مجمع الزوائد ومنبع الفوائد

سیدنا ابوہریرہ رضی اللہ عنہ بیان کرتے ہیں : شراب کی حرمت کا حکم تین مرتبہ میں نازل ہوا نبی اکرم صلی اللہ علیہ وسلم مدینہ منورہ تشریف لائے ، تو لوگ شراب پیا کرتے تھے اور جوا کھیلتے تھے ۔ لوگوں نے نبی اکرم صلی اللہ علیہ وسلم سے ان دونوں چیزوں کے بارے میں دریافت کیا ، تو اللہ تعالیٰ نے اپنے نبی پر یہ آیت نازل کی : ” لوگ تم سے شراب اور جوئے کے بارے میں دریافت کرتے ہیں ، تم فرما دو ! ان دونوں میں بڑا گناہ ہے ، اور لوگوں کے لئے فائدہ بھی ہے ۔ ۔ ۔ ۔ ۔ ۔ ۔ ۔ ۔ “ یہ آیت کے آخر تک ہے ۔ تو لوگوں نے یہ کہا: اس میں ہم پر حرام قرار نہیں دیا گیا صرف یہ کہا: ہے ” ان دونوں میں بڑا گناہ ہے “ ۔ پھر لوگ شراب پیتے رہے یہاں تک کہ ایک مرتبہ ایک دن مہاجرین سے تعلق رکھنے والے ایک صاحب نے اپنے ساتھیوں کو مغرب کی نماز پڑھائی قرآت کرتے ہوئے وہ غلطی کر گئے اللہ تعالیٰ نے اس بارے میں ایک آیت نازل کی جس میں زیادہ سخت حکم تھا ( ارشاد باری تعالیٰ ہے : ) ” اے ایمان والو ! تم نماز کے قریب نہ جاؤ جب تم نشے کی حالت میں ہو جب تک تم یہ جان نہیں لیتے کہ تم کیا کہہ رہے ہو “ ۔ اس کے بعد بھی لوگ شراب پیتے رہے یہاں تک کہ ان میں سے کوئی شخص نماز ادا کرنے کے لئے اس وقت آتا تھا جب اس کا نشہ ختم ہو چکا ہوتا تھا پھر وہ آیت نازل ہوئی جو اس سے زیادہ سخت حکم والی آیت تھی ( ارشاد باری تعالیٰ ہے : ) ” اے ایمان والو ! بے شک شراب اور جوا اور بت اور پانسے گندگی ہیں اور شیطان کے عمل کا حصہ ہیں ، تو تم ان سے اجتناب کرو تاکہ تم فلاح پا جاؤ “ ۔ تو لوگوں نے کہا: اے ہمارے پروردگار ! ہم باز آ گئے ۔ لوگوں نے عرض کی : یا رسول اللہ ! کچھ لوگ اللہ کی راہ میں قتل ہو چکے ہیں یا اپنے بچھونوں پر مرے ہیں وہ لوگ شراب پیا کرتے تھے اور جوا کھیلا کرتے تھے ، اور اللہ تعالیٰ نے اسے ناپاک اور شیطان کے عمل کا حصہ قرار دیا ہے ، تو اللہ تعالیٰ نے اس بارے میں یہ آیت نازل کی : ” جو لوگ ایمان لائے ، اور انہوں نے نیک اعمال کیے ، تو ان پر کوئی گناہ نہیں ہو گا اس چیز کے بارے میں جو انہوں نے پہلے کھائی تھی جبکہ انہوں نے پرہیز گاری اختیار کی ہو ، وہ ایمان لائے ہوں اور نیک اعمال کیے ہوں“ ۔ یہ آیت کے آخر تک ہے تو نبی اکرم صلی اللہ علیہ وسلم نے ارشاد فرمایا : ” اگر یہ ان پر حرام قرار دیے گئے ہوتے ، تو وہ لوگ بھی اسے ترک کر دیتے جس طرح تم نے ترک کیا ہے “ ۔
یہ روایت امام أحمد نے نقل کی ہے ۔ سیدنا ابوہریرہ رضی اللہ عنہ کے غلام ابووہب پر کسی نے جرح نہیں کی ہے ، اور کسی نے اس کی توثیق نہیں کی ابونجیح نامی راوی کے حافظے کی خرابی کی وجہ سے اسے ضعیف قرار دیا گیا ہے ایک سے زیادہ افراد نے اسے ثقہ قرار دیا ہے سریج نامی راوی ثقہ ہے ۔

سیدنا انس بن مالک رضی اللہ عنہ بیان کرتے ہیں : میں لوگوں کو تین اور زبیب پلا رہا تھا ہم نے ان دونوں کو ملا کے مشروب تیار کیا تھا ۔ حاضرین میں ایک صاحب موجود تھے جن کو ابوبکر کہا: جاتا تھا جب انہوں نے وہ مشروب پیا تو یہ اشعار کہے : ” میں بکر کی والدہ کو سلام کہتا ہوں کیا تمہاری قوم کے بعد تمہیں سلامتی میں کوئی دلچسپی ہے رسول نے ہمیں یہ بات بتائی ہے کہ عنقریب ہمیں دوبارہ زندہ کیا جائے گا ، تو پھر صدی ( نامی پرندے ) اور ہامہ ( ایک قول کے مطابق اس سے مراد بھی پرندہ ہے اور ایک قول کے مطابق اس سے مراد ، انسانی کھوپڑی ہے ) کی زندگی کا کیا ہو گا “ ۔ راوی کہتے ہیں : ابھی ہم اسی حالت میں تھے اور لوگ شراب پی رہے تھے کہ اسی دوران مسلمانوں سے تعلق رکھنے والا ایک شخص ہمارے پاس آیا اور بولا: تم کیا کر رہے ہو اللہ تعالیٰ نے شراب کو حرام قرار دینے کا حکم نازل کر دیا ہے ، تو ہم نے شراب کے برتنوں سے علیحدگی اختیار کی اور ( شراب کو ) انڈیل دیا پھر ہم وہاں سے نکلے ہم نے نبی اکرم صلی اللہ علیہ وسلم کو پایا ۔ آپ منبر پر کھڑے ہوئے تھے اور یہ آیت تلاوت کر رہے تھے اور اس کی تکرار کر رہے تھے : ” شیطان یہ ارادہ کرتا ہے کہ تمہارے درمیان شراب اور جوئے کے حوالے سے عداوت اور دشمنی ڈال دے اور تمہیں اللہ کے ذکر سے اور نماز سے روک دے ، تو کیا تم باز آنے والے ہو “ ۔ ( علامہ ہیثمی فرماتے ہیں : ) میں یہ کہتا ہوں سیدنا انس رضی اللہ عنہ کے حوالے سے صحیح میں ایک حدیث مذکور ہے جو شراب کی حرمت کے بارے میں ہے ، لیکن وہ اس حدیث کے علاوہ ہے ۔
یہ روایت امام بزار نے نقل کی ہے ۔ اس کی سند میں ایک راوی مطر بن میمون ہے ، اور وہ ضعیف ہے ۔

سیدنا انس رضی اللہ عنہ بیان کرتے ہیں : ایک مرتبہ میں سیدنا ابوطلحہ رضی اللہ عنہ سیدنا ابوعبیدہ بن جراح رضی اللہ عنہ سیدنا معاذ بن جبل رضی اللہ عنہ سیدنا سہیل بن بیضاء رضی اللہ عنہ اور سیدنا ابودجانہ رضی اللہ عنہ کو شراب پلا رہا تھا ان حضرات کے سر ادھر ادھر مائل ہو رہے تھے اسی دوران ہم نے ایک اعلان کرنے والے کو یہ اعلان کرتے ہوئے سنا خبردار شراب حرام قرار دیدی گئی ہے ، تو نہ کوئی شخص باہر سے اندر آیا اور نہ ہی ہم میں سے کوئی شخص باہر نکلا ہم نے شراب کو بہا دیا گھڑے کو توڑ دیا ہم میں سے کسی نے وضو کیا کسی نے غسل کیا پھر ہم نے سیدہ ام سلیم رضی اللہ عنہا کے پاس موجود خوشبو لگائی پھر ہم نکل کر نبی اکرم صلی اللہ علیہ وسلم کی مسجد کی طرف گئے ، تو نبی اکرم صلی اللہ علیہ وسلم یہ پڑھ رہے تھے : ” اے ایمان والو ! بے شک شراب اور جوا اور بت اور پانسہ نجس ہیں اور شیطان کے عمل کا حصہ ہیں ، تو تم اس سے اجتناب کرو تاکہ تم فلاح پا لو “ ۔ یہ آیت آپ نے یہاں تک پڑھی : ” تو کیا تم باز آنے والے ہو “ ۔ ایک صاحب نے عرض کی : یا رسول اللہ ! اس شخص کا مقام کیا ہو گا ، جو ایسی حالت میں مر گیا کہ وہ شراب پیا کرتا تھا تو اللہ تعالیٰ نے یہ آیت نازل کی ” جو لوگ ایمان لائے ، اور انہوں نے نیک اعمال کیے ، تو ان پر کوئی گناہ نہیں ہو گا اس حوالے سے جو انہوں نے کھایا ہو “ یہ آیت کے آخر تک ہے ۔ راوی بیان کرتے ہیں ، تو ایک صاحب نے قتادہ سے کہا: کیا آپ نے خود سیدنا انس رضی اللہ عنہ کی زبانی یہ حدیث سنی ہے ؟ انہوں نے جواب دیا : جی ہاں ! ایک شخص نے سیدنا انس رضی اللہ عنہ سے دریافت کیا : کیا آپ نے خود نبی اکرم صلی اللہ علیہ وسلم سے یہ حدیث سنی ہے ۔ انہوں نے جواب دیا : جی ہاں ۔ ( راوی کو شک ہے شاید یہ الفاظ ہیں : ) مجھے اس شخص نے یہ بات بیان کی ہے جس نے جھوٹ نہیں بولا اللہ کی قسم ! ہم جھوٹ نہیں بولا: کرتے تھے اور ہمیں یہ پتہ بھی نہیں تھا کہ جھوٹ کیا ہوتا ہے ۔ ( علامہ ہیثمی فرماتے ہیں : ) میں یہ کہتا ہوں سیدنا انس رضی اللہ عنہ کے حوالے سے منقول حدیث صحیح میں بھی مذکور ہے ، لیکن وہ اس سیاق کے بغیر ہے ۔
یہ روایت امام بزار نے نقل کی ہے ۔ اور اس کے رجال ثقہ ہیں ۔

سیدنا انس بن مالک رضی اللہ عنہ بیان کرتے ہیں : شراب کو حرام قرار دیے جانے کا حکم نازل ہوا میں اپنے ساتھیوں میں سے کچھ افراد کے پاس آیا شراب ان کے سامنے موجود تھی میں نے اسے پاؤں مارا پھر میں نے کہا: تم لوگ نبی اکرم صلی اللہ علیہ وسلم کی خدمت میں چلو کیونکہ شراب کو حرام قرار دینے کا حکم نازل ہو گیا ہے ۔ ۔ ۔ ۔ ۔ ۔ ۔ ۔ ۔ ۔ اس کے بعد راوی نے حسب سابق حدیث ذکر کی ہے ۔
یہ روایت امام ابویعلیٰ نے نقل کی ہے ۔ اور اس کے رجال صحیح کے رجال ہیں صرف بن منصور طوسی کا معاملہ مختلف ہے ، اور وہ ثقہ ہے ۔

سیدنا عبداللہ بن عباس رضی اللہ عنہما بیان کرتے ہیں : جب شراب کو حرام قرار دیا گیا تو نبی اکرم صلی اللہ علیہ وسلم کے اصحاب ایک دوسرے کی طرف گئے ، اور بولے : شراب کو حرام قرار دیدیا گیا ہے ، اور اسے شرک کرنے کے برابر قرار دیا گیا ہے ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے چھ چیزوں کو حرام قرار دیا ہے شراب کو ، گدھوں کو ، جوئے کو ، مزامیر کو ، دف کو اور کوباء ( طبل ) کو ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی حفص بن عمر ، امام ہے ، اور وہ انتہائی ضعیف ہے اسے امام بزار نے انتہائی اختصار کے ساتھ نقل کیا ہے ، اور یہ الفاظ نقل کیے ہیں سیدنا عبداللہ بن عباس رضی اللہ عنہما فرماتے ہیں : ہر نشہ آور چیز حرام ہے ۔ اس روایت کی سند میں ایک راوی محمد بن عمار بن صبیح ہے جو امام بزار کا استاد ہے میں اس سے واقف نہیں ہوں ۔ اس روایت کے بقیہ رجال صحیح کے رجال ہیں ۔

سیدنا ابودرداء رضی اللہ عنہ یا شاید سیدنا معاذ بن جبل رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” میرے پروردگار نے بتوں کی عبادت کے بعد ، جس چیز سے سب سے پہلے مجھے منع کیا ہے وہ شراب پینا ہے ، اور لوگوں کے باہمی تنازعات ہیں “ ۔
یہ روایت امام بزار نے اور امام طبرانی نے نقل کی ہے ۔ اس کی سند میں ایک راوی عمرو بن واقد ہے ، اور وہ متروک ہے اس پر جھوٹا ہونے کا الزام عائد کیا گیا ہے محمد بن مبارک صوری کہتے ہیں : وہ صدوق تھا ، لیکن ان کا یہ قول مسترد کیا گیا ہے ، اور جمہور نے اس راوی کو ضعیف قرار دیا ہے ۔

سیدہ ام سلمہ رضی اللہ عنہما نبی اکرم صلی اللہ علیہ وسلم کا یہ فرمان نقل کرتی ہیں : ” میرے پروردگار نے بتوں کی عبادت کے بعد جس چیز کے بارے میں مجھے سب سے پہلے تلقین کی اور جس سے مجھے سب سے پہلے منع کیا وہ شراب پینا ہے جو لوگوں کے باہمی تنازعات کا باعث بنتی ہے “ ۔
یہ روایت امام طبرانی نے نقل کی ہے ۔ اس کی سند میں ایک راوی یحیی بن متوکل ہے جمہور کے نزدیک وہ ضعیف ہے یحیی بن معین سے ایک روایت میں اس کی توثیق نقل کی گئی ہے ، اور دوسری روایت کے مطابق انہوں نے یہ کہا: ہے کہ یہ کوئی چیز نہیں ہے ۔

سیدنا عبداللہ بن عباس رضی اللہ عنہما بیان کرتے ہیں : شراب کو بعینہ حرام قرار دیا گیا ہے خواہ وہ تھوڑی ہو یا زیادہ ہو اور ہر نشہ آور چیز حرام ہے ۔ ( علامہ ہیثمی فرماتے ہیں : ) میں یہ کہتا ہوں ” اطراف “ کے مصنف نے اس روایت کی نسبت امام نسائی رحمہ اللہ کی طرف کی ہے ، لیکن میں نے اس کو ( سنن نسائی میں ) نہیں دیکھا ۔
یہ روایت امام طبرانی نے مختلف اسانید کے ساتھ نقل کی ہے ۔ جن میں سے بعض کے رجال صحیح کے رجال ہیں ۔