مجمع الزوائد ومنبع الفوائد

سیدنا ابوامامہ رضی اللہ عنہ بیان کرتے ہیں : مسلمانوں سے تعلق رکھنے والے ایک شخص نے ایک شخص کو پناہ دے دی لشکر کے امیر سیدنا ابوعبیدہ بن جراح رضی اللہ عنہ تھے ۔ سیدنا خالد بن ولید رضی اللہ عنہ اور سیدنا عمرو بن العاص رضی اللہ عنہ نے کہا: کہ آپ اسے پناہ نہ دیں ، تو سیدنا ابوعبیدہ رضی اللہ عنہ نے کہا: ہم اسے پناہ دیں گے میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” مسلمانوں کی طرف سے ان میں سے کوئی شخص پناہ دے سکتا ہے “ ۔
یہ روایت امام أحمد امام ابویعلیٰ اور امام بزار نے نقل کی ہے ۔ اس کی سند میں ایک راوی حجاج بن ارطاۃ ہے اور وہ مدلس ہے ۔

سیدنا ابوامامہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” مسلمانوں میں سے کوئی ایک ان کی طرف سے پناہ دے سکتا ہے “ ۔
یہ روایت امام أحمد اور امام طبرانی نے نقل کی ہے ۔ اس کی سند میں ایک راوی حجاج بن ارطاۃ ہے اور وہ مدلس ہے ۔

اہل مصر سے تعلق رکھنے والے ایک صاحب نے سیدنا عمرو بن العاص رضی اللہ عنہ کے بارے میں یہ بات نقل کی ہے کہ محمد بن ابوبکر کو قید کر دیا گیا تو انہوں نے انکار کیا سیدنا عمرو رضی اللہ عنہ ان سے پوچھتے رہے انہیں یہ بات پسند تھی کہ وہ امان کا دعوی کر دے تو سیدنا عمرو رضی اللہ عنہ نے فرمایا : نبی اکرم صلی اللہ علیہ وسلم نے ارشاد فرمایا ہے : ” لوگوں کا ادنی ترین فرد بھی لوگوں کی طرف سے پناہ دے سکتا ہے “ ۔
یہ روایت امام أحمد اور امام ابویعلیٰ اور امام طبرانی نے نقل کی ہے اور اس کی سند میں ایک شخص ایسا ہے جس کا نام بیان نہیں کیا گیا ہے ۔ امام أحمد کے بقیہ رجال صحیح کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” مسلمانوں کا ذمہ ایک جیسی حیثیت رکھتا ہے اگر کوئی عورت ان لوگوں کی طرف سے پناہ دے دیتی ہے ، تو تم اس کی خلاف ورزی نہ کرو قیامت کے دن ہر عہد شکن کے لئے مخصوص جھنڈا ہو گا ، جس کے حوالے سے وہ پہچانا جائے گا “ ۔
یہ روایت امام ابویعلیٰ نے نقل کی ہے ۔ اس کی سند میں ایک راوی محمد بن اسد ہے ابن حبان نے اسے ثقہ قرار دیا ہے ابوزرعہ نے اسے ضعیف کہا: ہے اس کے بقیہ رجال صحیح کے رجال ہیں ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم کی صاحبزادی سیدہ زینب رضی اللہ عنہا نے سیدنا ابوالعاص رضی اللہ عنہ کو پناہ دے دی تھی تو نبی اکرم صلی اللہ علیہ وسلم نے ان کی دی ہوئی پناہ کو برقرار رکھا تھا ۔ سیدہ اُم ہانی بنت ابوطالب رضی اللہ عنہا نے اپنے بھائی جناب عقیل کو پناہ دے دی تھی نبی اکرم صلی اللہ علیہ وسلم نے ان کی دی ہوئی پناہ کو برقرار رکھا تھا ۔
یہ روایت امام طبرانی نے معجم کبیر اور معجم اوسط میں اختصار کے ساتھ صرف سیدہ ام ہانی رضی اللہ عنہا کے بارے میں نقل کی ہے اس کی سند میں ایک راوی عباد بن کثیر ثقفی ہے اور وہ متروک ہے ۔

سیدہ ام سلمہ رضی اللہ عنہا بیان کرتی ہیں : جب نبی اکرم صلی اللہ علیہ وسلم ہجرت کے لئے روانہ ہوئے تو آپ کی صاحبزادی سیدہ زینب رضی اللہ عنہا نے اپنے شوہر ابوالعاص بن ربیع سے اجازت مانگی کہ وہ نبی اکرم صلی اللہ علیہ وسلم کے پاس چلی جائیں انہوں نے اس خاتون کو اجازت دے دی وہ نبی اکرم صلی اللہ علیہ وسلم کے پاس آ گئیں پھر سیدنا ابوالعاص رضی اللہ عنہ مدینہ منورہ آئے اور سیدہ زینب رضی اللہ عنہا کو پیغام بھیجا کہ تم اپنے والد سے میرے لئے امان لے لو سیدہ زینب رضی اللہ عنہا نکلیں انہوں نے نبی اکرم صلی اللہ علیہ وسلم کے حجرے کے دروازے سے سر باہر نکالا نبی اکرم صلی اللہ علیہ وسلم اس وقت لوگوں کو صبح کی نماز پڑھا رہے تھے سیدہ زینب رضی اللہ عنہا نے کہا: اے لوگو ! میں اللہ کے رسول کی صاحبزادی زینب ہوں اور میں نے ابوالعاص کو پناہ دے دی ہے جب نبی اکرم صلی اللہ علیہ وسلم نماز پڑھ کر فارغ ہوئے تو آپ نے ارشاد فرمایا : ” اے لوگو ! مجھے اس بارے میں پتہ نہیں تھا یہاں تک کہ تم نے بھی اسے سن لیا خبردار ! مسلمانوں کا ادنی ترین فرد بھی مسلمانوں کے حوالے سے پناہ دے سکتا ہے “ ۔
یہ روایت امام طبرانی نے معجم اوسط میں نقل کی ہے اور معجم کبیر میں اختصار کے ساتھ نقل کی ہے ۔ اس کی سند میں ایک راوی ابن لہیعہ ہے ۔ اس کی نقل کردہ حدیث حسن ہے اس میں ضعف پایا جاتا ہے ۔ اس روایت کے بقیہ رجال ثقہ ہیں ۔