مجمع الزوائد ومنبع الفوائد

سیدنا ابوہریرہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” دنیا میں ریشم وہ شخص پہنے گا ، جو یہ امید نہ رکھتا ہو کہ وہ آخرت میں اس کو پہنے گا ، ریشم وہ پہنے گا جس کا ( آخرت میں ) کوئی حصہ نہیں ہو گا“ ۔ حسن بصری فرماتے ہیں : لوگوں کو کیا ہو گیا ہے کہ ان کے نبی کے حوالے سے ان تک یہ بات پہنچی ہے ، اور پھر بھی وہ اپنے کپڑوں میں ریشم شامل کر لیتے ہیں اور اپنے گھروں میں بھی استعمال کرتے ہیں ۔
یہ روایت امام أحمد نے نقل کی ہے ۔ اور امام بزار نے اختصار کے ساتھ نقل کی ہے ۔ اس کی سند میں ایک راوی مبارک بن فضالہ ہے ، جسے ابن حبان اور دیگر حضرات نے ثقہ قرار دیا ہے اس میں ضعف پایا جاتا ہے اس روایت کے بقیہ رجال صحیح کے رجال ہیں ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم کپڑے میں سے ریشم تلاش کر کے اسے الگ کر دیتے تھے ۔
یہ روایت امام أحمد نے نقل کی ہے ۔ اور اس کے رجال صحیح کے رجال ہیں صرف ابوسعید غفاری کا معاملہ مختلف ہے ابن حبان نے اسے ثقہ قرار دیا ہے ۔

سیدنا ابوہریرہ رضی اللہ عنہ بیان کرتے ہیں : سیدنا عمر بن خطاب رضی اللہ عنہ نے عرض کی : یا رسول اللہ ! عطارد تمیمی ریشم کا حلہ فروخت کر رہا ہے اگر آپ اسے خرید لیں اور جب لوگوں کے وفود آپ کے پاس آئیں ، تو آپ اسے پہن لیں ( تو یہ مناسب ہو گا ) نبی اکرم صلی اللہ علیہ وسلم نے فرمایا : ریشم وہ شخص پہنے گا ، جس کا ( آخرت میں ) کوئی حصہ نہیں ہو گا ۔
یہ روایت امام أحمد نے نقل کی ہے ۔ امام بزار نے اس کی مانند نقل کی ہے ۔ امام أحمد کے رجال ثقہ ہیں ۔

حبیب بن عبید رحبی بیان کرتے ہیں : سیدنا ابوامامہ ، خالد بن یزید کے پاس آئے خالد نے ان کے لئے تکیہ رکھا سیدنا ابومامہ بھی رضی اللہ عنہ نے یہ سمجھا کہ شاید یہ ریشم کا ہے ، تو وہ پیچھے ہٹے اور الٹے قدموں چلتے ہوئے صف کے آخر تک پہنچ گئے خالد اس دوران ایک شخص سے بات چیت کر رہے تھے جب انہوں نے سیدنا ابوامامہ رضی اللہ عنہ کی طرف ، توجہ دی ، تو بولے : اے میرے بھائی ! آپ نے کیا گمان کیا ہے ؟ آپ یہ سمجھ رہے ہیں کہ یہ ریشم ہے ؟ سیدنا ابوامامہ رضی اللہ عنہ نے فرمایا : نبی اکرم صلی اللہ علیہ وسلم نے ارشاد فرمایا ہے : ” جو شخص اللہ کے ایام کی امید رکھتا ہو وہ ریشم سے نفع حاصل نہیں کرے گا “ تو خالد نے ان سے دریافت کیا : اے ابوامامہ ! کیا آپ نے خود نبی اکرم صلی اللہ علیہ وسلم کی زبانی یہ بات سنی ہے ، تو سیدنا ابوامامہ رضی اللہ عنہ نے فرمایا : اے اللہ ! تیری مغفرت کا سوال ہے ہم ایک ایسی قوم میں تھے جو غلط بیانی نہیں کرتے تھے اور نہ ہی ہمیں جھٹلایا گیا ۔
یہ روایت امام أحمد نے نقل کی ہے ۔ اس کی سند میں ایک راوی ابوبکر بن ابومریم ہے جو اختلاط کا شکار ہو گیا تھا ۔

سلیمان تیمی بیان کرتے ہیں حسن نے ابوعثمان نہدی کی سیدنا عمر رضی اللہ عنہ کے حوالے سے دیباج کے بارے میں نقل کردہ روایت بیان کی ، تو حسن نے کہا: قبیلے کے ایک شخص نے مجھے یہ بات بتائی ہے کہ وہ نبی اکرم صلی اللہ علیہ وسلم کی خدمت میں حاضر ہوئے ان صاحب کے جسم پر ایک جبہ تھا جس کا ” لبنہ “ ( وہ ٹکڑا جو قمیص یا جبہ کے گریبان پر لگایا جاتا ہے ) ریشم کا تھا ، تو نبی اکرم صلی اللہ علیہ وسلم نے فرمایا : یہ آگ کا ” لبنہ“ ہے ۔
یہ روایت امام أحمد نے نقل کی ہے ۔ اس کی سند میں ایک راوی علی بن عاصم بن صہیب ہے ۔ انہوں نے اس کی بکثرت غلطیوں اور اس بارے میں اس کے حد سے بڑھنے کی وجہ سے اسے منکر قرار دیا ہے ، امام أحمد کہتے ہیں : جہاں تک میرا تعلق ہے ، تو میں اس سے حدیث روایت کرتا ہوں ، اور ہمیں اس کے حوالے سے حدیث بیان کی گئی ہے ، اور اس کے بقیہ رجال ثقہ ہیں ۔

سیدنا جابر رضی اللہ عنہ بیان کرتے ہیں : ایک راہب نے نبی اکرم صلی اللہ علیہ وسلم کو سندس کا جبہ تحفے کے طور پر دیا نبی اکرم صلی اللہ علیہ وسلم وہ پہن لیا پھر آپ گھر تشریف لے گئے ، اور آپ نے اسے اتار دیا آپ کو ایک وفد کی آمد کے بارے میں پتہ چلا تو سیدنا عمر رضی اللہ عنہ نے آپ سے درخواست کی کہ آپ وہ جبہ پہن لیں کیونکہ وفد آنے والا ہے ، تو نبی اکرم صلی اللہ علیہ وسلم نے ارشاد فرمایا : دنیا میں اس کو پہننا ہمارے لئے مناسب نہیں ہے آخرت میں وہ ہمارے لئے مناسب ہو گا اے عمر وہ تم لے لو سیدنا عمر رضی اللہ عنہ نے عرض کی : آپ اسے ناپسند کر رہے ہیں ، تو کیا میں اسے لے لوں ؟ نبی اکرم صلی اللہ علیہ وسلم نے فرمایا : میں تمہیں یہ نہیں کہہ رہا کہ تم اسے پہن لو بلکہ تم اسے فارس کی سرزمین کی طرف بھیجوا دینا اور تم اس سے مال حاصل کر لینا پھر نبی اکرم صلی اللہ علیہ وسلم نے وہ جبہ نجاشی کو بھیجوا دیا کیونکہ نبی اکرم صلی اللہ علیہ وسلم کے اصحاب جو اس کی طرف گئے تھے ان کے ساتھ اس نے اچھا سلوک کیا تھا ۔

ایک روایت میں یہ الفاظ ہیں : سیدنا عمر رضی اللہ عنہ نے اسے لینے سے انکار کر دیا تھا ۔ علامہ ہیثمی فرماتے ہیں : ) میں یہ کہتا ہوں
یہ روایت صحیح میں اختصار کے ساتھ منقول ہے ۔
یہ روایت امام أحمد نے نقل کی ہے ۔ اس کی سند میں ایک راوی ابن لہیعہ ہے اس کی نقل کردہ حدیث حسن ہے ، اور اس میں ضعف پایا جاتا ہے اس روایت کے بقیہ رجال ثقہ ہیں ۔

سیدہ جویریہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” جو شخص دنیا میں ریشم کا کپڑا پہنے گا اللہ تعالیٰ ایک دن اسے آگ سے بنا ہوا کپڑا پہنائے گا ( راوی کو شک ہے شاید یہ الفاظ ہیں : ) اللہ تعالیٰ قیامت کے دن اسے آگ کا کپڑا پہنائے گا “ ۔

ایک روایت میں یہ الفاظ ہیں : ” جو شخص دنیا میں ریشم کے کپڑے پہنے گا اللہ تعالیٰ اسے قیامت کے دن آگ سے بنا ہوا ذلت کا لباس پہنائے گا ( راوی کو شک ہے شاید یہ الفاظ ہیں : ) آگ سے بنا ہوا کپڑا پہنائے گا “ ۔
یہ روایت امام أحمد اور امام طبرانی نے نقل کی ہے ۔ اس کی سند میں ایک راوی جابر جعفی ہے ، اور وہ ضعیف ہے ویسے اس کی توثیق کی گئی ہے ۔

سیدنا ابوسعید خدری رضی اللہ عنہ یا شاید سیدنا عمران رضی اللہ عنہ بیان کرتے ہیں : میں نبی اکرم صلی اللہ علیہ وسلم کے بارے میں گواہی دے کر یہ کہتا ہوں کہ آپ نے ریشم پہننے سے منع کیا ہے ۔
( علامہ ہیثمی فرماتے ہیں : ) میں یہ کہتا ہوں : ابوسعید خدری رضی اللہ عنہ کے ذکر کی وجہ میں نے
یہ روایت یہاں نقل کی ہے ۔
یہ روایت امام أحمد نے نقل کی ہے ۔ اور اس کے رجال صحیح کے رجال ہیں ۔

سیدنا حذیفہ رضی اللہ عنہ بیان کرتے ہیں : جو شخص ریشمی کپڑا پہنے گا اللہ تعالیٰ اسے آگ سے بنا ہوا کپڑا پہنائے گا ، اور وہ دن تمہارے دنوں کے حساب سے نہیں ہو گا بلکہ اللہ تعالیٰ کے طویل دنوں کے حساب سے ہو گا ۔
یہ روایت امام بزار نے اپنے استاد رجاء بن جارود کے حوالے سے نقل کی ہے ۔ میں اس سے واقف نہیں ہوں ۔ اس روایت کے بقیہ رجال ثقہ ہیں ۔

ہشام بن ابورقیہ بیان کرتے ہیں : میں نے مسلمہ بن مخلد کو سنا وہ منبر پر کھڑے ہوئے لوگوں کو خطبہ دے رے تھے اور یہ کہہ رہے تھے اے لوگو ! کیا عصب اور قطان ( نامی مخصوص قسم کے دو کپڑوں ) میں وہ چیز نہیں ہے جو تمہیں ریشم سے بے نیاز کر دے یہ صاحب تمہارے درمیان موجود ہیں یہ تمہیں اللہ کے رسول صلی اللہ علیہ وسلم کے حوالے سے ایک چیز بیان کریں گے اے سیدنا عقبہ رضی اللہ عنہ آپ کھڑے ہو جائیں ، تو سیدنا عقبہ بن عامر رضی اللہ عنہ کھڑے ہوئے ( راوی کہتے ہیں : ) میں یہ بات خود سن رہا تھا انہوں نے یہ بات بیان کی کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص جان بوجھ کر میری طرف جھوٹی بات منسوب کرے وہ جہنم میں جانے کے لئے تیار رہے “ ۔ ( سیدنا عقبہ بن عامر رضی اللہ عنہ نے پھر یہ فرمایا : ) میں اس بات کی گواہی دیتا ہوں کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص دنیا میں ریشم پہنے گا وہ اس بات سے محروم رہے گا کہ آخرت میں اسے پہنے “ ۔
یہ روایت امام أحمد امام ابویعلیٰ امام بزار اور امام طبرانی نے معجم کبیر اور معجم اوسط میں نقل کی ہے ۔ اور اس کے رجال ثقہ ہیں ۔

سیدنا عبداللہ بن عمرو رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے پاس موجود تھے ایک دیہاتی شخص آپ کی خدمت میں حاضر ہوا جس کے جسم پر سیجان کا جبہ تھا جو دیباج سے آراستہ تھا ۔ نبی اکرم صلی اللہ علیہ وسلم نے ارشاد فرمایا : تمہارا یہ ساتھی یہ چاہتا ہے کہ ہر شہسوار کو پست کر دے اور ہر چرواہے کو بلند کر دے جو چرواہے کا بیٹا ہو پھر نبی اکرم صلی اللہ علیہ وسلم نے اس شخص کے جبہ کے گریبان کو پکڑا اور فرمایا : میں تم پر اس شخص کا لباس نہ دیکھوں جس کو عقل نہیں ہوتی ۔
یہ روایت امام أحمد نے ایک طویل حدیث میں ذکر کی ہے جو اس سے پہلے سیدنا نوح علیہ السلام کی وصیت سے متعلق باب میں گزر چکی ہے ، اور اس کے رجال ثقہ ہیں ۔

سیدنا عبداللہ بن مسعود رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص دنیا میں ریشم پہنے گا وہ آخرت میں اسے نہیں پہنے گا “ ۔
یہ روایت امام طبرانی نے نقل کی ہے ۔ اس کی سند میں ایک راوی علی بن یزید الہانی ہے ، اور وہ ضعیف ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم نے ریشم اور قز ( ریشم کی ایک قسم ) سے منع کیا ہے ۔
یہ روایت امام بزار نے نقل کی ہے ۔ اس کی سند میں ایک راوی بقیہ ہے وہ مدلس ہے اس روایت کے بقیہ رجال ثقہ ہیں ۔

سیدنا ابوسعید خدری رضی اللہ عنہ بیان کرتے ہیں : نبی اکرم صلی اللہ علیہ وسلم ہمارے پاس تشریف لائے آپ کے جسم پر سندس کا جبہ موجود تھا ہم نے ایک طویل عرصے سے اس سے زیادہ خوبصورت لباس نہیں دیکھا تھا ، پھر آپ پریشانی کے عالم میں کھڑے ہوئے پھر آپ نے اسے اتار دیا پھر آپ حبرہ کی چادر پہن کر تشریف لائے ، اور ارشاد فرمایا : ” ریشیم اہل جنت کا لباس ہے جو شخص دنیا میں اسے پہنے گا وہ آخرت میں اسے نہیں پہنے گا “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عیسیٰ بن بکر بن داب ہے ، اور وہ انتہائی ضعیف ہے ۔

سیدنا معاذ بن جبل رضی اللہ عنہ بیان کرتے ہیں : نبی اکرم صلی اللہ علیہ وسلم نے ریشم لگا ہوا جبہ دیکھا ، تو ارشاد فرمایا : ” قیامت کے دن ، یہ آگ کا طوق ہو گا “ ۔
یہ روایت امام طبرانی نے معجم اوسط میں نقل کی ہے ۔ اور معجم کبیر میں س کی ماند نقل کی ہے ۔ اور یہ امام بزار نے بھی نقل کی ہے ۔ امام بزار کے رجال ثقہ ہیں ۔

سیدہ ام ہانی رضی اللہ عنہا بیان کرتی ہیں : نبی اکرم صلی اللہ علیہ وسلم کو ایک سیرائی حلہ تحفے کے طور پر دیا گیا وہ آپ نے سیدنا علی رضی اللہ عنہ کو بھیج دیا جب سیدنا علی رضی اللہ عنہ آئے ، تو انہوں نے وہ حلہ پہنا ہوا تھا ۔ نبی اکرم صلی اللہ علیہ وسلم نے فرمایا : جس چیز سے میں اپنی لئے راضی نہیں ہوں اس سے میں تمہارے لئے بھی راضی نہیں ہوں گا یہ میں نے تمہیں اس لئے نہیں دیا تھا کہ تم اسے پہن لو یہ میں نے تمہیں اس لئے دیا تھا تاکہ تم فاطمہ نامی خواتین کو اس کی چادریں بنوا دو ۔
یہ روایت امام طبرانی نے نقل کی ہے ۔ اس کی سند میں ایک راوی یزید بن ابوزیاد ہے جس کے ضعیف ہونے کے باوجود اس کی توثیق کی گئی ہے اس کے بقیہ رجال ثقہ ہیں ۔

سیدنا عبداللہ بن عباس رضی اللہ عنہما اور سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم کے پاس حلے لائے گئے آپ نے ایک حلہ سیدنا عمر رضی اللہ عنہ کو بھیجوا دیا سیدنا عمر رضی اللہ عنہ وہ حلہ لائے انہوں نے اسے اٹھایا ہوا تھا انہوں نے عرض کی : یا رسول اللہ ! آپ نے یہ ریشمی حلہ میری طرف بھیجوا دیا ہے ، جبکہ ریشم کے بارے میں آپ پہلے یہ بات ارشاد فرما چکے ہیں ۔ نبی اکرم صلی اللہ علیہ وسلم نے ارشاد فرمایا : یہ میں نے تمہاری طرف اس لئے نہیں بھیجوایا ہے کہ تم اسے پہن لو بلکہ تم اسے فروخت کرو اور اس کی قیمت کے ذریعے نفع حاصل کرو ۔ ( علامہ ہیثمی فرماتے ہیں : ) میں یہ کہتا ہوں : صحیح میں سیدنا عبداللہ بن عمر رضی اللہ عنہما سے اس کی مانند روایت منقول ہے ، اور سیدنا عبداللہ بن عباس رضی اللہ عنہما سے منقول حدیث کو امام طبرانی نے معجم اوسط میں نقل کیا ہے ۔ اس کی سند میں ایک راوی أحمد بن عبیداللہ عبری ہے میں اس سے واقف نہیں ہوں ۔ اس روایت کے بقیہ رجال ثقہ ہیں ۔

سیدنا ابوامامہ رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص اللہ تعالیٰ اور آخرت کے دن پر ایمان رکھتا ہو ، وہ ریشم اور سونا نہ پہنے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ابن لہیعہ ہے اس کی نقل کردہ حدیث حسن ہے اس میں ضعف پایا جاتا ہے اس روایت کے بقیہ رجال ثقہ ہیں ۔

سیدنا حذیفہ رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا ، اُس نے عرض کی : یا رسول اللہ ! قحط سالی نے ہمیں کھا لیا ہے ۔ نبی اکرم صلی اللہ علیہ وسلم نے ارشاد فرمایا : ” تم پر دنیا کشادہ کر دی جائے گی اور افسوس کہ میری امت اس وقت صرف دیباج پہنے گی “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عبیدہ بن معتب ہے ، اور وہ متروک ہے ۔

سیدنا ابودرداء رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا اس نے عرض کی : یا رسول اللہ ! قحط سالی نے ہمیں کھا لیا ہے ۔ نبی اکرم صلی اللہ علیہ وسلم نے فرمایا : ” اس کے علاوہ کے حوالے سے مجھے تم لوگوں کے بارے میں خوف ہے اور وہ یہ کہ میری امت پر دنیا کو انڈیل دیا جائے گا ، اور افسوس کہ میری امت صرف ریشم پہنے گی“ ۔
یہ روایت امام طبرانی نے نقل کی ہے ۔ اس کی سند میں ایک راوی ایسا ہے جس کا نام بیان نہیں کیا گیا ہے ، اور ایک راوی مسعودی ہے جو اختلاط کا شکار ہو گیا تھا اس روایت کے بقیہ رجال ثقہ ہیں ۔

سیدنا عمر بن خطاب رضی اللہ عنہ بیان کرتے ہیں : نبی اکرم صلی اللہ علیہ وسلم ہمارے پاس تشریف لائے آپ کے دست مبارک میں دو تھیلیاں تھیں ان میں سے ایک میں سونا تھا ، اور دوسرے میں ریشم تھا آپ نے فرمایا : یہ دونوں میری امت کے مردوں پر حرام ہیں اور خواتین کے لئے حلال ہیں ۔
یہ روایت امام بزار نے نقل کی ہے ۔ اور امام طبرانی نے معجم صغیر اور معجم اوسط میں نقل کی ہے ۔ اس کی سند میں ایک راوی عمرو بن جریر ہے ، اور وہ متروک ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے اپنے دست مبارک میں سونے کا ایک ٹکڑا اور ریشم کا ایک ٹکڑا نکالا اور ارشاد فرمایا : یہ دونوں میری امت کے مردوں پر حرام ہیں اور ان کی خواتین کے لیے حلال ہیں ۔
یہ روایت امام بزار نے نقل کی ہے ۔ اور امام طبرانی نے معجم کبیر اور معجم اوسط میں دو اسناد کے ساتھ نقل کی ہے ۔ جن میں سے ایک راوی اسماعیل بن مسلم مکی ہے ، اور وہ ضعیف ہے اس کے بارے میں یہ کہا: گیا ہے یہ صدوق ہے ، لیکن وہم کا شکار ہو جاتا ہے ، اور دوسری روایت میں ایک راوی اسلام طویل ہے ، اور وہ متروک ہے ان دونوں روایات کے بقیہ رجال ثقہ ہیں ۔

سیدنا زید بن ارقم رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” سونا اور ریشم میری امت کی خواتین کے لئے حلال ہیں اور اس ( یعنی میری اُمت ) کے مردوں پر حرام ہیں “ ۔
یہ روایت امام طبرانی نے نقل کی ہے ۔ اس کی سند میں ایک راوی ثابت بن زید بن ارقم ہے ، اور وہ ضعیف ہے ۔

سیدنا عثمان رضی اللہ عنہ بیان کرتے ہیں : نبی اکرم صلی اللہ علیہ وسلم نے ریشم سے منع کیا ہے ، البتہ دو انگلیوں جتنے کا معاملہ مختلف ہے ۔
یہ روایت امام بزار نے نقل کی ہے ۔ اور اس کے رجال صحیح کے رجال ہیں ۔

امتہ اللہ بنت مذعور ، اپنی والدہ کا یہ بیان نقل کرتی ہیں : میں سیدہ ام سلمہ رضی اللہ عنہا کی خدمت میں حاضر ہوئی وہ ایک قمیص اور چادر میں نماز ادا کر رہی تھیں میں نے ان سے کپڑوں میں موجود نشانات ( یعنی کشیدہ کاری ) کے بارے میں دریافت کیا ، تو انہوں نے فرمایا : نبی اکرم صلی اللہ علیہ وسلم کے زمانہ اقدس میں ہم خواتین اس طرح کے کپڑے پہن لیا کرتی تھیں انہوں نے اپنے جسم پر موجود کپڑے کے بارے میں یہ بات کہی ، جس میں ریشم کی کشیدہ کاری تھی ۔
یہ روایت امام طبرانی نے نقل کی ہے ۔ امتہ اللہ نامی خاتون اور اس کی والدہ ان دونوں سے میں واقف نہیں ہوں ، اس روایت کے بقیہ رجال ثقہ ہیں ۔