مجمع الزوائد ومنبع الفوائد

سیدنا عقبہ بن عامر رضی اللہ عنہ بیان کرتے ہیں : نبی اکرم صلی اللہ علیہ وسلم نے داغ لگوانے سے منع فرمایا ہے ، اور آپ نے گرم پانی پینے سے منع فرمایا ہے ، جب آپ سرمہ لگاتے تھے ، تو طاق تعداد میں لگاتے تھے اور جب ( استنجاء کرنے کے بعد ) ڈھیلے استعمال کرتے تھے ، تو طاق تعداد میں کرتے تھے ۔
یہ روایت امام أحمد اور امام طبرانی نے نقل کی ہے ۔ اور اس کے رجال صحیح کے رجال ہیں صرف ابن لہیعہ کا معاملہ مختلف ہے ، اور اس کی نقل کردہ حدیث حسن ہے ۔

سیدنا سعد طفری رضی اللہ عنہ بیان کرتے ہیں : نبی اکرم صلی اللہ علیہ وسلم نے داغ لگوانے سے منع کیا ہے ، اور یہ ارشاد فرمایا ہے : میں گرم پانی پینے کو ناپسند کرتا ہوں ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اور اس کے رجال صحیح کے رجال ہیں ۔

سیدنا سلمہ بن اکوع رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بے شک آگ کسی کو شفاء نہیں دیتی ہے “ ۔
یہ روایت امام طبرانی نے نقل کی ہے ، اس کی سند میں ایک راوی عبداللہ بن یزید بکری ہے ، جسے امام ابوحاتم نے ضعیف قرار دیا ہے ۔

سیدنا عمران بن حصین رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا اس کے ساتھ اس کا بھائی بھی تھا ، جسے پیچش لگے ہوئے تھے انہوں نے عرض کی : یا رسول اللہ ! میرے بھائی کو پیچش لگے ہوئے ہیں ، ہم طبیبوں کے پاس گئے ، انہوں نے داغ لگوانے کی ہدایت کی ، کیا میں اسے داغ لگوا دوں ؟ نبی اکرم صلی اللہ علیہ وسلم نے فرمایا : تم اسے داغ نہ لگواؤ ! پھر نبی اکرم صلی اللہ علیہ وسلم نے اس شخص کو اس کے گھر واپس بھجوا دیا ایک اونٹ اس شخص کے پاس سے گزرا اس نے اس شخص کے پیٹ پر مارا ، تو اس کی وجہ سے اس کا پیٹ ٹھیک ہو گیا ، اسے نبی اکرم صلی اللہ علیہ وسلم کے پاس لایا گیا ، تو نبی اکرم صلی اللہ علیہ وسلم نے ارشاد فرمایا : اگر تم طبیبوں کے پاس گئے ہوتے ، تو تم نے یہ کہنا تھا کہ آگ نے اسے شفاء دی ہے ۔
یہ روایت امام طبرانی نے تینوں کتابوں میں نقل کی ہے ، اس کی سند میں ایک راوی عیسیٰ خزاز ہے ، اور وہ ضعیف ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” ( علاج میں ) داغ لگوانے کی جگہ ، کپڑا گرم کر کے ٹکور کرنے ، گلا ملنے کی جگہ ، ناک میں دوائی ڈالنے اور ( پیٹ کے ) پھولنے ( یا ورم ) کی صورت میں ، منہ کے ایک طرف روائی ٹپکانے ( کا طریقہ اختیار کیا جائے ) “ ۔
یہ روایت امام أحمد نے نقل کی ہے ۔ اور اس کے رجال صحیح کے رجال ہیں ، البتہ ابراہیم نامی راوی نے سیدہ عائشہ رضی اللہ عنہا سے سماع نہیں کیا ہے ۔

سیدنا ابوامامہ بن سہل بن حنیف رضی اللہ عنہ سیدنا ابوامامہ سعد بن زرارہ رضی اللہ عنہ کے حوالے سے یہ بات نقل کرتے ہیں : جو بیعت عقبہ کے نقباء میں سے ایک تھے ، انہیں کانٹا لگ گیا ، نبی اکرم صلی اللہ علیہ وسلم ان کے پاس ان کی عیادت کرنے کے لئے تشریف لائے آپ نے ارشاد فرمایا : بری میت یہودیوں کی ہوتی ہے ، یہ بات آپ نے دو مرتبہ ارشاد فرمائی ، وہ لوگ یہ کہتے ہیں : کہ ان صاحب نے اپنے ساتھی کی بیماری ختم کیوں نہیں کروائی ؟ حالانکہ میں اس کے لئے ( ذاتی طور پر ) کسی نقصان ، یا نفع کا مالک نہیں ہوں ، لیکن میں اس کے لیے کوئی حیلہ ( یعنی طریقہ علاج ) ضرور اختیار کروں گا ، پھر آپ نے اُن کے سر پر ، دو لکیروں میں داغ لگوائے ، تو ان صاحب کا انتقال ہو گیا ۔
یہ روایت امام أحمد نے نقل کی ہے ۔ اس کی سند میں ایک راوی زمعہ بن صالح ہے ، اور وہ ضعیف ہے ، ایک مرتبہ یحیی بن معین نے یہ کہا: ہے : یہ کم درجہ کا صالح ہے ، اور اس کی تضعیف میں انہوں نے لوگوں کی موافقت کی ہے ۔

نبی اکرم صلی اللہ علیہ وسلم کے ایک صحابی بیان کرتے ہیں : نبی اکرم صلی اللہ علیہ وسلم نے سیدنا سعد رضی اللہ عنہ کو ( راوی کو شک ہے ، شاید یہ الفاظ ہیں : ) سیدنا سعد بن زرارہ رضی اللہ عنہ کو ” ذبحہ “ نامی بیماری کی وجہ سے ، ان کے حلق میں داغ لگوایا اور فرمایا : ” میں سعد کے حوالے سے ( راوی کو شک ہے ، شاید یہ الفاظ ہیں : ) ( اسعد بن زرارہ کے حوالے سے اپنے من میں الجھن نہیں چھوڑوں گا “ ۔
یہ روایت امام أحمد نے نقل کی ہے اور اس کے رجال ثقہ ہیں ۔

سیدنا ابی بن کعب رضی اللہ عنہ بیان کرتے ہیں : نبی اکرم صلی اللہ علیہ وسلم نے انہیں داغ لگوایا تھا ۔
یہ روایت عبداللہ بن أحمد نے نقل کی ہے ۔ اور اس کے رجال صحیح کے رجال ہیں ۔

محمد بن عبدالرحمن بن اسد بن زرارہ بیان کرتے ہیں : میرے چچا نے مجھے یہ بات بتائی ہے سیدنا ابوامامہ رضی اللہ عنہ کو ایک تکلیف لاحق ہوئی جسے اہل مدینہ ذبح کہتے تھے ۔ نبی اکرم صلی اللہ علیہ وسلم نے فرمایا : مجھ تک ابوامامہ کے بارے میں عذر پہنچ جائے گا راوی کہتے ہیں : پھر نبی اکرم صلی اللہ علیہ وسلم نے اپنے دست مبارک کے ذریعے انہیں داغ لگایا اور ان کا انتقال ہو گیا تو نبی اکرم صلی اللہ علیہ وسلم نے ارشاد فرمایا : ” یہودیوں کے لئے بری موت ہے جو یہ کہتے ہیں : کہ ان صاحب نے اپنے ساتھی سے تکلیف کو دور کیوں نہیں کروایا میں اللہ تعالیٰ کے مقابلے میں اس کے لئے یا اپنے لئے کسی چیز کا مالک نہیں ہوں“ ۔
یہ روایت امام طبرانی نے نقل کی ہے ۔ اور اس کے رجال ثقہ ہیں ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ابن زرارہ کے بارے میں حکم دیا تھا کہ اسے داغ لگوایا جائے ۔
یہ روایت امام ابویعلیٰ نے نقل کی ہے ۔ اور اس کے رجال صحیح کے رجال ہیں ۔

سیدنا سہل بن حنیف رضی اللہ عنہ بیان کرتے ہیں : نبی اکرم صلی اللہ علیہ وسلم سیدنا اسعد بن زرارہ رضی اللہ عنہ کی عیادت کرنے کے لئے ان کے پاس تشریف لائے انہیں کانٹا لگنے کی وجہ سے تکلیف ہوئی تھی نبی اکرم صلی اللہ علیہ وسلم نے ان کی گردن پر داغ لگوایا تو ان کا انتقال ہو گیا نبی اکرم صلی اللہ علیہ وسلم نے ارشاد فرمایا : ” یہودیوں کے لئے بری موت ہے جو یہ کہتے ہیں : کہ انہوں نے اپنے ساتھی کو دواء دی اور اس دواء نے اس کو فائدہ نہیں دیا “ ۔
یہ روایت امام طبرانی نے نقل کی ہے ۔ اس کی سند میں ایک راوی زمعہ بن صالح ہے جمہور نے اسے ضعیف قرار دیا ہے ایک روایت کے مطابق یحیی بن معین نے اسے ثقہ کہا: ہے ، اور دوسری کے مطابق انہوں نے بھی اسے ضعیف کہا: ہے ۔

سیدنا ابوامامہ بن سہل بن حنیف رضی اللہ عنہ بیان کرتے ہیں : نبی اکرم صلی اللہ علیہ وسلم سیدنا اسعد بن زرارہ رضی اللہ عنہ کے پاس تشریف لائے ، جنہیں ایک تکلیف لاحق ہوئی جسے ” شوکہ “ کہا: جاتا ہے ۔ نبی اکرم صلی اللہ علیہ وسلم نے ان کی گردن پر داغ لگوایا تو ان کا انتقال ہو گیا نبی اکرم صلی اللہ علیہ وسلم نے ارشاد فرمایا : ” یہودیوں کے لئے بری میت ہے جو یہ کہتے ہیں : اس کے آقا نے اسے دواء دی اور اس نے اس کو فائدہ نہیں دیا “ ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں ۔

سیدنا کعب بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم سیدنا براء بن معرور رضی اللہ عنہ کی عیادت کرنے کے لئے گئے جنہیں ” ذبحہ “ نامی بیماری لاحق تھی ، نبی اکرم صلی اللہ علیہ وسلم نے حکم دیا کہ انہیں آگ کے ذریعے داغ لگایا جائے ، تاکہ وہ ٹھیک ہو جائیں ۔
یہ روایت امام طبرانی نے نقل کی ہے ۔ اس کی سند میں ایک راوی عیسیٰ بن عبداللہ ہے ، جو سیدنا نعمان بن بشیر رضی اللہ عنہ کی اولاد میں سے ہے ، اور وہ ضعیف ہے ۔

سیدنا عبداللہ بن مسعود رضی اللہ عنہ بیان کرتے ہیں : کچھ لوگ نبی اکرم صلی اللہ علیہ وسلم کی خدمت میں حاضر ہوئے انہوں نے عرض کی : ہمارے ایک ساتھی کو بیماری لاحق ہو گئی ہے کیا ہم اسے داغ لگوا دیں نبی اکرم صلی اللہ علیہ وسلم کچھ دیر خاموش رہے پھر آپ نے ارشاد فرمایا : اگر تم چاہو ، تو اسے داغ لگوا لو اور اگر چاہو ، تو اس پر گرم پتھر لگا دو ۔
یہ روایت امام طبرانی نے نقل کی ہے ۔ اور اس کے رجال ثقہ ہیں ، البتہ ابوعبیدہ نامی راوی نے اپنے والد ( سیدنا عبداللہ بن مسعود رضی اللہ عنہ ) سے سماع نہیں کیا ہے ۔

عطاء بن سائب بیان کرتے ہیں : میں ابوعبدالرحمن کے پاس آیا وہ ایک غلام کو داغ لگا رہے تھے میں نے دریافت کیا : کیا آپ داغ لگا رہے ہیں انہوں نے جواب دیا : جی ہاں ! یہ عربوں کا طریقہ علاج ہے ، سیدنا عبداللہ بن مسعود رضی اللہ عنہ نے یہ بات بیان کی ہے ۔ نبی اکرم صلی اللہ علیہ وسلم نے ارشاد فرمایا ہے : ” بے شک اللہ تعالیٰ نے جو بھی بیماری نازل کی ہے اس کے لئے دواء بھی نازل کی ہے جو شخص اس سے ناواقف رہے وہ نا واقف ہے ، اور جو شخص اس کو جان لے ، وہ جان لیتا ہے “ ۔
یہ روایت امام أحمد نے نقل کی ہے ۔ عطاء نامی راوی اختلاط کا شکار ہو گیا تھا اس روایت کے بقیہ رجال ثقہ ہیں ۔