مجمع الزوائد ومنبع الفوائد

سیدنا ابوبشیر انصاری رضی اللہ عنہ بیان کرتے ہیں : نبی اکرم صلی اللہ علیہ وسلم نے بخار کے بارے میں یہ بات ارشاد فرمائی ہے : ” اسے پانی کے ذریعے ٹھنڈا کرو ! کیونکہ یہ جہنم کی تپش کا حصہ ہے “ ۔
یہ روایت امام أحمد نے اور امام طبرانی نے نقل کی ہے ۔ اس کی سند میں ایک راوی ایسا ہے جس کا نام بیان نہیں کیا گیا ہے اس روایت کے بقیہ رجال ثقہ ہیں ۔

سیدنا سمرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بخار آگ کا ٹکڑا ہے ، تو تم ٹھنڈے پانی کے ذریعے اسے خود سے ٹھنڈا کرو “ ۔ ( راوی بیان کرتے ہیں : ) نبی اکرم صلی اللہ علیہ وسلم کو جب بخار ہوتا تھا تو آپ پانی کا مشکیزہ منگواتے تھے ، اور اسے اپنی مانگ ( یعنی سر پر بہا دیتے تھے اور غسل کر لیتے تھے ۔
یہ روایت امام طبرانی اور امام بزار نے نقل کی ہے ۔ اس کی سند میں ایک راوی اسماعیل بن مسلم ہے ، اور وہ متروک ہے ۔

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب تم میں سے کسی ایک شخص کو بخار ہو ، تو اسے صبح سے پڑا ہوا ، ٹھنڈا پانی ، اپنے اوپر بہا دینا چاہیے اور یہ عمل تین راتوں تک کرنا چاہیے “ ۔
یہ روایت امام طبرانی نے معجم اوسط میں نقل کی ہے ۔ اور اس کے رجال ثقہ ہیں ۔

سیدنا رافع بن خدیج رضی اللہ عنہ بیان کرتے ہیں : سیدنا نعیمان رضی اللہ عنہ نے عرض کی : یا رسول اللہ ! مجھے بخار کی وجہ سے شدید تکلیف ہے ۔ نبی اکرم صلی اللہ علیہ وسلم نے فرمایا : اے نعیمان ! تم مہیعہ میں کیا کر رہے ہو ؟ راوی کہتے ہیں : وہ ایک وبائی سرزمین تھی ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی عبداللہ بن یزید بکری ہے ، اور وہ ضعیف ہے ۔

سیدنا عبدالرحمن بن مرفع رضی الله عنہ بیان کرتے ہیں : نبی اکرم صلی اللہ علیہ وسلم اٹھارہ سو افراد سمیت غزوہ خبیر میں تشریف لے گئے آپ نے خبیر فتح کر لیا وہاں پر بہت سے پھل موجود تھے لوگ انہیں استعمال کرنے لگے پھر ان لوگوں کو بخار ہو گیا وہ لوگ نبی اکرم صلی اللہ علیہ وسلم کی خدمت میں حاضر ہوئے ، اور یہ بات آپ کے سامنے ذکر کی ، تو آپ نے ارشاد فرمایا : ” بخار موت کا پیش خیمہ ( یا ہر اول دستہ ) ہے ، اور زمین میں اللہ کا قید خانہ ہے ، تو تم مشکیزے میں موجود پانی کے ذریعے اسے ٹھنڈا کرو ، اور دو اذانوں ، یعنی مغرب کی اذان اور عشاء کی اذان کے درمیان وہ پانی اپنے اوپر بہاؤ “ ۔ ( راوی بیان کرتے ہیں : ) ان لوگوں نے ایسا ہی کیا ، تو وہ بخار ان سے ختم ہو گیا وہ لوگ نبی اکرم صلی اللہ علیہ وسلم کی خدمت میں حاضر ہوئے ، اور ان لوگوں نے نبی اکرم صلی اللہ علیہ وسلم کو اس بارے میں بتایا تو آپ نے ارشاد فرمایا : ” کوئی بھی بھرا ہوا برتن ، پیٹ سے زیادہ برا نہیں ہے اگر تم نے ضرور ایسا کرنا ہو ، تو اس ( یعنی پیٹ ) کا ایک تہائی حصہ کھانے کے لئے ایک تہائی حصہ پینے کے لئے ، اور ایک تہائی حصہ ہوا کے لئے ( راوی کو شک ہے ، شاید یہ الفاظ ہیں : ) سانس کے لئے رکھو “ ۔ راوی بیان کرتے ہیں : نبی اکرم صلی اللہ علیہ وسلم نے خیبر کو اٹھارہ حصوں میں تقسیم کیا تھا ۔
یہ روایت امام طبرانی نے نقل کی ہے ۔ اس کی سند میں ایک راوی محبر بن ہارون ہے ، اور میں اس سے واقف نہیں ہوں ۔ اس روایت کے بقیہ رجال ثقہ ہیں ۔

سیدنا عبدالله بن مرفوع رضی اللہ عنہ بیان کرتے ہیں نبی اکرم صلی اللہ علیہ وسلم نے خیبر فتح کر لیا آپ کے ہمراہ اٹھارہ سو افراد تھے ، تو خیبر کو اٹھارہ حصوں میں تقسیم کیا گیا ہر سو افراد کو ایک حصہ ملا ، راوی بیان کرتے ہیں : اس وقت وہاں پھل کثرت سے تھے ، لوگوں نے انہیں کھایا ، تو انہیں بخار ہو گیا لوگوں نے اس کی شکایت نبی اکرم صلی اللہ علیہ وسلم سے کی ، تو نبی اکرم صلی اللہ علیہ وسلم نے ارشاد فرمایا : ” اے لوگو ! بے شک یہ بخار ، موت کا پیش خیمہ ( یا ہر اول دستہ ) ہے ، اور یہ زمین میں اللہ کا قید خانہ ہے ، یہ جہنم کا ایک ٹکڑا ہے ، جب یہ تمہیں گرفت میں لے ، تو تم مشکیزے میں موجود پانی کے ذریعے اسے ٹھنڈا کرو ، اور تم وہ پانی دو نمازوں ( راوی کہتے ہیں : یعنی مغرب اور عشاء کے درمیان ) اپنے اوپر بہاؤ “ ۔
یہ روایت امام طبرانی نے نقل کی ہے ۔ اس کی سند میں ایک راوی فریح بن عبید ہے ، اور ایک راوی محبر بن ہارون ہے ، میں ان دونوں سے واقف نہیں ہوں ، اس روایت کے بقیہ رجال ثقہ ہیں ۔ اس سے پہلے بخار کے بارے میں کچھ احادیث ، جنائز سے متعلق باب میں گزر چکی ہیں ۔