مجمع الزوائد ومنبع الفوائد

ابوخلف ، جو بنوجمع کے آزاد کردہ غلام ہیں وہ بیان کرتے ہیں : وہ عبید بن عمیر کے ساتھ سیدہ عائشہ رضی اللہ عنہا کی خدمت میں زمزم کے چبوترے کے پاس حاضر ہوئے اس کے علاوہ مسجد میں کوئی سایہ والی جگہ نہیں تھی سیدہ عائشہ رضی اللہ عنہا نے فرمایا : اے ابوعاصم یعنی انہوں نے عبید بن عمر سے یہ کہا: تمہیں خوش آمدید ہے تم ہم سے ملنے کے لئے کیوں نہیں آئے یا پھر تم ہم سے ناراض ہو ؟ انہوں نے عرض کی : مجھے یہ اندیشہ تھا کہ کہیں میں آپ کو اکتاہٹ کا شکار نہ کر دوں سیدہ عائشہ رضی اللہ عنہا نے فرمایا : تم ایسے نہیں ہو عبید بن عمیر نے عرض کی : میں آپ کے پاس ایک آیت کے سلسلے میں پوچھنے کے لئے حاضر ہوا ہوں جو اللہ کی کتاب میں موجود ہے نبی اکرم صلی اللہ علیہ وسلم اسے کیسے تلاوت کرتے تھے ؟ سیدہ عائشہ رضی اللہ عنہا نے دریافت کیا کون سی آیت ہے ؟ انہوں نے یہ آیت پڑھی : ﴿( الَّذِينَ يُؤْتُونَ مَا أَتَوْا )﴾ یہ الفاظ یہ ہیں یا یہ ہیں : ﴿الَّذِينَ يَأْتُونَ مَا آتَوُا﴾ سیدہ عائشہ رضی اللہ عنہا نے دریافت کیا : تمہارے نزدیک ان دونوں میں کون سا زیادہ بہتر ہے ؟ میں نے کہا: اس ذات کی قسم ! جس کے دست قدرت میں ، میری جان ہے ان دونوں میں سے ایک میرے نزدیک دنیا اور اس میں موجود تمام چیزوں سے زیادہ محبوب ہے ، سیدہ عائشہ رضی اللہ عنہا نے فرمایا : ان دونوں میں سے کون سا ؟ انہوں نے کہا: یہ کلمات : ﴿الَّذِينَ يَأْتُونَ مَا آتَوُا﴾ سیدہ عائشہ رضی اللہ عنہا نے فرمایا : میں اس بات کی گواہی دیتی ہوں کہ نبی اکرم صلی اللہ علیہ وسلم بھی اس آیت کو اسی طرح پڑھا کرتے تھے اور یہ اسی طرح نازل ہوئی تھی ۔ ( راوی کو شک ہے شاید یہ الفاظ ہیں : ) سیدہ عائشہ رضی اللہ عنہا نے فرمایا : یہ اسی طرح نازل ہوئی تھی اور نبی اکرم صلی اللہ علیہ وسلم اسے اسی طرح پڑھا کرتے تھے ، لیکن ہجاء حرف ہے ۔
یہ روایت امام أحمد نے نقل کی ہے ۔ اس کی سند میں ایک راوی اسماعیل بن مسلم مکی ہے ، اور وہ ضعیف ہے ۔