مجمع الزوائد ومنبع الفوائد

سیدنا ابن ابوعمیرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” لوگوں میں سے جس بھی مسلمان کی جان اس کا پروردگار قبض کرتا ہے ان میں سے کوئی بھی یہ پسند نہیں کرتا کہ وہ تم لوگوں کی طرف واپس آئے اگرچہ اسے دنیا اور اس میں موجود سب کچھ مل جائے البتہ شہید کا معاملہ مختلف ہے “ ۔ سیدنا ابن ابوعمیرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : میں اللہ کی راہ میں قتل ہو جاؤں یہ میرے نزدیک اس سے زیادہ محبوب ہے کہ تمام شہری اور دیہاتی آبادی میری ہو جائے “ ۔
یہ روایت امام أحمد نے نقل کی ہے اور اس کے رجال ثقہ ہیں ۔

سیدنا ابوامامہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ایک جنگ کی تیاری شروع کی میں آپ کے پاس آیا میں نے عرض کی : یا رسول اللہ ! آپ میرے لئے اللہ تعالیٰ سے شہادت کی دعا کیجئے نبی اکرم صلی اللہ علیہ وسلم نے فرمایا : اے اللہ ! تو انہیں غنیمت عطا فرما اور انہیں سلامت رکھنا ۔ راوی کہتے ہیں : ہم سلامت بھی رہے اور ہمیں غنیمت بھی مل گئی پھر نبی اکرم صلی اللہ علیہ وسلم نے دوسری جنگ کی تیاری شروع کی میں آپ کی خدمت میں حاضر ہوا میں نے عرض کی : یا رسول اللہ ! آپ اللہ تعالیٰ سے میرے لئے شہادت کی دعا کیجئے نبی اکرم صلی اللہ علیہ وسلم نے دعا کی اے اللہ ! تو انہیں سلامت رکھنا اور تو انہیں غنیمت عطا کرنا ۔ راوی کہتے ہیں : پھر نبی اکرم صلی اللہ علیہ وسلم نے تیسری جنگی مہم کی تیاری کی تو میں آپ کی خدمت میں حاضر ہوا میں نے عرض کی : یا رسول اللہ ! میں اس سے پہلے آپ کی خدمت میں دو مرتبہ حاضر ہو چکا ہوں اور میں نے آپ سے یہ گزارش کی تھی کہ آپ اللہ تعالیٰ سے میرے لئے شہادت کی دعا کریں ، تو آپ نے یہ فرمایا : اے اللہ ! تو انہیں سلامت رکھنا اور انہیں غنیمت عطا کرنا تو میں سلامت بھی رہا اور مجھے غنیمت بھی حاصل ہوئی میں نے عرض کی : یا رسول اللہ ! آپ اللہ تعالیٰ سے میرے لئے شہادت کی دعا کیجئے راوی کہتے ہیں : تو ہم سلامت بھی رہے اور ہمیں غنیمت بھی حاصل ہوئی ۔ ۔ ۔ اس کے بعد راوی نے پوری حدیث نقل کی ہے ، جو اس سے پہلے کتاب الصوم میں مکمل روایت کے طور پر گزر چکی ہے ۔
یہ روایت امام أحمد اور امام طبرانی نے نقل کی ہے اور امام أحمد کے صحیح کے رجال ہیں ۔