مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم کے پاس ایک غزوہ کے دوران پنیر لایا گیا نبی اکرم صلی اللہ علیہ وسلم نے دریافت کیا : یہ کہاں سے لایا گیا ہے ؟ آپ کو بتایا گیا یہ اہل فارس تیار کرتے ہیں اور ہمارا یہ خیال ہے کہ اس میں مردار کی کوئی چیز ڈالی جاتی ہے ۔ نبی اکرم صلی اللہ علیہ وسلم نے فرمایا : اس میں چھری لگاؤ اور اللہ کا نام لے کے کھانا شروع کرو ۔

ایک روایت میں یہ الفاظ ہیں : ” پنیر لایا گیا آپ کے اصحاب نے اسے چھڑی کے ذریعے مارنا ( یعنی ، توڑنا ) شروع کیا “ ۔
یہ روایت امام أحمد نے نقل کی ہے ۔ امام بزار اور امام طبرانی نے نقل کی ہے ۔ وہ بیان کرتے ہیں : غزوہ طائف کے موقع پر ایسا ہوا تھا اس کی سند میں ایک راوی جابر جعفی ہے ، جسے جمہور نے ضعیف قرار دیا ہے ویسے اس کی توثیق کی گئی ہے ۔ امام أحمد کے رجال صحیح کے رجال ہیں ۔

نبی اکرم صلی اللہ علیہ وسلم کی زوجہ محترمہ سیدہ میمونہ رضی اللہ عنہا بیان کرتی ہیں : نبی اکرم صلی اللہ علیہ وسلم سے پنیر کے بارے میں دریافت کیا گیا ، تو آپ نے فرمایا : اسے چھری کے ذریعے کاٹ لو اور اللہ کا نام لے کر کھا لو ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی أحمد بن فرح حجازی ہے ، جسے محمد بن عوف اور ابن عدی نے ضعیف قرار دیا ہے ابن ابوحاتم نے اسے ثقہ کہا: ہے ۔ اس روایت کے بقیہ رجال ثقہ ہیں ۔

علی بن عبداللہ بارقی بیان کرتے ہیں : مکہ میں ایک خاتون نے مجھ سے مسئلہ دریافت کیا : میں نے اسے کہا: یہ سیدنا عبداللہ بن عمر رضی اللہ عنہما موجود ہیں تم ان کے پاس جا کر ان سے یہ حکم دریافت کرو وہ خاتون ان کی طرف بڑھی ، تو میں اس کے پیچھے چلا گیا تاکہ یہ بات سن لوں کہ وہ کیا کہتی ہے ؟ اس عورت نے کہا: آپ مجھے پنیر کے بارے میں حکم بیان کیجئے سیدنا عبداللہ رضی اللہ عنہ نے دریافت کیا : پنیر کیا ہوتا ہے ؟ اس نے جواب دیا : ہم دودھ سے اس ، اس طرح اسے تیار کرتے ہیں اور وہ لوگ انفحہ ( نام کے مخصوص درخت ) کو کاٹتے ہیں ، سیدنا عبداللہ رضی اللہ عنہ نے فرمایا : جو مسلمانوں اور اہل کتاب نے تیار کیا ہو اسے تم کھا لو اور جو ان لوگوں نے تیار نہ کیا ہو اسے تم نہ کھاؤ اس خاتون نے کہا: اے سیدنا عبداللہ ! آپ مجھے ٹڈی دل کے بارے میں فتوی دیجئے انہوں نے فرمایا : یہ پورا پاک ہوتا ہے ( یعنی اسے ذبح کرنے کی ضرورت نہیں ) اس خاتون نے کہا: اے سیدنا عبداللہ ! آپ مجھے سونے کے بارے میں فتوی دیجئے سیدنا عبداللہ رضی اللہ عنہ نے فرمایا : اسے مردوں کے لئے حرام قرار دیا گیا ہے اس کے بعد راوی نے پوری حدیث ذکر کی ہے ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں صرف امام طبرانی کے استاد کا معاملہ مختلف ہے ، اور وہ ثقہ ہے ۔

سیدنا عبداللہ بن مسعود رضی اللہ عنہ فرماتے ہیں : پنیر میں سے صرف وہ کھاؤ جسے مسلمانوں یا اہل کتاب نے تیار کیا ہو ۔
یہ روایت امام طبرانی نے نقل کی ہے ۔ اور اس کے رجال ثقہ ہیں ۔

سیدنا امام حسن بن علی رضی اللہ عنہ کے بارے میں یہ بات منقول ہے کہ ان سے پنیر کے بارے میں دریافت کیا گیا ، تو انہوں نے فرمایا : چھری لگاؤ بسم اللہ پڑھو اور کھا لو ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں ۔