مجمع الزوائد ومنبع الفوائد

سیدنا سہل بن سعد رضی اللہ عنہ بیان کرتے ہیں : نبی اکرم صلی اللہ علیہ وسلم کے زمانہ اقدس میں دو آدمیوں کے درمیان اس مسجد کے بارے میں اختلاف ہو گیا جس کی بنیاد تقوی پر رکھی گئی ہے ( اور جس کا ذکر قرآن میں ہے ) ان دو افراد میں سے ایک کا یہ کہنا تھا کہ اس سے مراد مسجد نبوی ہے ، اور دوسرے کا یہ کہنا تھا کہ اس سے مراد مسجد قباء ہے یہ دونوں حضرات نبی اکرم صلی اللہ علیہ وسلم کی خدمت میں حاضر ہوئے اور آپ سے اس بارے میں دریافت کیا تو نبی اکرم صلی اللہ علیہ وسلم نے فرمایا : اس سے مراد میری یہ مسجد ہے ۔

ایک روایت میں یہ الفاظ ہیں : نبی اکرم صلی اللہ علیہ وسلم سے جب اس مسجد کے بارے میں دریافت کیا گیا جس کی بنیاد تقوی پر رکھی گئی ہے ، تو آپ صلی اللہ علیہ وسلم نے فرمایا : اس سے مراد میری یہ مسجد ہے ۔ یہ تمام روایات امام أحمد نے نقل کی ہیں امام طبرانی نے انہیں اختصار کے ساتھ نقل کیا ہے ان دونوں روایات کے رجال صحیح کے رجال ہیں ۔

سیدنا زید بن ثابت رضی اللہ عنہ بیان کرتے ہیں : نبی اکرم صلی اللہ علیہ وسلم سے اس مسجد کے بارے میں دریافت کیا گیا جس کی بنیاد تقویٰ پر رکھی گئی تھی تو آپ صلی اللہ علیہ وسلم نے فرمایا : اس سے مراد میری یہ مسجد ہے ۔
یہ روایت امام طبرانی نے مرفوع اور موقوف دونوں طرح سے نقل کی ہے مرفوع روایت کی سند میں ایک راوی عبداللہ بن عامر اسلمی ہے ، اور وہ ضعیف ہے موقوف روایات کی اسناد میں سے ایک کے رجال صحیح کے رجال ہیں ، اور دوسرے طریق میں یہ الفاظ زائد ہیں : عروہ بن زبیر بیان کرتے ہیں : نبی اکرم صلی اللہ علیہ وسلم کی مسجد ، مسجد قباء سے بہتر ہے لیکن یہ آیت مسجد قباء کے بارے میں نازل ہوئی تھی ۔
( علامہ ہیثمی فرماتے ہیں : ) میں یہ کہتا ہوں : عروہ نے یہ بات ( شاید ) اس لئے کہی کیونکہ وہ مرفوع حدیث پر مطلع نہیں ہو سکے تھے باقی اللہ بہتر جانتا ہے ۔