مجمع الزوائد ومنبع الفوائد

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم پر یہ آیت نازل ہوئی : ” تمہاری بیویاں تمہارے کھیت ہیں “ ۔ تو یہ پچھلی شرمگاہ میں صحبت کرنے کی رخصت تھی ۔
یہ روایت امام طبرانی نے معجم اوسط میں اپنے استاد علی بن سعید بن بشیر کے حوالے سے نقل کی ہے وہ حافظ ہے امام دارقطنی رحمہ اللہ نے اس کے بارے میں یہ کہا: ہے وہ اتنے پائے کا نہیں ہے اس روایت کے بقیہ رجال ثقہ ہیں ۔

سیدنا ابوسعید خدری رضی اللہ عنہ بیان کرتے ہیں : نبی اکرم صلی اللہ علیہ وسلم کے زمانہ اقدس میں ایک شخص نے اپنی بیوی کے ساتھ ، اس کو الٹا کر کے صحبت کی ، تو لوگوں نے کہا: فلاں شخص نے اپنی بیوی کے ساتھ اس کو الٹا کر کے صحبت کی ، تو اللہ تعالیٰ نے یہ آیت نازل کی : ” تمہاری بیویاں تمہارے کھیت ہیں تم اپنے کھیت میں جیسے چاہو آؤ “ ۔
یہ روایت امام ابویعلیٰ نے اپنے استاد حارث بن سریج بقال کے حوالے سے نقل کی ہے ، اور وہ ضعیف اور کذاب ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم کے زمانہ اقدس میں ایک شخص نے اپنی بیوی کی پچھلی شرمگاہ میں صحبت کی لوگوں نے اس پر اعتراض کیا تو اللہ تعالیٰ نے یہ آیت نازل کی : تمہاری بیویاں تمہارے کھیت ہیں “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی یعقوب بن حمید بن کا سب ہے ، جسے ابن حبان نے ثقہ قرار دیا ہے ، اور اکثر حضرات نے اسے ضعیف کہا: ہے اس روایت کے بقیہ رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : ایک مرتبہ سیدنا عمر رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے انہوں نے عرض کی : یا رسول اللہ ! میں ہلاکت کا شکار ہو گیا ہوں ۔ نبی اکرم صلی اللہ علیہ وسلم نے ارشاد فرمایا : تمہیں کسی چیز نے ہلاکت کا شکار کیا ہے ؟ انہوں نے عرض کی : گزشتہ رات میں نے اپنے پالان کو تبدیل کر دیا ( سیدنا عمر رضی اللہ عنہ کہتے ہیں : ) نبی اکرم صلی اللہ علیہ وسلم نے مجھے کوئی جواب نہیں دیا راوی بیان کرتے ہیں : پھر اللہ تعالیٰ نے اپنے رسول کی طرف یہ وحی نازل کی : ” تمہاری بیویاں تمہاری کھیتیاں ہیں تم اپنے کھیت میں جیسے چاہو آؤ “ ۔ ( راوی کہتے ہیں : اس سے مراد یہ ہے ) کہ تم آگے کی طرف سے آؤ یا پیچھے کی طرف سے آؤ لیکن حیض کی حالت یا پچھلی شرمگاہ سے بچ کے رہنا ۔
یہ روایت امام أحمد نے نقل کی ہے اور اس کے رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : یہ آیت نازل ہوئی : ” تمہاری بیویاں تمہارے کھیت ہیں “ ۔ یہ انصار سے تعلق رکھنے والے کچھ لوگوں کے بارے نازل ہوئی تھی جو نبی اکرم صلی اللہ علیہ وسلم کی خدمت میں حاضر ہوئے اور آپ سے دریافت کیا تو نبی اکرم صلی اللہ علیہ وسلم نے فرمایا : تم کسی بھی حالت میں عورت کے پاس جا سکتے ہو جبکہ صحبت اگلی شرمگاہ میں ہو ۔
یہ روایت امام أحمد نے نقل کی ہے ، اور اس کی سند ہمیں ایک راوی رشدین بن سعد ہے ، اور وہ ضعیف ہے ۔ ( علامہ ہیثمی فرماتے ہیں : ) میں یہ کہتا ہوں : اس سے پہلے نکاح سے متعلق باب میں اس نوعیت کی کچھ احادیث گزر چکی ہیں ۔

سیدنا جابر رضی اللہ عنہ نبی اکرم صلی اللہ علیہ وسلم کے حوالے سے اللہ تعالیٰ کے اس فرمان کے بارے میں نقل کرتے ہیں ارشاد باری تعالیٰ ہے : ) ” لوگ تم سے حیض کے بارے میں دریافت کرتے ہیں تم فرما دو وہ گندگی ہے ، اور تم لوگ حیض کے دوران عورتوں سے الگ رہو “ ۔ لوگوں نے بتایا کہ یہودی یہ کہتے ہیں : جو شخص پچھلی طرف سے اپنی بیوی کے ساتھ صحبت کرتا ہے ، تو اس کا بیٹا بھینگا ہوتا ہے ، تو انصار کی خوتین اپنے شوہروں کو اپنی پچھلی طرف سے صحبت نہیں کرنے دیتی تھیں وہ لوگ نبی اکرم صلی اللہ علیہ وسلم کی خدمت میں حاضر ہوئے اور آپ سے اس بارے میں دریافت کیا کہ کوئی شخص اپنی بیوی کے ساتھ صحبت کر سکتا ہے جبکہ وہ حیض کی حالت میں ہو ، تو اللہ تعالیٰ نے یہ آیت نازل کی : ” لوگ تم سے حیض کے بارے میں دریافت کرتے ہیں تم فرما دو : وہ گندگی ہے ، اور حیض کے دوران تم لوگ عورتوں سے الگ رہو اور ان کے قریب نہ جاؤ جب تک وہ پاک نہیں ہو جاتیں ( راوی کہتے ہیں ) : یعنی جب تک وہ طہر کی حالت میں نہیں آ جاتی ہیں اور جب وہ پاکیزگی حاصل کر لیں ( راوی کہتے ہیں : یعنی جب وہ غسل کر لیں ) تو تم ان کے ساتھ اس طریقے کے ساتھ صحبت کرو جس طرح اللہ تعالیٰ نے تمہیں اجازت دی ہے بے شک اللہ تعالیٰ توبہ کرنے والوں کو پسند کرتا ہے ، اور اچھی طرح سے طہارت حاصل کرنے والوں کو پسند کرتا ہے تمہاری عورتیں تمہارے کھیت ہیں تم اپنے کھیت میں جیسے چاہو آؤ “ ۔ ( راوی بیان کرتے ہیں : ) کھیت سے مراد وہ جگہ ہے جہاں پیدائش ممکن ہے ۔
( علامہ ہیثمی فرماتے ہیں : ) میں یہ کہتا ہوں : یہ روایت امام مسلم نے اختصار کے ساتھ نقل کی ہے ۔
یہ روایت امام بزار نے نقل کی ہے ۔ اس کی سند میں ایک راوی عبیداللہ بن یزید قردوانی ہے اس کے بیٹے کے علاوہ کسی اور نے اس سے روایت نقل نہیں کی ہے اس کے بقیہ رجال کی توثیق کی گئی ہے ۔