مجمع الزوائد ومنبع الفوائد

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم نے دو قسم کے کپڑوں سے منع کیا ہے ، وہ جس کی خوبصورتی مشہور ہو اور وہ جس کا برا ہونا مشہور ہو ۔
یہ روایت امام طبرانی نے نقل کی ہے ۔ اس کی سند میں ایک راوی بزیج ہے ، اور وہ ضعیف ہے ۔

ابوسعید تمیمی بیان کرتے ہیں : میں نے سیدنا امام حسن رضی اللہ عنہ اور سیدنا امام حسین رضی اللہ عنہ کو یہ بیان کرتے ہوئے سنا ہے وہ بیان کرتے ہیں : ہم نے نبی اکرم صلی اللہ علیہ وسلم کو یہ ارشاد فرماتے سنا ہے ” جو شخص مشہور لباس پہنے گا قیامت کے دن اللہ تعالیٰ اس سے منہ موڑ لے گا“ ۔
یہ روایت امام طبرانی نے نقل کی ہے ۔ اس کی سند میں ایک راوی سفیان بن وکیع ہے ، اور وہ ضعیف ہے ۔

سیدہ ام سلمہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : ” جو شخص کوئی ایسا کپڑا پہنے جس کے ذریعے وہ فخر کا اظہار کرے اور لوگ اس کی طرف دیکھیں ، تو اللہ تعالیٰ اس کی طرف نظر رحمت نہیں کرے گا ، جب تک وہ اس کو اتار نہیں دیتا خواہ اس کو جب بھی اتارے “ ۔
یہ روایت امام طبرانی نے نقل کی ہے ۔ اس کی سند میں ایک راوی عبدالخالق بن زید بن واقد ہے ، اور وہ ضعیف ہے ۔

ابویعفور بیان کرتے ہیں : میں نے سیدنا عبداللہ بن عمر رضی اللہ عنہما کو سنا ایک شخص نے ان سے دریافت کیا : میں کون سا کپڑا پہنوں ؟ انہوں نے فرمایا : وہ جس کی وجہ سے بے وقوف لوگ تمہیں پرے نہ کریں ، اور بردبار لوگ اس کی وجہ سے تم پر اعتراض نہ کریں ، اس نے دریافت کیا : وہ کون سا کپڑا ہے ؟ انہوں نے فرمایا : وہ جو پانچ دراہم سے لے کر بیس درہم میں آ جائے ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں ۔