مجمع الزوائد ومنبع الفوائد

یزید بن شخیر ایک دیہاتی کے حوالے سے یہ بات نقل کرتے ہیں کہ نبی اکرم صلی اللہ علیہ وسلم کے جوتے گانٹھے ہوئے تھے ۔
یہ روایت امام أحمد نے نقل کی ہے ۔ اور اس کے رجال صحیح کے رجال ہیں ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم کے جوتوں میں سے ( ہر جوتے ) کے دو تسمے ہوتے تھے ۔ سیدنا ابوبکر رضی اللہ عنہ کے جوتے کے بھی دو تسمے ہوتے تھے اور سیدنا عمر رضی اللہ عنہ کے جوتے کے بھی دو تسمے ہوتے تھے سب سے پہلے ایک گرہ لگانے والے سیدنا عثمان رضی اللہ عنہ ہیں ۔
یہ روایت امام طبرانی نے معجم صغیر میں نقل کی ہے ۔ اور امام بزار نے اختصار کے ساتھ نقل کی ہے ۔ امام طبرانی کے رجال ثقہ ہیں ۔

سیده ضباعہ بنت زبیر بن عبدالمطلب رضی اللہ عنہا بیان کرتی ہیں : نبی اکرم صلی اللہ علیہ وسلم کے جوتے کا تسمہ ہوتا تھا ۔
یہ روایت امام طبرانی نے معجم اوسط میں نقل کی ہے ۔ اس کی سند میں دو راوی ساقط ہیں جو زبیر بن بکار کے بعد ہیں باقی اللہ بہتر جانتا ہے ۔

سیدنا عبداللہ بن عمرو رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” زیادہ تر جوتا استعمال کیا کرو کیونکہ تم میں سے جو شخص جوتا پہنے ہوئے ہوتا ہے وہ مسلسل سوار ( کی طرح آرام دہ حالت میں ) ہوتا ہے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی اسماعیل بن مسلم مکی ہے ، اور وہ ضعیف ہے ۔

سیدنا عمران بن حصین رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” کثرت سے جوتے استعمال کرو ( یعنی زیادہ تر جوتا استعمال کیا کرو ) کیونکہ تم میں سے کوئی ایک شخص جب تک جوتا پہنے ہوئے ہوتا ہے وہ مسلسل سوار کی طرح ( آرام دہ حالت میں ) ہوتا ہے “ ۔
یہ روایت امام طبرانی نے نقل کی ہے ۔ اس کی سند میں ایک راوی مجاعہ بن زبیر ہے ۔ امام أحمد کہتے ہیں : اس کی ذات میں کوئی حرج نہیں ہے ابن عدی کہتے ہیں : یہ ان افراد میں سے ایک ہے ، جن سے علم حاصل کیا جائے ، اور جن کی حدیث کو نوٹ کیا جائے گا امام دارقطنی رحمہ اللہ نے اسے ضعیف قرار دیا ہے ، اور اس روایت کے بقیہ رجال ثقہ ہیں ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مجھے جوتا اور انگوٹھی ( پہننے ) کا حکم دیا گیا ہے “ ۔
یہ روایت امام طبرانی نے معجم صغیر اور معجم اوسط میں نقل کی ہے ۔ اس کی سند میں ایک راوی عمر بن ہارون بلخی ہے ، اور وہ ضعیف ہے ۔

عبداللہ بن مسلم بن ہرمز بن یحیی بن عبید بن عطاء اپنے والد کے حوالے سے اپنے دادا کا یہ بیان نقل کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ” جوتوں کے تسمے رکھو “ ۔

ایک روایت میں یہ الفاظ ہیں : اہل طائف سے تعلق رکھنے والے ایک شخص نے مجھے اپنے والد کے حوالے سے اپنے دادا کے حوالے سے یہ حدیث بیان کی ہے کہ انہوں نے نبی اکرم صلی اللہ علیہ وسلم کو منی میں لوگوں کے ساتھ گفتگو کرتے ہوئے سنا آپ نے ارشاد فرمایا : اپنے جوتوں کے تسمے رکھو ۔ یہ تمام روایات امام طبرانی نے نقل کی ہیں اور عبداللہ بن ہرمز نامی راوی ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : جو شخص زرد ( یا پیلا ) جوتا پہنتا ہے وہ جب تک اسے پہنے رکھتا ہے مسلسل سرور کے عالم کو محسوس کرتا ہے ( یا جب تک وہ اس کو پہنے رکھے گا خوشی کے عالم میں رہے گا ) ۔
یہ روایت امام طبرانی نے نقل کی ہے ۔ اس کی سند میں ایک راوی ابن عذراء ہے جس کا نام بیان نہیں کیا گیا میں اس سے واقف نہیں ہوں ۔ اس روایت کے بقیہ رجال ثقہ ہیں ۔

سیدنا دحیہ کلبی رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو ایک اونی جبہ اور دو موزے تحفے کے طور پر پیش کیے آپ نے انہیں اس وقت تک پہنے رکھا جب تک وہ پھٹ نہیں گئے آپ نے ان دونوں کے بارے میں یہ دریافت نہیں کیا کہ ( جس جانور کے چمڑے سے وہ بنے تھے ) ہم نے اسے ذبح کیا تھا یا نہیں کیا تھا ۔
یہ روایت امام طبرانی نے نقل کی ہے ۔ اس کی سند میں ایک راوی عیینہ بن سعد ہے ، جس نے امام شعبی سے روایت نقل کی ہے ۔ اور اس سے یحیی بن ضریس نے روایت نقل کی ہے ۔ میں اس سے واقف نہیں ہوں ۔ اس روایت کے بقیہ رجال ثقہ ہیں ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب میری امت کے مرد اور خواتین موزے پہنیں اور اپنے جوتوں کو گانٹھ لیں ، تو اللہ تعالیٰ انہیں چھوڑے رکھے گا “ ۔
یہ روایت امام طبرانی نے نقل کی ہے ۔ اس کی سند میں ایک راوی عثمان بن عبداللہ شامی ہے ، اور وہ ضعیف ہے ۔