مجمع الزوائد ومنبع الفوائد

سیدنا عبداللہ بن عمر رضی اللہ عنہا بیان کرتے ہیں : نبی اکرم صلی اللہ علیہ وسلم بکری کے سات حصوں کو ناپسند کرتے تھے ، تلی ، مثانہ ، ( مادہ کی ) ، شرمگاہ ( ” نر “ کی ) شرمگاہ ، خصیے ، غدہ ( یا معدہ ) اور خون ۔ نبی اکرم صلی اللہ علیہ وسلم کے نزدیک بکری کا سب سے زیادہ پسندیدہ حصہ ، اُس کا آگے والا حصہ ہوتا تھا ۔ راوی بیان کرتے ہیں : نبی اکرم صلی اللہ علیہ وسلم کے پاس کھانا لایا گیا ، لوگوں نے گوشت کے لقمے لینا شروع کیے ، نبی اکرم صلی اللہ علیہ وسلم نے فرمایا : گوشت میں سب سے زیادہ پاکیزہ پشت کا گوشت ہوتا ہے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی یحیی حمانی ہے ، اور وہ ضعیف ہے ۔

نسیکہ ام عمرو بن جلاس بیان کرتی ہیں : میں ، سیدہ عائشہ رضی اللہ عنہا کے پاس موجود تھی ، انہوں نے اپنی بکری ذبح کی نبی اکرم صلی اللہ علیہ وسلم گھر تشریف لائے ، آپ کے دست مبارک میں چھڑی تھی ، آپ نے اسے رکھ دیا پھر آپ نماز کی مخصوص جگہ کی طرف بڑھے وہاں آپ نے دو رکعت ادا کیں پھر آپ اپنے بستر کی طرف آئے ، اور اس پر تشریف فرما ہوئے ، پھر آپ نے دریافت کیا : کیا کچھ کھانے کے لئے ہے ؟ ہم نے آپ کی خدمت میں پیالہ پیش کیا جس میں جو کی روٹی تھی اور روٹی کا ٹکڑا تھا ، اور کرش ( جانور کے مخصوص حصے کا گوشت ) کا ٹکڑا تھا ، اور ایک پایا تھا ، وہ خاتون بیان کرتی ہیں : سیدہ عائشہ رضی اللہ عنہا نے کرش کا ٹکڑا لیا اور اسے نوچ کر کھانے لگیں ، اسی دوران انہوں نے بتایا کہ ہم نے آج بکری ذبح کی تھی اور اس کے علاوہ کچھ بھی نہیں رکھا ( یعنی باقی سارا گوشت صدقہ کر دیا ) وہ خاتون بیان کرتی ہیں : نبی اکرم صلی اللہ علیہ وسلم نے ارشاد فرمایا : جی نہیں ! بلکہ تم نے سارا کچھ رکھ لیا ، صرف اس کو نہیں رکھا ( یعنی جو صدقہ کیا ہے ، وہ اللہ تعالیٰ کی بارگاہ میں محفوظ ہو گیا ) ۔
یہ روایت امام طبرانی نے نقل کی ہے ۔ اس کی سند میں ایک راوی ابراہیم بن اسماعیل بن ابراہیم بن مجمع ہے ، اور وہ ضعیف ہے ۔

سیدنا عبداللہ بن جعفر رضی اللہ عنہ بیان کرتے ہیں : نبی اکرم صلی اللہ علیہ وسلم کو بکری ( کا گوشت ) اور روٹیاں تحفے کے طور پر دی گئیں ، تو نبی اکرم صلی اللہ علیہ وسلم نے کھانا شروع کیا لوگوں نے بھی کھانا شروع کیا سیدنا عبداللہ بن جعفر رضی اللہ عنہ نے نبی اکرم صلی اللہ علیہ وسلم کو یہ فرماتے ہوئے سنا : تم پر لازم ہے کہ پشت کا گوشت کھاؤ کیونکہ وہ زیادہ پاکیزہ ہوتا ہے ۔
یہ روایت امام طبرانی نے معجم اوسط میں ایک طویل حدیث کے ضمن میں نقل کی ہے ۔ جو مناقب کے بارے میں ہے اس کی سند میں ایک راوی اصرم بن حوشب ہے ، اور وہ متروک ہے ۔

ابوعمرو شیبانی بیان کرتے ہیں : سیدنا عبداللہ رضی اللہ عنہ نے ایک شخص کے پاس درہم دیکھے ، تو فرمایا : تم اس کا کیا کرو گے ؟ اس نے کہا: میں اس کے ذریعے گھی کا مٹکا خریدوں گا انہوں نے فرمایا : یہ درہم تم اپنی بیوی کو دو وہ اسے بچھونے کے نیچے رکھ دے پھر روزانہ ایک درہم کے عوض میں تم گوشت خرید لیا کرنا ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں ، البتہ عریب بن حمید کا معاملہ مختلف ہے ، اور وہ ثقہ ہے ۔ ( علامہ ہیثمی فرماتے ہیں : ) میں یہ کہتا ہوں مجھے دستی پکڑاؤ سے متعلق احادیث علامات نبوت سے متعلق باب میں آئیں گی ۔