اختلاف نہیں ہوا ( یعنی ہر ایک مخصوص قسم سے تعلق رکھتا ہے ) ۔ “
یہ روایت امام بزار نے اور امام طبرانی نے معجم صغیر میں نقل کی ہے ، امام بزار کے رجال صحیح کے رجال ہیں ۔

سیدنا ہشام بن حکیم بن حزام رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا ، اس نے عرض کی : یا رسول اللہ ! کیا ہم نئے سرے سے اعمال کرتے ہیں ؟ یا یہ طے شدہ تقدیر کے مطابق ہیں ؟ تو نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ نے سیدنا آدم علیہ السلام کی پشت میں سے اُن کی اولاد کو نکالا اور پھر انہیں اپنی ذات کے بارے میں گواہ بنایا اور پھر انہیں اپنے دونوں ہاتھوں میں رکھا ( راوی کو شک ہے ، شاید یہ الفاظ ہیں : ) اپنی ہتھیلی پر رکھا اور فرمایا : یہ لوگ جنت میں جائیں گے اور یہ ( دوسرے ) لوگ جہنم میں جائیں گے ، جہاں تک اہل جنت کا تعلق ہے ، تو ان کے لئے اہل جنت کے عمل کو آسان کر دیا جائے گا ، اور جہاں تک اہل جہنم کا تعلق ہے ، تو ان کے لئے اہل جہنم کے عمل کو آسان کر دیا جائے گا ۔ “
یہ روایت امام بزار اور امام طبرانی نے نقل کی ہے ، اس کی سند میں ایک راوی بقیہ بن ولید ہے اور وہ ضعیف ہے ، اس کی نقل کردہ حدیث کو شواہد کی کثرت کی وجہ سے حسن قرار دیا گیا ہے اور امام طبرانی کی سند حسن ہے ۔

سیدنا معاذ بن جبل رضی اللہ عنہ کے بارے میں یہ بات منقول ہے : جب اُن کی موت کا وقت قریب آیا ، تو وہ رونے لگے ، ان کے ساتھی نے ان سے کہا: آپ کیوں رو رہے ہیں ؟ تو انہوں نے کہا: اللہ کی قسم ! میں موت کی گھبراہٹ کی وجہ سے نہیں رو رہا ہوں اور نہ ہی دنیا کو اپنے پیچھے چھوڑنے کی وجہ سے رو رہا ہوں ، لیکن میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اس کی دو مٹھیاں تھیں ، ایک مٹھی ( کے لوگوں ) نے جہنم میں جانا ہے اور ایک ( یعنی دوسری ) مٹھی ( کے لوگوں ) نے جنت میں جانا ہے ۔ “ سیدنا معاذ بن جبل رضی اللہ عنہ نے فرمایا : اب مجھے نہیں معلوم کہ میں اُن دونوں میں سے کون سی مٹھی میں ہوؤں گا ۔
یہ روایت امام طبرانی نے نقل کی ہے ، اس کی سند میں ایک راوی براء بن عبداللہ غنوی ہے اور وہ ضعیف ہے اور حسن نامی راوی نے سیدنا معاذ رضی اللہ عنہ کا زمانہ نہیں پایا ہے ۔

سیدنا معاویہ رضی اللہ عنہ ، جو نبی اکرم صلی اللہ علیہ وسلم کے حوالے سے کم احادیث نقل کرتے ہیں : وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ نے سیدنا آدم علیہ السلام کی ذریت کو اُن کی پشت سے نکالا ، یہاں تک کہ اُن لوگوں نے زمین کو بھر دیا ، اور وہ لوگ اس طرح تھے ۔ ۔ ۔ ۔ ۔ ۔ ۔ ۔ “ ۔ یہاں جعفر نامی راوی نے اپنے دونوں ہاتھوں میں سے ایک کو دوسرے کے ساتھ ملا لیا ۔
یہ روایت امام طبرانی نے نقل کی ہے ، اس کی سند میں ایک راوی جعفر بن زبیر ہے اور وہ متروک ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم تشریف لائے ، آپ نے اپنا دایاں ہاتھ پھیلایا اور ارشاد فرمایا : ” اللہ تعالیٰ کے نام سے برکت حاصل کرتے ہوئے ، جو بڑا مہربان نہایت رحم کرنے والا ہے ، یہ اللہ تعالیٰ کی طرف سے تحریر ہے ، جو بڑا مہربان ، نہایت رحم والا ہے ، اس میں اہل جنت کے اُن کے آباء و اجداد ، ان کے قبیلوں اور خاندانوں کے نام ہیں ، ان میں سے کوئی اضافہ نہیں ہو گا ، اور اُن میں کوئی کمی نہیں ہو گی ۔ “ پھر آپ صلی اللہ علیہ وسلم نے اپنا بایاں ہاتھ پھیلایا اور ارشاد فرمایا : ” اللہ تعالیٰ کے نام سے برکت حاصل کرتے ہوئے ، جو بڑا مہربان ، نہایت رحم کرنے والا ہے ، یہ رحمان اور رحیم کی طرف سے تحریر ہے ، جو اہل جہنم کے لئے ہے ، اس میں اُن کے نام اور ان کے آباء و اجداد ، ان کے قبیلوں اور ان کے خاندانوں کے نام ہیں ، ان میں کوئی اضافہ نہیں ہو گا اور ان میں کوئی کمی نہیں ہو گی ۔ “
یہ روایت امام طبرانی نے ابن مجاہد کی اس کے والد سے نقل کردہ روایت کے طور پر نقل کی ہے ، میں ابن مجاہد سے واقف نہیں ہوں اور اس روایت کے بقیہ رجال صحیح کے رجال ہیں ۔

سیدنا عبدالله بن بسر رضی اللہ عنہ بیان کرتے ہیں : نبی اکرم صلی اللہ علیہ وسلم نے ہمیں خطبہ دیتے ہوئے ، اپنا دایاں ہاتھ پھیلایا ، پھر آپ صلی اللہ علیہ وسلم نے اس مٹھی کو بند کیا اور ارشاد فرمایا : ” اس میں اہل جنت کے نام اُن کے آباؤ اجداد ، ان کے قبیلوں کے نام ہیں ، ان میں قیامت کے دن تک کوئی اضافہ نہیں ہو گا اور کوئی کمی نہیں ہو گی ، پھر آپ نے اپنا بایاں ہاتھ پھیلایا ، پھر آپ نے اسے بند کیا اور فرمایا : یہ اہل جہنم کے نام ہیں ، ان کے آباؤ اجداد کے نام ہیں ، ان کے قبیلوں کے نام ہیں ، قیامت کے دن تک ان میں کوئی اضافہ نہیں ہو گا اور کوئی کمی نہیں ہو گی ، سعادت والے ( کچھ ) لوگوں کو بدنصیب لوگوں کے راستے پر چلایا جاتا ہے ، یہاں تک کہ یہ کہا: جاتا ہے : یہ ان ( بدنصیب لوگوں ) میں سے ایک ہے ، حالانکہ وہ ان ( دوسروں یعنی خوش نصیب لوگوں ) میں سے ہوتے ہیں ، پھر انہیں سعادت لاحق ہو جاتی ہے اور وہ انہیں بدنصیبی کے راستے سے نکال دیتی ہے ، اسی طرح بدنصیب لوگوں سے تعلق رکھنے والا ایک شخص کو سعادت کے راستے پر چلایا جاتا ہے ، یہاں تک کہ یہ کہا: جاتا ہے : یہ ان ( یعنی خوش نصیب لوگوں ) میں سے ہے ، لیکن وہ اُن دوسروں ( یعنی بدنصیب لوگوں ) میں سے ہوتا ہے ، بدنصیبی اسے لاحق ہوتی ہے اور اُسے سعادت کے راستے سے نکال دیتی ہے ۔ “ نبی اکرم صلی اللہ علیہ وسلم نے ارشاد فرمایا : ” ہر ایک کے لئے وہ چیز آسان ہو جاتی ہے ، جس کے لئے اُسے پیدا کیا گیا ہو ۔ “
یہ روایت امام طبرانی نے نقل کی ہے ، اس کی سند میں ایک راوی عبدالرحمن بن ایوب سکونی ہے ، اس نے اس کے علاوہ بھی روایات نقل کی ہیں ، اس کے بارے میں عقیلی نے کہا: ہے : اس کی نقل کردہ حدیث کی متابعت نہیں کی گئی ہے ، امام ذہبی نے اپنی طرف سے اسے ضعیف قرار دیا ہے ، اس روایت کی سند میں ایک راوی بقیہ ہے اور اس کے بارے میں اس حدیث کے علاوہ بھی کلام کیا گیا ہے ۔

سیدنا براء بن عازب رضی اللہ عنہ بیان کرتے ہیں : ایک دن نبی اکرم صلی اللہ علیہ وسلم تشریف لائے ، آپ کے دونوں ہاتھوں میں دو صحیفے تھے ، آپ صلی اللہ علیہ وسلم نے ان دونوں کی طرف دیکھا اور اپنے اصحاب سے ارشاد فرمایا : اللہ کی قسم ! اللہ کا نبی ، اُمّی ہے ، وہ نہ پڑھتا ہے اور نہ لکھتا ہے ، پھر نبی اکرم صلی اللہ علیہ وسلم ان لوگوں کے قریب ہوئے ، آپ نے اپنے ہاتھ میں موجود چیز کو پھیلایا اور فرمایا ( اس میں یہ تحریر ہے : ) ” اللہ تعالیٰ کے نام سے برکت حاصل کرتے ہوئے جو بڑا مہربان ، نہایت رحم کرنے والا ہے ، یہ رحمان و رحیم کی طرف سے تحریر ہے ، اس میں اہل جنت کے ، اُن کے آباؤ اجداد اور ان کے خاندانوں کے نام ہیں ، یہ ان کے بارے میں متعین ہے ، اس کے آخر میں کوئی اضافہ نہیں ہو گا ، یہ ایک ایسی چیز ہے ، جس کے حوالے سے تمہارا پروردگار فارغ ہو چکا ہے ۔ “ پھر نبی اکرم صلی اللہ علیہ وسلم نے دوسرے ہاتھ میں موجود چیز کے بارے میں اہل جہنم کے لئے بھی اس کی مانند کلمات ارشاد فرمائے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ہذیل بن بلال ہے اور وہ ضعیف ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بے شک اللہ تعالیٰ نے جنت کو پیدا کیا ہے اور اس کے لئے اہل ، افراد کو پیدا کیا ہے ، جس میں اُن کے خاندانوں اور ان کے ( قبائل کا بھی تعین کیا گیا ہے ) ان لوگوں میں کوئی اضافہ نہیں ہو گا اور ان میں کوئی کمی نہیں ہو گی ، اُس نے جہنم کو پیدا کیا ہے اور اس کے لئے اہل افراد پیدا کئے ہیں ، جو ان کے خاندان اور قبائل ( کے نام کے ساتھ متعین ہیں ) ان میں سے کوئی اضافہ نہیں ہو گا اور ان میں کوئی کمی نہیں ہو گی ، ایک صاحب نے عرض کی : یا رسول اللہ ! پھر عمل کیوں کیا جائے ؟ نبی اکرم صلی اللہ علیہ وسلم نے فرمایا : ” تم عمل کرو ! کیونکہ ہر ایک کے لئے وہ چیز آسان کر دی جاتی ہے ، جس کے لئے اسے پیدا کیا گیا ہو ۔ “
یہ روایت امام طبرانی نے معجم صغیر اور معجم اوسط میں نقل کی ہے ، اس کی سند میں ایک راوی بکار بن محمد سیرینی ہے ، جسے یحیی بن معین نے ثقہ قرار دیا ہے اور جمہور نے اسے ضعیف کہا: ہے ، عباد بن علی سیرینی کو ازدی نے ضعیف قرار دیا ہے ۔ ( علامہ ہیثمی فرماتے ہیں : ) میں یہ کہتا ہوں : اس نوعیت کی احادیث اس باب میں آئیں گی ، جس میں یہ مذکور ہے کہ ہر ایک کے لئے وہ چیز آسان کر دی جاتی ہے ، جس کے لئے اُسے پیدا کیا گیا ہو ۔

سیدنا عبداللہ بن عمر رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اس قبیلے قریش کے لوگ مسلسل امن کی حالت میں رہیں گے ، یہاں تک کہ ان لوگوں کو ان کے دین سے وہ لوگ موڑ دیں گے جو ہمارے برابر کے رشتہ دار ہوں گے ، راوی کہتے ہیں : ایک صاحب نبی اکرم صلی اللہ علیہ وسلم کے سامنے کھڑے ہوئے ، انہوں نے عرض کی : یا رسول اللہ ! کیا میں جنت میں جاؤں گا یا جہنم میں جاؤں گا ؟ نبی اکرم صلی اللہ علیہ وسلم نے فرمایا : جنت میں جاؤ گے ، راوی کہتے ہیں : پھر دوسرے صاحب آپ کے سامنے کھڑے ہوئے ، انہوں نے عرض کی : کیا میں جنت میں جاؤں گا یا جہنم میں جاؤں گا ؟ نبی اکرم صلی اللہ علیہ وسلم نے فرمایا : جہنم میں جاؤ گے ، پھر نبی اکرم صلی اللہ علیہ وسلم نے ارشاد فرمایا : ” جب تک میں تمہیں کوئی بات بیان نہ کروں ، تم بھی میرے حوالے سے خاموش رہو ، اگر اس بات کا اندیشہ نہ ہوتا کہ تم لوگ ایک دوسرے کو دفن کرنا چھوڑ دو گے ، تو میں تمہیں اہل جہنم کی مخصوص نشانی بتاتا ، یہاں تک کہ موت کے وقت تم اُن لوگوں کو پہچان لیتے اور اگر مجھے حکم دیا گیا کہ میں ایسا کروں ، تو میں ایسا کر لوں گا ۔ “
یہ روایت امام ابویعلیٰ نے نقل کی ہے ، اس کی سند میں ایک راوی لیث بن ابوسلیم ہے اور وہ مدلس ہے ، اس روایت کے بقیہ رجال ثقہ ہیں ۔

سیدنا انس رضی اللہ عنہ بیان کرتے ہیں : ایک دن نبی اکرم صلی اللہ علیہ وسلم غصے کے عالم میں تشریف لائے ، آپ نے لوگوں کو خطبہ دیتے ہوئے ارشاد فرمایا : آج تم لوگ جس چیز کے بارے میں دریافت کرو گے ، میں تمہیں اس کے بارے میں بتا دوں گا ، راوی کہتے ہیں : ہم یہ سمجھ رہے تھے کہ سیدنا جبرائیل علیہ السلام آپ کے ساتھ ہیں ۔ ۔ ۔ ۔ ۔ ۔ ۔ ۔ ۔ ( علامہ ہیثمی فرماتے ہیں : ) میں یہ کہتا ہوں : اُس کے بعد انہوں نے پوری حدیث ذکر کی ہے ، جس میں آگے چل کر یہ الفاظ ہیں : سیدنا عمر رضی اللہ عنہ نے عرض کی : یا رسول اللہ ! ہم ایسے لوگ ہیں ، جو زمانہ جاہلیت کے قریب ہیں ، تو آپ ہماری خرابیاں ہمارے سامنے ظاہر نہ کریں ، انہوں نے عرض کی : کیا آپ ہمارے پوشیدہ معاملات کے حوالے سے ہمیں رسوائی کا شکار کریں گے ؟ آپ درگزر سے کام لیں ، اللہ تعالیٰ آپ سے درگزر کرے ۔
یہ روایت امام ابویعلیٰ نے نقل کی ہے اور اس کے رجال صحیح کے رجال ہیں ۔