مجمع الزوائد ومنبع الفوائد

سیدنا حذیفہ رضی اللہ عنہ بیان کرتے ہیں : نبی اکرم صلی اللہ علیہ وسلم یہ فرماتے تھے : ” مجھے سورت بقرہ کی آخری آیات عرش کے نیچے موجود خزانے میں سے عطا کی گئی ہیں یہ مجھ سے پہلے کسی ( اور ) نبی کو عطا نہیں کی گئی ہیں “ ۔
یہ روایت امام أحمد نے اور امام طبرانی نے معجم کبیر اور معجم اوسط میں نقل کی ہے امام أحمد کے رجال صحیح کے رجال ہیں ۔ ( علامہ ہیثمی فرماتے ہیں : ) میں یہ کہتا ہوں : اس روایت کے مختلف طرق اس سے پہلے سورت کے آغاز میں گزر چکے ہیں ۔

عبدالله بن یزید بن آدم بیان کرتے ہیں : سیدنا ابودرداء رضی اللہ عنہ سیدنا ابوامامہ رضی اللہ عنہ سیدنا واثلہ بن اسقع رضی اللہ عنہ اور سیدنا انس بن مالک رضی اللہ عنہ نے مجھے یہ بات بیان کی ہے ان حضرات کا یہ بیان کرنا ہے کہ نبی اکرم صلی اللہ علیہ وسلم سے سوال کیا گیا ۔ علم میں رسوخ رکھنے والے لوگ کون ہیں ؟ تو آپ صلی اللہ علیہ وسلم نے ارشاد فرمایا : ” شخص جس کی قسم سچی ہو جس کی زبان سچی ہو جس کی شرمگاہ اور پیٹ پاک دامن ہوں وہ شخص علم میں رسوخ رکھنے والا ہو گا “ ۔
یہ روایت امام طبرانی نے نقل کی ہے ، اور عبداللہ بن یزید نامی راوی ضعیف ہے ۔