مجمع الزوائد ومنبع الفوائد

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم میں سے سب سے بہتر وہ ہے ، جو قرآن کا علم حاصل کرے اور اس کی تعلیم دے “ ۔
یہ روایت امام طبرانی نے معجم صغیر میں نقل کی ہے اس کی سند میں ایک راوی محمد بن سنان قزاز ہے ، جسے امام دارقطنی رحمہ اللہ نے ثقہ قرار دیا ہے اور ایک جماعت نے اسے ضعیف کہا: ہے ۔

سیدنا عبداللہ بن مسعود رضی اللہ عنہ ” مرفوع “ حدیث کے طور پر یہ بات نقل کرتے ہیں ( نبی اکرم صلی اللہ علیہ وسلم نے ارشاد فرمایا ہے : ) ” تم میں سب سے بہتر وہ شخص ہے ، جو قرآن پڑھے اور پڑھائے “ ۔
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی شریک اور ایک راوی عاصم ہے ، یہ دونوں ثقہ ہیں اور ان دونوں میں ضعف پایا جاتا ہے ۔

کلیب بن شہاب بیان کرتے ہیں : سیدنا علی بن ابوطالب رضی اللہ عنہ نے مسجد میں گونج کی آواز سنی ، لوگ قرآن پڑھ رہے تھے اور پڑھا رہے تھے ، تو سیدنا علی رضی اللہ عنہ نے فرمایا : ان لوگوں کے لئے مبارکباد ہے ! یہ لوگ اللہ کے رسول صلی اللہ علیہ وسلم کے نزدیک ، سب سے زیادہ پسندیدہ تھے ۔
یہ روایت امام طبرانی نے معجم اوسط میں نقل کی ہے اور امام بزار نے اس کی مانند نقل کی ہے ، امام طبرانی کی سند میں ایک راوی حفص بن سلیمان غاضری ہے اور وہ متروک ہے ، ایک روایت کے مطابق امام أحمد نے اسے ثقہ قرار دیا ہے اور دوسری روایت کے مطابق انہوں نے اسے ضعیف کہا: ہے ، امام أحمد کی سند میں ایک راوی اسحاق بن ابراہیم ثقفی ہے اور وہ ضعیف ہے ۔

سیدنا سعد بن جنادہ بیان کرتے ہیں : طائف کے رہنے والوں میں سے ، نبی اکرم صلی اللہ علیہ وسلم کی خدمت میں حاضر ہونے والا ، میں پہلا فرد تھا ، میں اپنے گھر والوں کے پاس سے صبح کے وقت نکلا تھا اور پھر میں عصر کے وقت منی آیا تھا ، میں پہاڑ پر چڑھا اور پھر میں اُترا ، پھر میں نبی اکرم صلی اللہ علیہ وسلم کی خدمت میں حاضر ہوا ، میں نے اسلام قبول کیا ، آپ نے مجھے سورت اخلاص ، سورت زلزال کی تعلیم دی اور آپ نے مجھے ان کلمات کی تعلیم دی : ” اللہ تعالیٰ کی ذات ہر عیب سے پاک ہے ، ہر طرح کی حمد ، اللہ تعالیٰ کے لئے مخصوص ہے اللہ تعالیٰ کے علاوہ اور کوئی معبود نہیں ہے اور اللہ تعالیٰ سب سے بڑا ہے “ ۔ نبی اکرم صلی اللہ علیہ وسلم نے فرمایا : ” یہ باقی رہ جانے والی نیکیاں ہیں “ ۔

ایک روایت میں یہ الفاظ ہیں : ” سورت کافرون کی تعلیم دی “ ۔
یہ روایت امام طبرانی نے نقل کی ہے ، اس کی سند میں ایک راوی حسین بن حسن عوفی ہے اور وہ ضعیف ہے ۔

سیدنا عبداللہ بن مسعود رضی اللہ عنہ کے بارے میں یہ بات منقول ہے : وہ کسی شخص کو ایک آیت سکھاتے تھے پھر یہ فرماتے تھے : یہ آیت ( سیکھنا ) ہر اس چیز سے زیادہ بہتر ہے ، جس پر سورج طلوع ہوتا ہے اور ہر اس چیز سے زیادہ بہتر ہے ، جو بھی چیز زمین پر موجود ہے ، یہاں تک کہ سیدنا عبداللہ رضی اللہ عنہ پورے قرآن کے بارے میں یہی بات کہا: کرتے تھے ۔

ایک روایت میں یہ الفاظ ہیں : سیدنا عبداللہ بن مسعود رضی اللہ عنہ کے پاس صبح کے وقت لوگ ان کے گھر آتے تھے ، تو آپ فرماتے تھے : تم لوگ اپنی جگہ پر رہو ! پھر وہ ان لوگوں کے پاس سے گزرتے تھے ، جنہیں انہوں نے قرآن پڑھانا ہوتا تھا اور پھر آپ فرماتے تھے : اے فلاں ! تم کون سی سورت پر ہو ؟ وہ انہیں بتاتا تھا تو آپ دریافت کرتے تھے : کون سی آیت پر ہو ؟ پھر وہ اس کے بعد والی آیت اسے سکھاتے تھے اور پھر یہ فرماتے تھے : تم اسے سیکھ لو ! کیونکہ یہ تمہارے لئے ہر اُس چیز سے زیادہ بہتر ہے ، جو آسمان اور زمین کے درمیان موجود ہے ، راوی کہتے ہیں : تو آدمی یہ سمجھتا تھا کہ شاید قرآن میں اُس سے بہتر آیت اور کوئی نہیں ہے ، پھر وہ دوسرے شخص کے پاس سے گزرتے تھے ، تو اُسے بھی یہی بات کہتے تھے ، یہاں تک کہ وہ سب لوگوں سے یہی بات کہتے تھے ۔ یہ تمام روایات امام طبرانی نے نقل کی ہیں اور ان سب کے رجال ثقہ ہیں ، البتہ ایک روایت کے یہ الفاظ ہیں : کہ یہ ابوعبیدہ کے حوالے سے اُن کے والد سے منقول ہے اور ابوعبیدہ نے ، اپنے والد سے سماع نہیں کیا ہے ۔

ابواسحاق بیان کرتے ہیں : سیدنا عبداللہ بن مسعود رضی اللہ عنہ فرماتے ہیں : ” اگر تم میں سے کسی ایک شخص سے یہ کہا: جائے کہ : اگر تم صبح کے وقت بستی میں جاؤ ، تو تمہیں چار اونٹنیاں ملیں گی ، تو وہ شخص کہے گا : صبح کب ہو گی اور میں کب جاؤں گا ؟ تو اگر کوئی شخص صبح کے وقت جا کر ، اللہ کی کتاب کی ایک آیت کا علم حاصل کر لے ، تو یہ اس کے لئے چار اور مزید چار اور مزید چار ، یہاں تک کہ انہوں نے بہت سی تعداد گنوا کر فرمایا ( کہ اس سے بھی زیادہ اونٹنیاں ملنے سے بھی ) زیادہ بہتر ہے “ ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ، البتہ ابواسحاق نے سیدنا عبداللہ بن مسعود رضی اللہ عنہ سے سماع نہیں کیا ہے ۔