مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے ارشاد فرمایا : ” تین قسم کے لوگوں سے قلم اٹھا لیا گیا ہے ، سوئے ہوئے شخص سے جب تک وہ بیدار نہیں ہو جاتا ذہنی توازن کی خرابی کا شکار شخص جب تک وہ ٹھیک نہیں ہو جاتا اور بچے سے جب تک اسے عقل نہیں آ جاتی ( راوی کو شک ہے شاید یہ الفاظ ہیں : ) جب تک وہ بالغ نہیں ہو جاتا “ ۔
یہ روایت امام طبرانی نے معجم کبیر اور معجم اوسط میں نقل کی ہے وہ بیان کرتے ہیں : یہ سیدنا عبداللہ بن عباس رضی اللہ عنہما سے صرف اسی سند کے ساتھ منقول ہے ۔ اس کی سند میں ایک راوی عبدالعزیز بن عبیداللہ بن حمزہ ہے ، اور وہ ضعیف ہے ۔

ابوادریس خولانی بیان کرتے ہیں : مجھے ایک سے زیادہ صحابہ کرام نے یہ بات بیان کی ہے جن میں ایک سیدنا شداد بن اوس رضی اللہ عنہ اور ایک سیدنا ثوبان رضی اللہ عنہ ہیں ، وہ بیان کرتے ہیں : نبی اکرم صلی اللہ علیہ وسلم نے ارشاد فرمایا ہے : ” تین قسم کے لوگوں سے قلم اٹھا لیا گیا ہے ، بچے سے ، جب تک وہ بڑا نہیں ہو جاتا ہے ، سوئے ہوئے شخص سے ، جب تک وہ بیدار نہیں ہو جاتا ، اور پاگل سے ، جب تک وہ ٹھیک نہیں ہو جاتا “ ۔
یہ روایت امام طبرانی نے نقل کی ہے ، اور اس کے رجال ثقہ ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تین قسم کے لوگوں سے قلم اٹھا لیا گیا ہے بچے سے جب تک وہ بڑا نہیں ہو جاتا ہے سوئے ہوئے شخص سے جب تک وہ بیدار نہیں ہو جاتا اور پاگل سے جب تک وہ ٹھیک نہیں ہو جاتا “ ۔
یہ روایت امام بزار نے نقل کی ہے ۔ اس کی سند میں ایک راوی عبدالرحمن بن عبداللہ بن عمر بن حفص ہے ، اور وہ متروک ہے ۔