مجمع الزوائد ومنبع الفوائد

ابوطفیل بیان کرتے ہیں : نبی اکرم صلی اللہ علیہ وسلم کے زمانہ اقدس میں ایک شخص کا بیٹا پیدا ہوا وہ اسے لے کر نبی اکرم صلی اللہ علیہ وسلم کے پاس آیا ۔ نبی اکرم صلی اللہ علیہ وسلم نے اس کی پیشانی کی جلد کو پکڑا اور پھر اس کے لئے دعائے برکت کی تو اس کی پیشانی پر کچھ بال یوں اگ گئے جیسے گھوڑے کی گردن پر ہوتے ہیں پھر وہ لڑکا بڑا ہو گیا جب خوارج کا زمانہ آیا تو وہ خوارج سے محبت رکھنے لگا ، تو اس کی پیشانی سے وہ بال گر گئے اس کے باپ نے اسے پکڑا اور اسے قید کر دیا اسے یہ اندیشہ تھا کہ کہیں وہ لڑکا خوارج کے ساتھ جا کے نہ ملے راوی کہتے ہیں : ہم اس کے پاس گئے ہم نے اسے وعظ ونصیحت کی ہم نے جو اسے باتیں کیں اس میں ہم نے یہ بھی کہا: کہ کیا تم نے اس بات پے غور نہیں کیا کہ اللہ کے رسول کی دعا کی برکت تمہارے چہرے سے گر گئی ہے ہم مسلسل اسے تلقین کرتے رہے ، یہاں تک کہ اس نے خوارج کی رائے سے رجوع کر لیا تو اللہ تعالیٰ نے بعد میں اس کی پیشانی پر دوبارہ بال لوٹا دیے جب اس نے توبہ کر لی ۔
یہ روایت امام أحمد نے نقل کی ہے ۔ اس کی سند میں ایک راوی علی بن زید بن جدعان ہے ، اور اس میں ضعف پایا جاتا ہے ویسے اس کی توثیق کی گئی ہے ۔ اس روایت کے بقیہ رجال صحیح کے رجال ہیں ۔

یزید بن اصم بیان کرتے ہیں : میں سیدنا حسن رضی اللہ عنہ کے ہمراہ نکلا اس وقت ایک لڑکی ان کے ناخنوں سے مہندی کھرچ رہی تھی ان کے پاس تحریروں کا ایک گٹھہ آیا تو انہوں نے فرمایا : اے لڑکی بڑا برتن لاؤ اور اس میں پانی ڈال کے لاؤ پھر انہوں نے وہ تحریریں پانی میں ڈلوا دیں انہوں نے اس میں سے کسی کو کھولا بھی نہیں ، اور اس کو دیکھا بھی نہیں میں نے کہا: اے ابومحمد یہ تحریریں کن کی طرف سے ہیں انہوں نے جواب دیا : اہل عراق کی طرف سے ہیں یہ وہ لوگ ہیں جو اہل حق کی طرف رجوع نہیں کرتے ہیں ، اور باطل میں کمی نہیں کرتے ہیں مجھے اپنی ذات کے حوالے سے ان کی طرف سے اندیشہ نہیں ہے لیکن مجھے اس کے حوالے سے ان لوگوں سے اندیشہ ہے ۔ امام حسن نے امام حسین کی طرف سے اشارہ کر کے یہ بات ارشاد فرمائی ۔
یہ روایت امام طبرانی نے نقل کی ہے ، اور اس کے رجال صحیح کے رجال ہیں صرف عبداللہ بن حکیم بن ابوزیاد کا معاملہ مختلف ہے ، اور وہ ثقہ ہے ۔