مجمع الزوائد ومنبع الفوائد

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم لوگ عمامہ باندھو ! تمہاری بردباری ( یا عزت ) میں اضافہ ہو گا “ ۔
یہ روایت امام بزار اور امام طبرانی نے نقل کی ہے ۔ اس کی سند میں ایک راوی عبیداللہ بن ابوحمید ہے ، اور وہ متروک ہے ۔ امام طبرانی کی سند میں ایک راوی عمران بن ابوتمام ہے ۔ ابوحاتم نے ایک حدیث کی وجہ سے اسے ضعیف قرار دیا ہے جو اس حدیث کے علاوہ ہے اس روایت کے بقیہ رجال ثقہ ہیں ۔

ابوملیح بن اسامہ اپنے والد کا یہ بیان نقل کرتے ہیں : نبی اکرم صلی اللہ علیہ وسلم نے ارشاد فرمایا : ” تم لوگ عمامہ باندھو ! تمہارے حلم ( بردباری یا عزت ) میں اضافہ ہو گا “ ۔
یہ روایت امام طبرانی نے نقل کی ہے ۔ اس کی سند میں ایک راوی عبیداللہ بن ابوحمید ہے ، اور وہ متروک ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے سیدنا عبدالرحمن بن عوف رضی اللہ عنہ کو عمامہ باندھا ، تو ان کا چار انگل کا شملہ لٹکایا اور یہ بات بیان کی کہ جب میں آسمان پر گیا ، تو میں نے اکثر فرشتوں کو عمامہ باندھے ہوئے دیکھا ۔
یہ روایت امام طبرانی نے معجم اوسط میں اپنے استاد مقدام بن داؤد کے حوالے سے نقل کی ہے ۔ اور وہ ضعیف ہے ۔

سیدنا ثوبان رضی اللہ عنہ جو نبی اکرم صلی اللہ علیہ وسلم کے غلام ہیں وہ بیان کرتے ہیں : نبی اکرم صلی اللہ علیہ وسلم جب عمامہ باندھتے تھے ، تو اپنے آگے یا اپنے پیچھے عمامہ کو لٹکاتے تھے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی حجاج بن رشدین ہے ، اور وہ ضعیف ہے ۔

سیدنا عبداللہ بن عمر رضی اللہ عنہما بیان کرتے ہیں : میں نبی اکرم صلی اللہ علیہ وسلم کی مسجد میں موجود دس افراد میں سے ایک تھا سیدنا ابوبکر رضی اللہ عنہ تھے ۔ سیدنا عمر رضی اللہ عنہ تھے ۔ سیدنا عثمان رضی اللہ عنہ تھے ۔ سیدنا علی رضی اللہ عنہ تھے ۔ سیدنا عبداللہ بن مسعود رضی اللہ عنہ تھے ۔ سیدنا معاذ بن جبل رضی اللہ عنہ تھے ۔ سیدنا حذیفہ رضی اللہ عنہ تھے ۔ سیدنا عبدالرحمن بن عوف رضی اللہ عنہ تھے ، میں تھا ، اور سیدنا ابوسعید خدری رضی اللہ عنہ تھے اسی دوران انصار سے تعلق رکھنے والا ایک شخص آیا اس نے سلام کیا اور پھر وہ بیٹھ گیا ۔ ۔ ۔ ۔ ۔ ۔ ۔ ۔ ۔ اس کے بعد راوی نے پوری حدیث ذکر کی ہے ، جس میں آگے چل کر یہ الفاظ ہیں : نبی اکرم صلی اللہ علیہ وسلم نے سیدنا عبدالرحمن بن عوف رضی اللہ عنہ کو یہ حکم دیا کہ وہ ایک جنگی مہم کے لئے سامان تیار کریں ، نبی اکرم صلی اللہ علیہ وسلم نے انہیں اس مہم کا امیر مقرر کیا تھا ، اگلے دن انہوں نے سیاہ رنگ کا اونی عمامہ باندھا ، وہ نبی اکرم صلی اللہ علیہ وسلم کی خدمت میں حاضر ہوئے نبی اکرم نے ان کا عمامہ کھول کر خود اُن کا عمامہ باندھا اور پیچھے چار انگل ، یا اس کے آس پاس شملہ رکھا ، پھر یہ ارشاد فرمایا : اے ابن عوف ! اس طرح تم عمامہ باندھو ! یہ عربوں کے معمول کے مطابق اور زیادہ عمدہ ہو گا ، پھر نبی اکرم صلی اللہ علیہ وسلم نے سیدنا بلال رضی اللہ عنہ کو حکم دیا انہوں نے جھنڈا اُن کے سپرد کیا انہوں نے اللہ تعالیٰ کی حمد بیان کی ، نبی اکرم صلی اللہ علیہ وسلم پر درود بھیجا ، پھر نبی اکرم صلی اللہ علیہ وسلم نے ارشاد فرمایا : اے ابن عوف ! اسے لے لو ! اور سب لوگوں کے ساتھ اللہ کی راہ میں جنگ کرو ، اس شخص کے ساتھ قتال کرو ، جو اللہ کا انکار کرتا ہے ، تم عہد شکنی نہ کرنا ، تم مثلہ نہ کرنا ، یہ اللہ کا حکم اور تم لوگوں کے بارے میں اس کے نبی صلی اللہ علیہ وسلم کی سنت ہے “ ۔ ( علامہ ہیثمی فرماتے ہیں : ) میں یہ کہتا ہوں : امام ابن ماجہ نے اس روایت کا ایک حصہ نقل کیا ہے ۔
یہ روایت امام طبرانی نے معجم اوسط میں نقل کی ہے ۔ اور اس کی سند حسن ہے ۔

ابوعبدالسلام بیان کرتے ہیں : میں نے سیدنا عبداللہ بن عمر رضی اللہ عنہما سے دریافت کیا : نبی اکرم صلی اللہ علیہ وسلم کیسے عمامہ باندھتے تھے ؟ انہوں نے فرمایا : نبی اکرم صلی اللہ علیہ وسلم عمامے کے پیچ کو اپنے سر پر لپیٹتے تھے اور پھر پیچھے کی طرف اس کو اندر کر کے دونوں کندھوں کے درمیان اسے چھوڑ دیتے تھے ۔
یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں ، صرف ابوعبدالسلام کا معاملہ مختلف ہے ، اور وہ ثقہ ہے

سیدنا ابوموسی اشعری رضی اللہ عنہ بیان کرتے ہیں : سیدنا جبرائیل نبی اکرم صلی اللہ علیہ وسلم پر نازل ہوئے انہوں نے سیاہ عمامہ باندھا ہوا تھا ، اور اس کا شملہ پیچھے لٹکایا ہوا تھا ۔
یہ روایت امام طبرانی نے نقل کی ہے ۔ اس کی سند میں ایک راوی عبیداللہ بن تمام ہے ، اور وہ اس حدیث اور دیگر احادیث کے حوالے سے ضعیف ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : تم پر عمامہ باندھنا لازم ہے ، کیونکہ یہ فرشتوں کا علامتی نشان ہے ، اور تم انہیں اپنی پشت پر لٹکا کے رکھو ( یعنی شملہ رکھو ) “ ۔
یہ روایت امام طبرانی نے نقل کی ہے ۔ اس کی سند میں ایک راوی عیسیٰ بن یونس ہے ۔ امام دارقطنی رحمہ اللہ کہتے ہیں : وہ مجہول ہے ۔ امام ذہبی نے یحیی بن عثمان بن صالح مصری جو امام طبرانی کے استاد ہیں ان کے حالات میں یہ حدیث ذکر کی ہے ، اور اس کے ہمراہ انہوں نے اس کی توثیق کی ہے ۔

سیدنا ابوامامہ رضی اللہ عنہ بیان کرتے ہیں : نبی اکرم صلی اللہ علیہ وسلم کسی بھی شخص کو کسی کام کا نگران اس وقت تک مقرر نہیں کرتے تھے جب تک اسے عمامہ نہیں باندھ دیتے تھے اور دائیں جانب کان کی طرف شملہ نہیں لٹکا دیتے تھے ۔
یہ روایت امام طبرانی نے نقل کی ہے ۔ اس کی سند میں ایک راوی جمیع بن ثقت ہے ، اور وہ متروک ہے ۔ ( علامہ ہیثمی فرماتے ہیں : ) میں یہ کہتا ہوں ۔ اس سے پہلے سیدنا ابودرداء رضی اللہ عنہ سے منقول یہ حدیث گزر چکی ہے : ” بے شک اللہ تعالیٰ اور اس کے فرشتے جمعہ والے دن عمامہ والے افراد پر رحمت نازل کرتے ہیں یہ کتاب الجمعہ میں گزری ہے ۔