مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : ایک شخص نے نبی اکرم صلی اللہ علیہ وسلم سے ” سبا “ کے بارے میں دریافت کیا کہ اس سے مراد کیا ہے ؟ کیا یہ کوئی مرد ہے ؟ یا عورت ہے ؟ یا سرزمین ہے ؟ نبی اکرم صلی اللہ علیہ وسلم نے فرمایا : جی نہیں ! بلکہ یہ مرد ہے ، جس کے ہاں دس بیٹے پیدا ہوئے تھے ، ان میں سے چھ نے یمن میں سکونت اختیار کی ، اور ان میں سے چار نے شام میں سکونت اختیار کی ، جہاں تک یمنی بیٹوں کا تعلق ہے تو وہ یہ ہیں : مذحج ، کنده ، ازد ، اشعریون ، انمار اور حمیر ، یہ سب عرب ہیں ، جہاں تک شامی بیٹوں کا تعلق ہے ، تو وہ یہ ہیں لخم ، جذام ، عاملہ اور غسان ۔
یہ روایت امام أحمد نے اور امام طبرانی نے نقل کی ہے اس کی سند میں ایک راوی ابن لہیعہ ہے اور اس میں ضعف پایا جاتا ہے ، ان دونوں کے بقیہ رجال ثقہ ہیں ۔

سیدنا یزید بن حصین سلمی رضی اللہ عنہ بیان کرتے ہیں : ایک شخص نے عرض کی : یا رسول اللہ ! سبا سے مراد کیا ہے ؟ کیا یہ کوئی نبی تھا ؟ یا کوئی عورت ہے ؟ نبی اکرم صلی اللہ علیہ وسلم نے فرمایا : یہ عربوں سے تعلق رکھنے والا ایک شخص تھا ، اس نے دریافت کیا : اس کے کتنے بچے تھے ؟ نبی اکرم صلی اللہ علیہ وسلم نے بتایا : اس کے دس بچے تھے ، جن میں سے چھ نے یمن میں سکونت اختیار کی ، اور چار نے شام میں سکونت اختیار کی ، جو لوگ یمن میں رہے ، ان کے نام یہ ہیں : کندہ ، مذحج ، ازد ، اشعریون ، انمار اور حمیر ، اور شام میں جو رہے اُن کے نام یہ ہیں : لخم ، جذام ، عاملہ اور غسان ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ، صرف امام طبرانی کے استاد علی بن حسن بن صالح صائغ کا معاملہ مختلف ہے اور میں ان سے واقف نہیں ہوں ۔