مجمع الزوائد ومنبع الفوائد

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم جب بیمار ہوتے تھے ، تو مٹھی بھر کلونجی لے کر ، اس پر شہد اور پانی پی لیتے تھے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی یحیی بن سعید عطار ہے ، اور وہ ضعیف ہے ۔

سیدنا بریدہ رضی اللہ عنہ بیان کرتے ہیں : وہ نبی اکرم صلی اللہ علیہ وسلم کے ساتھ بیالیس افراد موجود تھے ۔ نبی اکرم صلی اللہ علیہ وسلم مقام ابراہیم کی طرف رخ کر کے نماز ادا کر رہے تھے یہ لوگ آپ کے پیچھے بیٹھے ہوئے آپ کا انتظار کر رہے تھے جب آپ نے نماز مکمل کر لی ، تو آپ نے اپنا ہاتھ اپنے اور خانہ کعبہ کے درمیان موجود جگہ کی طرف بڑھایا یوں جیسے آپ کچھ پکڑنا چاہ رہے ہوں جب آپ اپنے اصحاب کی طرف مڑے ، تو وہ لوگ اٹھنے لگے نبی اکرم صلی اللہ علیہ وسلم نے اپنے دست مبارک کے ذریعے ان کی طرف اشارہ کیا کہ تم لوگ بیٹھے رہو وہ لوگ بیٹھے رہے ۔ نبی اکرم صلی اللہ علیہ وسلم نے ارشاد فرمایا : جب تم لوگوں نے مجھے دیکھا کہ میں نماز سے فارغ ہوا تو میں نے اپنا ہاتھ خانہ کعبہ کی طرف بڑھایا یوں جیسے میں کچھ پکڑنا چاہتا ہوں لوگوں نے عرض کی : جی ہاں یا رسول اللہ ! نبی اکرم صلی اللہ علیہ وسلم نے ارشاد فرمایا : جنت کو میرے سامنے پیش کیا گیا میں نے اس میں موجود چیزوں جیسی کوئی چیز نہیں دیکھی پھر میرے سامنے انگوروں کا ایک گچھہ آیا وہ مجھے اچھا لگا میں نے اس کی طرف ہاتھ بڑھایا تاکہ میں اسے پکڑ لوں لیکن وہ میرے ہاتھ نہیں آیا اگر میں اسے پکڑ لیتا اور اسے تمہارے درمیان گاڑ دیتا تو تم جنت کے پھل کھاتے رہتے تم لوگ یہ بات جان لو کہ کھنبی آنکھ کے لئے دواء ہے ، اور عجوہ جنت کے پھلوں میں سے ہے ، اور یہ سیاہ دانہ ( کلونجی ) جو نمک میں ہو ، یہ موت کے علاوہ ہر بیماری کی دواء ہے ۔
یہ روایت امام أحمد نے نقل کی ہے ۔ اور اس کے رجال صحیح کے رجال ہیں ، البتہ امام أحمد بن حنبل فرماتے ہیں : زہیر نے واصل بن حیان سے سماع کیا ہے ، اور صالح بن حیان سے سماع کیا ہے ، تو انہوں نے ان دونوں کو ایک ہی فرد قرار دیدیا ہے ۔ میں یہ کہتا ہوں واصل ثقہ ہے ، اور صالح بن حیان ضعیف ہے ، اور
یہ روایت واصل کی ہے ، بظاہر یہی لگتا ہے باقی اللہ بہتر جانتا ہے ۔ انہوں نے
یہ روایت اختصار کے ساتھ صالح کی ساتھ صالح کی نقل کردہ روایت کے طور پر بھی نقل کی ہے ۔

سیدنا اسامہ بن شریک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” سیاہ دانہ ، موت کے علاوہ ہر بیماری کے لئے شفاء ہے “ ۔
یہ روایت امام طبرانی نے معجم اوسط میں نقل کی ہے ۔ اور اس کے رجال ثقہ ہیں ۔

عمرو بن حریث بیان کرتے ہیں : میرے والد نے مجھے نبی اکرم صلی اللہ علیہ وسلم کے حوالے سے یہ حدیث بیان کی ہے آپ نے ارشاد فرمایا ہے : ” کھنبی ، سلوی کا حصہ ہے ، اور اس کا پانی آنکھ کے لئے شفاء ہے “ ۔
یہ روایت امام أحمد نے نقل کی ہے ۔ اور امام طبرانی نے نقل کی ہے ۔ تاہم امام طبرانی نے یہ الفاظ نقل کیے ہیں : ” من کا حصہ ہے “ ۔ اس کی سند میں ایک راوی عطاء بن سائب ہے جو اختلاط کا شکار ہو گیا تھا اس روایت کے بقیہ رجال صحیح کے رجال ہیں ۔ اس سے پہلے سعید بن زید کے حوالے سے منقول حدیث کھانے سے متعلق باب میں گزر چکی ہے ۔