مجمع الزوائد ومنبع الفوائد

سیدنا ابودرداء رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ” ان میں سے کچھ لوگ ، اپنے اوپر ظلم کرنے والے ہیں ، اور ان میں سے کچھ لوگ میانہ روی اختیار کرنے والے ہیں ، اور ان میں سے کچھ لوگ ، اللہ کے اذن کے تحت بھلائی میں سبقت لے جانے والے ہیں “ ۔ ( نبی اکرم صلی اللہ علیہ وسلم نے ارشاد فرمایا : ) جہاں تک اُن لوگوں کا تعلق ہے ، جو سبقت لے جانے والے ہیں ، تو یہ وہ لوگ ہیں ، جو کسی حساب کے بغیر جنت میں داخل ہوں گے ، جہاں تک ان لوگوں کا تعلق ہے ، جو میانہ روی اختیار کرنے والے ہیں ، تو یہ وہ لوگ ہیں ، جن سے معمولی سا حساب لیا جائے گا ، اور جہاں تک اُن لوگوں کا تعلق ہے ، جو اپنے اوپر ظلم کرنے والے ہیں ، تو یہ وہ لوگ ہیں ، جنہوں نے اپنے اوپر ظلم کیا ، یہ میدان محشر میں موجود رہیں گے ، پھر اللہ تعالیٰ اپنی رحمت کے ساتھ ان سے ملاقات کرے گا اور یہی وہ لوگ ہیں جو یہ کہیں گے : ” ہر طرح کی حمد ، اللہ تعالیٰ کے لئے مخصوص ہے ، جس نے ہم سے پریشانی کو دور کر دیا ، بے شک ہمارا پروردگار مغفرت کرنے والا ، شکر کو قبول کرنے والا ہے ، جس نے اپنے فضل کے تحت ، قیام کی جگہ کو ہمارے لئے حلال قرار دیا ، جہاں ہمیں کوئی پریشانی لاحق نہیں ہوتی اور کوئی شور غوغا نہیں ہوتا “ ۔
یہ روایت امام أحمد نے مختلف اسانید کے ساتھ نقل کی ہے ، جن میں سے ایک کے رجال صحیح کے رجال ہیں ، اور وہ یہی روایت ہے ، اگر علی بن عبداللہ ازدی نے سیدنا ابودرداء رضی اللہ عنہ سے سماع کیا ہو ، ویسے وہ شخص تابعی ہے ۔

علی بن عبدالله ازدی نے ، شامی نامی راوی کے حوالے سے یہ بات نقل کی ہے : وہ نبی اکرم صلی اللہ علیہ وسلم کی مسجد میں داخل ہوئے اور وہاں انہوں نے دو رکعت ادا کیں اور یہ دعا کی : ” اے اللہ ! میری وحشت میں غمخوار دیدے ، میری غریب الوطنی پر رحم فرما ، اور میرے اکیلے پن کے ساتھ کسی کو ملا دے اور مجھے ایسا نیک شخص عطا فرما دے ، جس کے ذریعے تو مجھے نفع دے “ ۔ تو اُس شخص کے پہلو میں ایک صاحب موجود تھے ، جب وہ شخص دعا کر کے فارغ ہوا ، تو اس شامی نے کہا: آپ کون ہیں ؟ تو ان صاحب نے کہا: ابودرداء ، انہوں نے کہا: میں نے جو چیز دیکھی ہے تم نے ایسا کیوں کیا ؟ تو انہوں نے اپنی دعا کے بارے میں بتایا تو انہوں نے فرمایا : اگر تم سچے ہو ، تو میں تمہاری دعا کے حوالے سے تم سے زیادہ سعادت مند ہوں ، کیا میں تمہیں ایک حدیث نہ بیان کروں ؟ جو میں تمہیں تحفے کے طور پر دوں گا ، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اللہ تعالیٰ نے یہ ارشاد فرمایا ہے : ” پھر ہم نے کتاب کا وارث اُن لوگوں کو بنایا ، جنہیں ہم نے اپنے بندوں میں سے منتخب کر لیا تھا “ ۔ ( نبی اکرم صلی اللہ علیہ وسلم نے فرمایا : ) وہ لوگ جو سبقت لے جانے والے ہیں ، تو یہ وہ لوگ ہیں ، جو کسی حساب کے بغیر جنت میں داخل ہوں گے ۔ ۔ ۔ ۔ ۔ ۔ ۔ ۔ “ ۔ اس کے بعد راوی نے حسب سابق حدیث ذکر کی ہے ۔
یہ روایت امام طبرانی نے نقل کی ہے ، امام أحمد نے اختصار کے ساتھ نقل کی ہے اور انہوں نے یہ کہا: ہے : یہ اعمش کے حوالے سے ثابت ، یا ابوثابت سے منقول ہے : ” ایک شخص مسجد میں ، یعنی مسجد دمشق میں داخل ہوا ۔ ۔ ۔ ۔ ۔ ۔ ۔ “ اس کے بعد راوی نے پوری حدیث اختصار کے ساتھ نقل کی ہے انہوں نے اس میں یہ ذکر نہیں کیا کہ اللہ تعالیٰ کے حوالے سے بھی کچھ منقول ہے اور اس میں ایک راوی ثابت بن عبید ہے ، اس سے پہلے کے رجال صحیح کے رجال ہیں ، امام طبرانی کی سند میں ایک راوی ایسا ہے ، جس کا نام بیان نہیں کیا گیا ہے ۔

سیدنا ابودرداء بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ( ارشاد باری تعالی ہے : ) ” اور ان میں سے کچھ لوگ اپنے اوپر ظلم کرنے والے ہیں ، اور ان میں سے کچھ میانہ روی اختیار کرنے والے ہیں ، اور ان میں سے کچھ بھلائی کی طرف سبقت لے جانے والے ہیں “ نبی اکرم صلی اللہ علیہ وسلم نے ارشاد فرمایا : ” بھلائی کی طرف سبقت لے جانے والے اور میانہ روی اختیار کرنے والے لوگ ، کسی حساب کے بغیر جنت میں داخل ہوں گے ، اور اپنے اوپر ظلم کرنے والوں سے معمولی سا حساب لیا جائے گا ، اور پھر انہیں بھی جنت میں داخل کر دیا جائے گا “ ۔
یہ روایت امام طبرانی نے اعمش کے حوالے سے ایک شخص سے نقل کی ہے ، جس کا نام انہوں نے بیان کیا تھا ، اگر وہ ثابت بن عمیر انصاری ہے ، جیسا کہ امام أحمد کے حوالے سے پہلے گزر چکا ہے ، تو پھر امام طبرانی کے رجال صحیح کے رجال ہیں ۔

سیدنا عوف بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” میری امت تین قسم کی ہو گی ، ایک تہائی لوگ جنت میں کسی حساب کے بغیر داخل ہوں گے ، ایک تہائی لوگوں سے معمولی حساب لیا جائے گا ، پھر وہ جنت میں داخل ہو جائیں گے ، اور ایک تہائی لوگ وہ ہوں گے جن کی تحقیق اور تفتیش کی جائے گی ، پھر فرشتے آئیں گے ، اور یہ کہیں گے : کہ ہم نے ان لوگوں کو پایا ہے کہ وہ یہ کہتے ہیں کہ اللہ تعالیٰ کے علاوہ اور کوئی معبود نہیں ہے ، صرف وہی ایک معبود ہے ، تو اللہ تعالیٰ فرمائے گا : یہ لوگ کیا کہتے ہیں ، میرے علاوہ اور کوئی معبود نہیں ہے ، تم لوگ انہیں جنت میں داخل کر دو ! جو ان کے یہ کہنے کی وجہ سے ہو گا کہ اللہ تعالیٰ کے علاوہ اور کوئی معبود نہیں ہے ، صرف وہی معبود ہے اور تم لوگ اُن کی خطائیں ، جھٹلانے والوں کے ذمہ ڈال دو ، ( نبی اکرم صلی اللہ علیہ وسلم فرماتے ہیں : ) تو اسی بات کا ذکر اللہ تعالیٰ نے ان الفاظ میں کیا ہے : ” اور وہ لوگ ضرور اپنا بوجھ اٹھائیں گے اور ( ان کے ) اپنے بوجھ کے ہمراہ مزید بوجھ بھی ہو گا “ ۔ اور اس کی تصدیق اس چیز میں ہوتی ہے ، جس میں فرشتوں کا ذکر کیا گیا ہے اور اس میں اللہ تعالیٰ نے یہ فرمایا ہے : ” پھر ہم نے کتاب کا وارث ان لوگوں کو کر دیا ، جنہیں ہم نے اپنے بندوں میں سے منتخب کیا تھا “ ۔ تو اللہ تعالیٰ ان لوگوں کو تین حصوں میں بنا دے گا اور وہ حصے یہ ہوں گے : ” ان میں سے کچھ لوگ وہ ہیں ، جو اپنے اوپر ظلم کرنے والے ہیں “ تو یہ وہ قسم ہے جن سے تحقیق اور تفتیش کی جائے گی ۔ ” اور ان میں سے کچھ لوگ میانہ روی اختیار کرنے والے ہیں “ ۔ یہ وہ لوگ ہیں ، جن سے آسانی سے حساب لیا جائے گا ۔ ” اور ان میں سے کچھ لوگ ، بھلائی کی طرف سبقت لے جانے والے ہیں “ ۔ تو یہ وہ لوگ ہیں ، جو کسی حساب اور عذاب کے بغیر جنت میں داخل ہو جائیں گے ۔ ” اللہ تعالیٰ کے حکم کے تحت “ ۔ یعنی وہ سب لوگ ، اللہ تعالیٰ کے حکم کے تحت جنت میں داخل ہوں گے ، اُن کے درمیان کوئی فرق نہیں ہو گا ( ارشاد باری تعالیٰ ہے : ) ” اس ( جنت ) میں انہیں سونے اور موتیوں سے بنے ہوئے کنگن پہنائے جائیں گے اور اُس ( جنت ) میں ان کا لباس ریشم کا ہو گا اور وہ یہ کہیں گے : ہر طرح کی حمد ، اللہ تعالیٰ کے لئے مخصوص ہے ، جس نے ہم سے پریشانی کو دور کر دیا ہے ، بے شک ہمارا پروردگار ، مغفرت کرنے والا اور شکر کو قبول کرنے والا ہے ، جس نے اپنے فضل کے تحت ( دائمی ) قیام کے مقام میں ، ہمیں ٹھہرایا ہے جہاں ہمیں کوئی تھکاوٹ اور تکلیف لاحق نہیں ہو گی ، اور جن لوگوں نے کفر کیا ان کے لئے جہنم کی آگ ہو گی اُن کے بارے میں فیصلہ نہیں دیا جائے گا کہ وہ مر جائیں ، اور اُن کے عذاب میں تخفیف بھی نہیں ہو گی ، اسی طرح ہم ہر منکر کو جزا دیتے ہیں “ ۔
یہ روایت امام طبرانی نے نقل کی ہے ، اس کی سند میں ایک راوی سلامہ بن روح ہے ، جسے ابن حبان نے ثقہ قرار دیا ہے اور ایک جماعت نے اسے ضعیف کہا: ہے ، اس روایت کے بقیہ رجال ثقہ ہیں ۔

سیدنا اسامہ بن زید رضی اللہ عنہ بیان کرتے ہیں : ( ارشاد باری تعالیٰ ہے : ) ” ان میں سے کچھ لوگ ، اپنے اوپر ظلم کرنے والے ہیں اور ان میں سے کچھ لوگ میانہ روی اختیار کرنے والے ہیں “ ۔ نبی اکرم صلی اللہ علیہ وسلم نے ارشاد فرمایا : ” ان سب لوگوں کا تعلق ، اس امت سے ہو گا “ ۔
یہ روایت امام طبرانی نے نقل کی ہے ، اس روایت کی سند میں ایک راوی محمد بن عبدالرحمن بن ابولیلی ہے اور وہ خراب حافظے کا مالک ہے ۔

عقبہ بن صہبان بیان کرتے ہیں : میں نے سیدہ عائشہ رضی اللہ عنہا کی خدمت میں گزارش کی ، اللہ تعالیٰ کے اس فرمان کے بارے میں آپ کی کیا رائے ہے ؟ ” پھر ہم نے کتاب کا وارث ، اُن لوگوں کو بنا دیا ، جنہیں ہم نے اپنے بندوں میں سے منتخب کیا تھا ، ان میں سے کچھ لوگ اپنے اوپر ظلم کرنے والے ہیں ، ان میں سے کچھ لوگ میانہ روی اختیار کرنے والے ہیں ، ان میں سے کچھ لوگ اللہ کے حکم کے تحت بھلائی کی طرف سبقت لے جانے والے ہیں “ ۔ سیدہ عائشہ رضی اللہ عنہا نے فرمایا : جہاں تک سبقت لے جانے والوں کا تعلق ہے ، تو وہ لوگ نبی اکرم صلی اللہ علیہ وسلم کی زندگی میں گزر چکے ہیں اور نبی اکرم صلی اللہ علیہ وسلم نے اُن کے حق میں جنت کی گواہی دی ہے ۔ جہاں تک میانہ روی اختیار کرنے والوں کا تعلق ہے تو یہ وہ لوگ ہیں ، جو ان حضرات کی پیروی کریں گے اور اُن کے اعمال کی مانند عمل کر کے اُن لوگوں کے ساتھ مل جائیں گے ۔ اور جہاں تک اپنے اوپر ظلم کرنے والوں کا تعلق ہے ، تو وہ میرے تمہارے جیسے اور ہمارے پیرو کار قسم کے لوگ ہیں ، لیکن یہ سب جنت میں جائیں گے ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی صلت بن دینار ہے اور وہ متروک ہے ۔