مجمع الزوائد ومنبع الفوائد

سیدنا عبداللہ بن عمر رضی اللہ عنہما اللہ تعالیٰ کے اس فرمان کے بارے میں نقل کرتے ہیں ( ارشاد باری تعالیٰ ہے : ) ” حج کے متعین مہینے ہیں “ ۔ سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم نے ارشاد فرمایا : اس سے مراد ذیقعدہ اور ذوالج ہے ۔ ارشاد باری تعالیٰ ہے : ” جو شخص ان مہینوں میں حج کو لازم قرار دے “ ۔ سیدنا عبداللہ بن عمر رضی اللہ عنہما کہتے ہیں : اس سے مراد تلبیہ پڑھنا اور احرام باندھ لینا ہے ۔ ( ارشاد باری تعالیٰ ہے : ” تو رفث نہیں ہو گا “ ۔ سیدنا عبداللہ بن عمر رضی اللہ عنہما فرماتے ہیں : اس سے مراد عورت کے ساتھ صحبت کرنا ہے ۔ ارشاد باری تعالیٰ ہے : ” اور نسوق نہیں ہو گا “ ۔ سیدنا عبداللہ بن عمر رضی اللہ عنہما کہتے ہیں : اس سے مراد بھلا کہنا ہے ۔ ارشاد باری تعالیٰ ہے : ” اور جدال نہیں ہو گا “ ۔ سیدنا عبداللہ بن عمر رضی اللہ عنہما کہتے ہیں : اس سے مراد جھگڑا کرنا ہے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی یحیی بن سکن ہے ، اور وہ ضعیف ہے ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے اللہ تعالیٰ کے اس فرمان کے بارے میں ارشاد فرمایا ہے : ( ارشاد باری تعالیٰ ہے : ) ” حج کے متعین مہینے ہیں “ ۔ نبی اکرم صلی اللہ علیہ وسلم نے ارشاد فرمایا ہے : ( اس سے مراد ) شوال ذیقعدہ اور ذوالج ہیں ۔
یہ روایت امام طبرانی نے معجم صغیر اور معجم اوسط میں نقل کی ہے ۔ اس کی سند میں ایک راوی حصین بن مخارق ہے ، اور وہ انتہائی ضعیف ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے اللہ تعالیٰ کے اس فرمان کے بارے میں ارشاد فرمایا ہے : ( ارشاد باری تعالیٰ ہے : ) ” تو حج کے دوران رفث یا فسوق یا جدال نہیں ہو گا “ ۔ نبی اکرم صلی اللہ علیہ وسلم ارشاد فرماتے ہیں : رفث سے مراد فحش کلامی ہے ، اور عورتوں کے ساتھ صحبت کرنا ہے فسوق سے مراد گناہوں کا ارتکاب کرنا ہے ، اور جدال سے مراد آدمی کا اپنے ساتھی کے ساتھ جھگڑا کرنا ہے “ ۔
یہ روایت امام طبرانی نے اپنے استاد یحیی بن عثمان بن صالح کے حوالے سے سوار بن محمد بن قریش کے حوالے سے نقل کی ہے ، اور ان دونوں راویوں میں کمزور ہونا پایا جاتا ہے ویسے ان دونوں کی توثیق کی گئی ہے اس روایت کے بقیہ رجال صحیح کے رجال ہیں ۔

سیدنا عبداللہ بن عباس رضی اللہ عنہما فرماتے ہیں : « لا رفث » سے مراد صحبت کرنا ہے : ”« ولا فسوق » وہ فرماتے ہیں : «فسوق» سے مراد گناہ ہیں : « ولا جدال فى الحج » ۔ وہ فرماتے ہیں : ( یہاں جدال سے مراد ) جھگڑا کرنا ہے ۔
یہ روایت امام ابویعلیٰ نے نقل کی ہے ۔ اس کی سند میں ایک راوی خصیف ہے ، جسے عجلی اور یحییٰ بن معین نے ثقہ قرار دیا ہے ، اور ایک جماعت نے اسے ضعیف کہا: ہے اس روایت کے بقیہ رجال صحیح کے رجال ہیں ۔