مجمع الزوائد ومنبع الفوائد

سیدنا ابوبکرہ رضی اللہ عنہ اور سیدنا ابوہریرہ رضی اللہ عنہ بیان کرتے ہیں : سیدنا عمر رضی اللہ عنہ نے سیدنا سعد بن ابی وقاص رضی اللہ عنہ کو کوفہ کا امیر بنا کر بھیجا اور انہیں یہ ہدایت کی کہ وہ ان لوگوں کے لئے بیٹھ جایا کریں اور وہ ان کے لئے پردے میں نہ رہیں پھر سیدنا عمر رضی اللہ عنہ کو یہ اطلاع ملی کہ وہ لوگوں کو چھوڑ کر پردے میں رہتے ہیں اور دروازہ بند رکھتے ہیں ( یعنی لوگوں سے ملتے نہیں ہیں ) تو سیدنا عمر رضی اللہ عنہ نے سیدنا عمار بن یاسر رضی اللہ عنہ کو بھیجا اور فرمایا جب وہ ( ان کے گھر ) آئیں اور اس وقت دروازہ بند ہو تو ان کے گھر کو آگ لگا دیں اگر صبح کا وقت ہو تو ایسا کر لیں شام کا وقت ہو تو اگلے دن صبح ایسے کریں جب سیدنا عمار رضی اللہ عنہ کوفہ آئے تو انہوں نے وہ دروازہ جلا دیا اور ( واپس ) روانہ ہو گئے ۔
یہ روایت امام طبرانی نے نقل کی ہے ۔ اس کی سند میں ایک راوی عطاء بن سائب ہے جو اختلاط کا شکار ہو گیا تھا ۔

قیس بن ابوحازم بیان کرتے ہیں : سیدنا بلال رضی اللہ عنہ سیدنا عمر بن خطاب رضی اللہ عنہ کے پاس آئے جو اس وقت شام میں موجود تھے اور ان کے اردگرد لشکروں کے امیر بیٹھے ہوئے تھے ۔ سیدنا بلال رضی اللہ عنہ نے کہا: اے سیدنا عمر ! سیدنا عمر رضی اللہ عنہ نے جواب دیا : میں یہاں ہوں سیدنا بلال رضی اللہ عنہ نے ان سے کہا: آپ اللہ تعالیٰ اور ان لوگوں کے درمیان ہیں لیکن آپ کے اور اللہ تعالیٰ کے درمیان کوئی نہیں ہے ، تو آپ اپنے دائیں طرف بھی دیکھیں اور بائیں طرف بھی دیکھیں اور آپ آگے بھی جائزہ لیں اور پیچھے بھی دیکھیں یہ لوگ جو آپ کے اردگرد موجود ہیں یہ لوگ صرف پرندوں کا گوشت کھاتے ہیں سیدنا عمر رضی اللہ عنہ نے فرمایا : آپ نے سچ کہا: ہے اللہ کی قسم ! میں اس وقت تک اپنی جگہ سے نہیں اٹھوں گا ، جب تک تم لوگ اس بات کی ضمانت نہیں دیتے کہ مسلمانوں کے ہر فرد کو اس کا کھانا اور زیتون اور سرکہ میں سے اس کا حصہ ملے گا ان لوگوں نے کہا: اے امیرالمؤمنین آپ کو یہ چیز ملتی ہے اللہ تعالیٰ نے آپ کو رزق میں وسعت عطا کی ہے ، اور زیادہ بھلائی عطا کی ہے ۔
یہ روایت امام طبرانی نے نقل کی ہے ۔ اس کے رجال صحیح کے رجال ہیں صرف عبداللہ بن أحمد کا معاملہ مختلف ہے وہ ثقہ اور مامون ہیں ۔

سیدنا ابوموسی رضی اللہ عنہ نے فرمایا : امیر المؤمنین نے مجھے تمہاری طرف بھیجا ہے تاکہ میں تمہیں تمہارے پروردگار کی کتاب اور تمہارے نبی کی سنت کی تعلیم دوں اور تمہارے راستوں کو تمہارے لئے صاف کر دوں ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں ۔