مجمع الزوائد ومنبع الفوائد

سیدنا جابر بن سمرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” ایسی قوم کامیاب نہیں ہوتی جن کے معاملے کی نگران ( یعنی حکمران ) کوئی عورت ہو“ ۔
یہ روایت امام طبرانی نے معجم اوسط میں اپنے استاد ابوعبیدہ عبدالوارث بن ابراہیم سے نقل کی ہے ۔ اور میں اس سے واقف نہیں ہوں اس روایت کے بقیہ رجال ثقہ ہیں ۔

عبداللہ بن ہجنع بیان کرتے ہیں : جب سیدہ عائشہ رضی اللہ عنہا تشریف لائیں تو ہم سیدنا ابوبکرہ رضی اللہ عنہ کے پاس آئے ، تو ہم نے کہا: سیدہ عائشہ رضی اللہ عنہا یہ کہہ رہی ہیں کہ عائشہ عائشہ ہے جو عائشہ والی ہے وہ آ گئی ہے ، تو تم ہمارے ساتھ نکلو ، تو سیدنا ابوبکرہ رضی اللہ عنہ نے فرمایا : مجھے ایک حدیث یاد آ گئی ہے جو میں نے نبی اکرم صلی اللہ علیہ وسلم کی زبانی سنی ہے میں نے نبی اکرم صلی اللہ علیہ وسلم کو سنا کہ آپ نے سباء کی حکمران بلقیس کا ذکر کرتے ہوئے فرمایا : ” اللہ تعالیٰ ایسی امت کو پاکیزگی عطا نہیں کرتا جن کی قیادت عورت کرتی ہے “ ۔ ( علامہ ہیثمی فرماتے ہیں : ) میں یہ کہتا ہوں سیدنا ابوبکرہ رضی اللہ عنہ کے حوالے سے منقول حدیث صحیح میں مذکور ہے جو اس کے علاوہ ہے ۔
یہ روایت امام طبرانی نے نقل کی ہے ۔ اس کی سند میں راویوں کی ایک جماعت ایسی ہے جن سے میں واقف نہیں ہوں ۔