مجمع الزوائد ومنبع الفوائد

سیدنا معاذ بن جبل رضی اللہ عنہ روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” جو شخص لوگوں کے معاملے میں کسی چیز کا نگران بنے اور پھر کمزوروں اور حاجت مندوں سے حجاب میں رہے ، تو قیامت کے دن اللہ تعالیٰ اس سے حجاب فرمائے گا “ ۔
یہ روایت امام أحمد اور امام طبرانی نے نقل کی ہے ۔ امام أحمد کے رجال ثقہ ہیں ۔

ابوسماح ازدی ، اپنے چچازاد جن کا تعلق صحابہ کرام سے ہے ، ان کے بارے میں نقل کرتے ہیں : ایک مرتبہ وہ سیدنا معاویہ رضی اللہ عنہ کے پاس آئے ، اور انہوں نے یہ بات بیان کی کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص لوگوں کے معاملے کا نگران بنے اور پھر مسکینوں مظلوموں اور حاجت مندوں کے لئے اپنا دروازہ بند کر دے ، تو اللہ تعالیٰ اس شخص کے لئے اپنی رحمت کے دروازے بند کر دے گا حالانکہ اسے اللہ تعالیٰ کی رحمت کی اس سے زیادہ ضرورت ہو گی ، جتنی ( کسی حاجت مند یا کمزور شخص کو ) اس کی ضرورت ہو گی “ ۔
یہ روایت امام أحمد اور امام ابویعلیٰ نے نقل کی ہے ۔ ابوسماح نامی راوی سے میں واقف نہیں ہوں اس روایت کے بقیہ رجال ثقہ ہیں ۔

سیدنا ابوحجیفہ رضی اللہ عنہ بیان کرتے ہیں : سیدنا معاویہ بن ابوسفیان رضی اللہ عنہ نے لوگوں کی ایک مہم بھیجی وہ لوگ روانہ ہوئے ابودحداح واپس آ گئے سیدنا معاویہ رضی اللہ عنہ نے ان سے پوچھا: کیا تم گئے نہیں تھے ؟ انہوں نے کہا: جی ہاں لیکن میں نے نبی اکرم صلی اللہ علیہ وسلم کو ایک حدیث ارشاد فرماتے ہوئے سنا ہے : میں نے یہ چاہا کہ میں اسے آپ کے سامنے بیان کر دوں اس اندیشے کے تحت کہ بعد میں میری آپ سے ملاقات نہ ہو ، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اے لوگو ! جو کسی کام کا نگران بنے اور پھر مسلمانوں کے حاجت مند افراد کے حوالے سے اپنے دروازے کو بند کر لے ، تو اللہ تعالیٰ اسے اس چیز سے محجوب کر دے گا کہ وہ جنت کے دروازے میں سے داخل ہو اور جس شخص کا مقصود دنیا ہو گی اللہ تعالیٰ میرا پڑوس اس پر حرام کر دے گا کیونکہ مجھے دنیا کی خرابی کے ہمراہ مبعوث کیا گیا ہے مجھے اس کی تعمیر کے ہمراہ مبعوث نہیں کیا گیا “ ۔
یہ روایت امام طبرانی نے اپنے استاد جبرون بن عیسیٰ کے حوالے سے یحیی بن سلمان جفری سے نقل کی ہے ۔ اور میں ان دونوں سے واقف نہیں ہوں اس روایت کے بقیہ رجال صحیح کے رجال ہیں ۔