مجمع الزوائد ومنبع الفوائد

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مجھ پر سورت انعام ایک ساتھ نازل ہوئی ہے ستر ہزار فرشتے اس کے ساتھ آئے تھے اور ( ان کی ) تسبیح اور تحمید کی آواز گونج رہی تھی “ ۔
یہ روایت امام طبرانی نے معجم صغیر میں نقل کی ہے ۔ اس کی سند میں ایک راوی یوسف بن عطیہ صفار ہے ، اور وہ ضعیف ہے ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” سورت انعام نازل ہوئی اس کے ساتھ فرشتوں کا ایک گروہ تھا ، جس نے زمین و آسمان کے درمیان کی جگہ کو بھرا ہوا تھا ان کی تسبیح و تقدیس کی آواز گونج رہی تھی نبی اکرم صلی اللہ علیہ وسلم نے فرمایا : ( وہ یہ پڑھ رہے تھے : ) ” اللہ تعالیٰ کی ذات ہر عیب سے پاک ہے جو عظمت والا ہے اللہ تعالیٰ کی ذات ہر عیب سے پاک ہے جو عظمت والا ہے “ ۔
یہ روایت امام طبرانی نے معجم اوسط میں اپنے استاد محمد بن عبداللہ بن عرس کے حوالے سے أحمد بن محمد بن ابوبکر سالمی سے نقل کی ہے ، اور میں ان دونوں سے واقف نہیں ہوں اس روایت کے بقیہ رجال ثقہ ہیں ۔

سیده اسماء بنت یزید رضی اللہ عنہا بیان کرتی ہیں : نبی اکرم صلی اللہ علیہ وسلم پر سورت انعام پوری ایک ساتھ نازل ہوئی تھی اور اس کے بوجھ کی وجہ سے قریب تھا کہ اونٹنی کی ہڈی ٹوٹ جاتی ۔
یہ روایت امام طبرانی نے نقل کی ہے ۔ اس کی سند میں ایک راوی شہر بن حوشب ہے ، اور وہ ضعیف ہے ویسے اس کی توثیق کی گئی ہے ۔