مجمع الزوائد ومنبع الفوائد

سیدنا عقبہ بن عامر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ کی کتاب کا علم حاصل کرو ، اور اس کا دھیان رکھو ، اسے اچھی طرح سے پڑھو ، اُس ذات کی قسم ! جس کے دست قدرت میں میری جان ہے ، یہ اس سے زیادہ تیزی سے نکلتا ہے ، جتنی تیزی سے کوئی اونٹ رسی سے نکلتا ہے “ ۔
یہ روایت امام أحمد اور امام طبرانی نے نقل کی ہے ، تاہم انہوں نے یہ الفاظ نقل کیے ہیں : ” یہ اس سے زیادہ تیزی سے نکلتا ہے ، جتنی تیزی سے کوئی حاملہ اونٹنی رسی سے نکلتی ہے “ ۔ امام أحمد کے رجال صحیح کے رجال ہیں ۔

سیدنا انس بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” قرآن کا دھیان رکھو ! اس ذات کی قسم ! جس کے دست قدرت میں میری جان ہے ، یہ انسانوں کے سینے سے ، اس سے زیادہ تیزی سے نکلتا ہے ، جتنی تیزی سے بندھا ہوا ، اونٹ اپنے بیٹھنے کی جگہ کی طرف نکلتا ہے “ ۔
یہ روایت امام طبرانی نے معجم اوسط میں نقل کی ہے اور اس کے رجال ثقہ ہیں ، البتہ امام طبرانی کے استاد أحمد کا اسم منسوب بیان نہیں کیا گیا ، اگر تو وہ أحمد بن خلیل ہے تو پھر وہ ضعیف ہے اور اگر اس کے علاوہ کوئی اور ہے ، تو پھر میں اُس سے واقف نہیں ہوں ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” قرآن کا دھیان رکھو ! کیونکہ یہ انسانوں کے سینوں سے ، اس سے زیادہ تیزی سے نکلتا ہے ، جتنی تیزی سے پرندے اپنے گھونسلوں کی طرف جاتے ہیں “ ۔
یہ روایت امام طبرانی نے تینوں کتابوں میں نقل کی ہے ، تاہم معجم کبیر میں انہوں نے یہ الفاظ نقل کیے ہیں : ” قرآن کا دھیان رکھو ! کیونکہ یہ بدکنے والا ہے ۔ ۔ ۔ ۔ ۔ ۔ ۔ “ ۔ ( علامہ ہیثمی فرماتے ہیں : ) میں یہ کہتا ہوں
یہ روایت ” صحیح “ میں اس سیاق کے بغیر منقول ہے ۔ معجم صغیر اور معجم اوسط کے رجال ثقہ ہیں ۔