مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : شراب کی حرمت کا حکم انصار کے قبائل میں سے دو قبیلوں کے بارے میں نازل ہوا انہوں نے شراب پی جب وہ نشے میں دھت ہو گئے تو ایک دوسرے کے ساتھ فضول حرکتیں کرنے لگے جب انہیں ہوش آیا ، تو ایک شخص نے دیکھا کہ اس کے چہرے پر اور سر پر اور داڑھی پر نشان موجود ہیں تو اس نے کہا: میرے فلاں بھائی نے ایسا کیا ہے اللہ کی قسم ! اگر وہ میرے بارے میں مہربان اور رحم کرنے والا ہوتا تو وہ میرے ساتھ ایسا نہ کرتا ۔ راوی کہتے ہیں : وہ آپس میں بھائی بھائی تھے ان کے دلوں میں کوئی دشمنی نہیں تھی لیکن پھر ان کے دلوں میں اختلافات آ گئے تو اللہ تعالیٰ نے یہ آیت نازل کی : ” بے شک شراب اور جوا اور بت اور فال کے تیر شیطان کے عمل سے تعلق رکھنے والی ناپاک چیزیں ہیں تو تم ان سے اجتناب کرو تاکہ تم کامیابی حاصل کرو کیونکہ شیطان یہ چاہتا ہے کہ شراب اور جوئے کے حوالے سے تمہارے درمیان عداوت اور دشمنی پیدا کر دے اور تمہیں اللہ کے ذکر اور نماز سے روک دے ، تو کیا تم ( شراب اور جوئے وغیرہ سے ) باز آنے والے ہو “ ۔ تو کچھ لوگوں نے یہ کہا: یہ تو نا پاک چیز ہے ، اور یہ فلاں شخص کے پیٹ میں بھی موجود تھی جو غزوہ بدر کے دن شہید ہو گیا تھا اور فلاں شخص کے پیٹ میں بھی موجود تھی ، جو فلاں غزوہ کے موقع پر شہید ہو گیا تھا ، تو اللہ تعالیٰ نے اس بارے میں یہ آیت نازل کی : ” جو لوگ ایمان لائے اور انہوں نے نیک اعمال کیے ان پر اس حوالے سے کوئی گناہ نہیں ہو گا جو وہ پہلے کھا چکے ہوں ۔ ۔ ۔ ۔ ۔ ۔ ۔ “
یہ روایت امام طبرانی نے نقل کی ہے ، اور اس کے رجال صحیح کے رجال ہیں ۔ اس سے پہلے مشروبات سے متعلق باب میں اس نوعیت کی حدیث شراب کی حرمت سے متعلق باب میں گزر چکی ہے ۔

سیدنا عبدالله بن مسعود رضی اللہ عنہ بیان کرتے ہیں : جب شراب کی حرمت کا حکم نازل ہوا تو یہودیوں نے کہا: کیا تمہارے وہ بھائی جو فوت ہو چکے ہیں تو کیا وہ شراب نہیں پیا کرتے تھے ، تو اللہ تعالیٰ نے یہ آیت نازل کی : ” جو لوگ ایمان لائے اور انہوں نے نیک اعمال کیے ، تو انہوں نے جو کچھ کھایا ہے اس کے حوالے سے ان پر کوئی گناہ نہیں ہو گا “ ۔ نبی اکرم صلی اللہ علیہ وسلم فرماتے ہیں : تو مجھ سے کہا: گیا : تم ان میں سے ایک ہو ۔ علامہ ہیثمی فرماتے ہیں : ) میں یہ کہتا ہوں : ” صحیح “ میں اس کا کچھ حصہ مذکور ہے ۔
یہ روایت امام طبرانی نے نقل کی ہے ، اور اس کے رجال ثقہ ہیں ۔

سیدنا عبداللہ بن عمرو رضی اللہ عنہ فرماتے ہیں : یہ آیت قرآن میں موجود ہے ۔ ” اے ایمان والو ! بے شک شراب اور جوا اور بت اور فال کے تیر شیطان کے عمل سے تعلق رکھنے والی ناپاک چیزیں ہیں تم ان سے اجتناب کرو تاکہ تم کامیاب ہو جاؤ “ ۔ سیدنا عبداللہ بن عمرو رضی اللہ عنہ بیان کرتے ہیں : یہ آیت تورات میں بھی تھی اللہ تعالیٰ نے حق کو نازل کیا تاکہ اس کے ذریعے باطل کو ختم کر دے اور اس کے ذریعے لعب ، کنارات ( طنبورہ یا کھیلنے کی لکڑیاں ) مزامیر ، رقص ، آلات موسیقی ، شاعری کو کالعدم قرار دے دیں اور میرے پروردگار نے یہ قسم اٹھائی ہے کہ میں نے جب ان کو حرام قرار دے دیا تو اس کے بعد جو بھی بندہ اس کو پیئے گا ، تو میں اس کو پیاسا رکھوں گا اور جب میں نے اسے حرام قرار دے دیا تو اس کے بعد جو بھی بندہ اسے ترک کیے رکھے گا ۔ میں اسے حظیرة القدس میں سے پلاؤں گا ۔
یہ روایت امام طبرانی نے صحیح حدیث کے آخر میں نقل کی ہے جو اللہ تعالیٰ کے اس فرمان کے بارے میں ہے ( ارشاد باری تعالی ہے : ) ” بے شک ہم نے تمہیں گواہ بنا کے بھیجا ہے “ ۔ اس روایت کے رجال صحیح کے رجال ہیں ۔