مجمع الزوائد ومنبع الفوائد

زید بن صوحان کے غلام سالم بیان کرتے ہیں : میں اپنے آقا زید بن صوحان کے ساتھ بازار میں موجود تھا سیدنا سلمان فارسی رضی اللہ عنہ ہمارے پاس سے گزرے انہوں نے اناج کا ایک وسق خریدا تھا صوحان نے کہا: اے ابوعبداللہ ! آپ اللہ کے رسول کے صحابی ہو کے ایسا کر رہے ہیں ( یعنی اتنا زیادہ اناج ذخیرہ کر رہے ہیں ) تو انہوں نے فرمایا : جب نفس اپنا رزق محفوظ کر لیتا ہے ، تو وہ مطمئن ہو جاتا ہے ، اور عبادت کے لئے فارغ ہو جاتا ہے ، اور وسوسے اس سے مایوس ہو جاتے ہیں ۔
یہ روایت امام طبرانی نے نقل کی ہے ۔ سالم نامی راوی سے میں واقف نہیں ہوں ۔ اس کی سند میں ایک راوی ہذیل بن بلال ہے ، جسے امام أحمد اور دیگر حضرات نے ثقہ قرار دیا ہے یحیی بن معین اور ایک جماعت نے اسے ضعیف کہا: ہے ۔

سیدنا عبادہ بن صامت رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب تم رمضان کے مہینے میں مشرق کی سمت میں سرخ ستون ( یا عمودی لکیر ) دیکھو تو سال بھر کا اناج ذخیرہ کر لو کیونکہ وہ بھوک کا سال ہو گا “ ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی اُم عبداللہ بنت خالد بن معدان ہیں میں اس خاتون سے واقف نہیں ہوں ۔ اس روایت کے بقیہ رجال ثقہ ہیں ۔