مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : اللہ تعالیٰ نے یہ آیت نازل کی : ” اور جو لوگ اللہ تعالیٰ کے نازل کردہ کے مطابق فیصلہ نہیں دیتے ہیں تو یہی لوگ کافر ہیں “ ۔ ( اور پھر فرمایا : ) ” یہی لوگ ظالم ہیں “ ۔ ( اور پھر فرمایا : ) ” یہی لوگ فاسق ہیں “ ۔ راوی بیان کرتے ہیں : سیدنا عبداللہ بن عباس رضی اللہ عنہما نے یہ بات بیان کی کہ اللہ تعالیٰ نے یہ آیات یہودیوں کے دو گروہوں کے بارے میں نازل کی تھیں زمانہ جاہلیت میں ان میں سے ایک گروہ دوسرے گروہ پر غالب آ گیا پھر ان کے درمیان آپس میں یہ طے ہوا اور اس بات پر صلح ہوئی کہ غالب گروہ جس مقتول کو قتل کرے گا ، تو اس کی دیت پچاس وسق ہو گی اور مغلوب گروہ جس مقتول کو قتل کرے گا اس کی دیت ایک سو وسق ہو گی وہ لوگ اسی چیز پر کار بند رہے یہاں تک کہ نبی اکرم صلی اللہ علیہ وسلم مدینہ منورہ تشریف لے آئے ، تو دونوں گروہ نبی اکرم صلی اللہ علیہ وسلم کی تشریف آوری پر اسی صورت حال پر تھے اور نبی اکرم صلی اللہ علیہ وسلم کو ابھی ریاستی طور پر غلبہ حاصل نہیں ہوا تھا وہ لوگ صلح کا وقت گزار رہے تھے اس دوران کمتر گروہ کے ایک شخص نے غالب گروہ کے ایک شخص کو قتل کر دیا تو غالب گروہ نے کمتر گروہ کو یہ پیغام بھیجا کہ تم ایک سو وسق ہماری طرف بھیجوا دو تو کمزور گروہ نے کہا: کیا اس میں کبھی کوئی بھلائی ہو سکتی ہے جبکہ دونوں طرف کے لوگوں کا دین ایک ہے دونوں کا نسب ایک ہے دونوں کا شہر ایک ہے ، تو ان میں سے کسی ایک کی دیت دوسرے کی دیت کا نصف ہو گی ہم نے تو تمہیں یہ چیز اس لئے دی تھی کیونکہ ہم تم سے بچنا چاہ رہے تھے اور تم سے خوف زدہ تھے اور جب سیدنا محمد ( صلی اللہ علیہ وسلم ) تشریف لے آئے ہیں تو ہم تمہیں یہ ادائیگی نہیں کریں گے ان گروہوں کے درمیان جنگ بھڑکنے والی تھی کہ ان لوگوں نے یہ طے کیا کہ اپنے درمیان نبی اکرم صلی اللہ علیہ وسلم کو ثالث بنا لیتے ہیں پھر غالب گروہ نے یہ بات ذکر کی اور کہا: اللہ کی قسم ! سیدنا محمد ( صلی اللہ علیہ وسلم ) تمہاری طرف سے جو انہیں دیتے ہیں اس کا دُگنا ان لوگوں کی طرف سے تمہیں نہیں دیں گے اور ان لوگوں نے یہ بات ٹھیک بیان کی ہے کہ انہوں نے ہمارے غلبے اور خوف کی وجہ سے ایسا کیا تھا ، تو تمہیں ۔ سیدنا محمد ( صلی اللہ علیہ وسلم ) کی طرف کسی شخص کو بھجوانا چاہیے جو تمہیں اس بارے میں بتائے کہ ان کی کیا رائے ہے اگر تو وہ وہی فیصلہ دیں گے جو تم چاہتے ہو ، تو تم انہیں ثالث بنا لینا اور اگر وہ تمہیں وہ فیصلہ نہیں دیں گے ، تو تم اس چیز سے بچ جانا تم انہیں ثالث نہ بنانا ان لوگوں نے کچھ منافقین کو نبی اکرم صلی اللہ علیہ وسلم کے پاس بھیجا تاکہ وہ منافقین ان لوگوں کو نبی اکرم صلی اللہ علیہ وسلم کی رائے کے بارے میں بتائیں جب وہ شخص نبی اکرم صلی اللہ علیہ وسلم کے پاس آیا ، تو اللہ تعالیٰ نے اپنے رسول کو ان لوگوں کے پورے معاملے کے بارے میں اور ان کے ارادے کے بارے میں بتا دیا اور اس بارے میں اللہ تعالیٰ نے یہ آیت نازل کی : ” اے رسول ! وہ لوگ جو کفر میں جلدی کرتے ہیں وہ تمہیں غمگین نہ کریں یہ وہ لوگ ہیں ، جنہوں نے یہ کہا: ہم ایمان لائے انہوں نے اپنے منہ کے ذریعے یہ بات کہی “ ۔ یہ آیت اللہ تعالیٰ کے اس فرمان تک ہے : ” اور جو شخص اللہ تعالیٰ کے نازل کردہ کے مطابق فیصلہ نہیں دیتا تو یہی لوگ فاسق ہیں “ ۔ پھر نبی اکرم صلی اللہ علیہ وسلم نے ان دونوں گروہوں کے بارے میں فرمایا : اللہ کی قسم ! حکم نازل ہو گیا ہے ، اور اللہ تعالیٰ نے یہی لوگ مراد لئے ہیں ۔
( علامہ ہیثمی فرماتے ہیں : ) میں یہ کہتا ہوں : امام ابوداؤد نے اس روایت کا کچھ حصہ نقل کیا ہے ۔
یہ روایت امام أحمد نے نقل کی ہے ، اور امام طبرانی نے اس کی مانند روایت نقل کی ہے ۔ اس کی سند میں ایک راوی عبدالرحمن بن ابوزناد ہے ، اور وہ ضعیف ہے ویسے اس کی توثیق کی گئی ہے امام أحمد کے بقیہ رجال ثقہ ہیں ۔