مجمع الزوائد ومنبع الفوائد

ابوجبیرہ بن ضحاک بیان کرتے ہیں : انصار جو اللہ کو منظور ہوتا تھا وہ چیز صدقہ کر دیتے تھے اور دے دیتے تھے انہیں قحط سالی لاحق ہوئی تو وہ ایسا کرنے سے رک گئے تو اللہ تعالیٰ نے اس بارے میں یہ آیت نازل کی : ” اپنے ہاتھوں کو ہلاکت میں نہ ڈالو “ ۔
یہ روایت امام طبرانی نے معجم کبیر اور معجم اوسط میں نقل کی ہے ، اور اس میں یہ الفاظ زائد نقل کیے ہیں : ” اور بھلائی کرو بے شک اللہ تعالیٰ بھلائی کرنے والوں سے محبت رکھتا ہے “ ۔ ان دونوں روایات کے رجال صحیح کے رجال ہیں ۔

سیدنا نعمان بن بشیر رضی اللہ عنہ اللہ تعالیٰ کے اس فرمان کے بارے میں نقل کرتے ہیں ( ارشاد باری تعالیٰ ہے : ) ” اور اپنے ہاتھوں کو ہلاکت میں نہ ڈالو “ ۔ سیدنا نعمان بن بشیر رضی اللہ عنہ بیان کرتے ہیں : پہلے کوئی شخص گناہ کا ارتکاب کرتا تھا ، تو یہ کہتا تھا : اللہ تعالیٰ میری مغفرت نہیں کرے گا ، تو اللہ تعالیٰ نے یہ آیت نازل کی : ” تم اپنے ہاتھوں کو ہلاکت میں نہ ڈالو اور بھلائی کرو اور بے شک اللہ تعالیٰ بھلائی کرنے والوں سے محبت رکھتا ہے “ ۔
یہ روایت امام طبرانی نے معجم کبیر اور معجم اوسط میں نقل کرتے ہیں ، اور ان دونوں کے رجال صحیح کے رجال ہیں ۔