مجمع الزوائد ومنبع الفوائد

سیدنا ابوبصرہ غفاری رضی اللہ عنہ بیان کرتے ہیں : جب میں نے ہجرت کی ، تو میں نبی اکرم صلی اللہ علیہ وسلم کی خدمت میں حاضر ہوا یہ میرے اسلام قبول کرنے سے کچھ پہلے کی بات ہے ۔ نبی اکرم صلی اللہ علیہ وسلم نے میرے لئے بکری کا دودھ دوہ لیا جو آپ اپنے اہل خانہ کے لئے دوہا کرتے تھے میں نے اسے پی لیا اگلے دن صبح میں نے اسلام قبول کر لیا نبی اکرم صلی اللہ علیہ وسلم کے گھر والوں نے کہا: گزشتہ رات ہم نے بھوکے رہ کر گزاری ہے پھر نبی اکرم صلی اللہ علیہ وسلم نے میرے لئے دودھ دوہ لیا پھر میں نے پیا تو میں سیر ہو گیا نہی اکرم صلی اللہ علیہ وسلم نے فرمایا : کیا تم سیر ہو گئے ہو ؟ میں نے عرض کی : یا رسول اللہ ! میں سیر ہو گیا ہوں ، اور میں آج کے دن سے پہلے کبھی اتنا سیر اور کبھی اتنا سیراب نہیں ہوا نبی اکرم صلی اللہ علیہ وسلم نے ارشاد فرمایا : کافر سات آنتوں میں کھاتا ہے ، اور مومن ایک آنت میں کھاتا ہے ۔
یہ روایت امام أحمد نے نقل کی ہے ۔ اور اس کے رجال صحیح کے رجال ہیں امام طبرانی نے معجم اوسط میں اس کا کچھ حصہ نقل کیا ہے ۔

سیدنا جہجاہ غفاری رضی اللہ عنہ بیان کرتے ہیں : وہ اپنی قوم کے کچھ افراد سمیت آئے وہ اسلام قبول کرنے کا ارادہ رکھتے تھے وہ لوگ مغرب کے بعد نبی اکرم صلی اللہ علیہ وسلم کے پاس موجود تھے جب نبی اکرم صلی اللہ علیہ وسلم نے سلام پھیرا تو آپ نے ارشاد فرمایا : ہر شخص اپنے ساتھ موجود فرد کا ہاتھ پکڑ کر لے جائے مسجد میں نبی اکرم صلی اللہ علیہ وسلم کے علاوہ اور میرے علاوہ کوئی باقی نہیں رہا میں ایک بھاری بھرکم لمبا تڑنگا شخص تھا کوئی بھی میرے لئے آگے نہیں بڑھا تھا ۔ نبی اکرم صلی اللہ علیہ وسلم مجھے اپنے ساتھ اپنے گھر لے گئے آپ نے میرے لئے بکری کا دودھ دوہ لیا وہ میں نے پی لیا یہاں تک کہ نبی اکرم صلی اللہ علیہ وسلم نے سات بکریوں کا دودھ میرے لئے دوہ لیا تو میں نے انہیں پی لیا پھر میرے پاس ہانڈی میں پکا ہوا سالن لایا گیا تو میں نے وہ بھی کھا لیا ام ایمن نے کہا: اللہ تعالیٰ اس شخص کو بھوکا رکھے جس نے اللہ کے رسول کو آج کی رات بھوکا رکھا ہے ۔ نبی اکرم صلی اللہ علیہ وسلم نے فرمایا : اے ام ایمن ! رک جاؤ اس نے اپنا رزق کھایا ہے ، اور ہمارا رزق اللہ کے ذمہ ہے اگلے دن صبح ہوئی ، تو وہ لوگ آئے سب لوگ اکھٹے ہوئے سیدنا جہجاہ رضی اللہ عنہ بھی اور ان کے ساتھی بھی اکھٹے ہوئے ہر شخص نے بتانا شروع کیا کہ جو اس نے کھایا تھا سیدنا جہجاہ رضی اللہ عنہ نے بتایا کہ میرے لئے سات بکریوں کا دودھ دوہ لیا گیا تھا تو وہ میں نے پی لیا اور ہنڈیا تیار کی گئی تھی وہ میں نے کھا لی پھر ان لوگوں نے نبی اکرم صلی اللہ علیہ وسلم کے ساتھ مغرب کی نماز ادا کی ، تو نبی اکرم صلی اللہ علیہ وسلم نے ارشاد فرمایا : ہر شخص اپنے ساتھ بیٹھے ہوئے شخص کا ہاتھ پکڑ لے پھر مسجد میں میرے علاوہ اور نبی اکرم صلی اللہ علیہ وسلم کے علاوہ اور کوئی باقی نہیں رہا میں ایک بھاری بھرکم لمبا تڑنگا شخص تھا میرے لئے کوئی آگے نہیں بڑھا نبی اکرم صلی اللہ علیہ وسلم مجھے اپنے ساتھ اپنے گھر لے گئے آپ نے میرے لئے ایک بکری کا دودھ دوہ لیا میں اس سے سیر بھی ہو گیا اور سیراب بھی ہو گیا تو ام ایمن نے کہا: یا رسول اللہ ! کیا یہ ہمارا وہی مہمان نہیں ہے ۔ نبی اکرم صلی اللہ علیہ وسلم نے ارشاد فرمایا : اس نے آج رات مومن کی آنت میں کھانا کھایا ہے ، اور اس سے پہلے اس نے کافر کی آنت میں کھایا تھا کافر سات آنتوں میں کھاتا ہے ، اور مومن ایک آنت میں کھاتا ہے ۔
یہ روایت امام طبرانی نے نقل کی ہے ۔ روایت کے یہ الفاظ ان کے نقل کردہ ہیں یہ امام بزار اور امام ابویعلیٰ نے بھی نقل کی ہے ۔ اس کی سند میں ایک راوی موسیٰ بن عبیدہ ربذی ہے ، اور وہ ضعیف ہے ۔

سیدنا عبداللہ بن عمرو رضی اللہ عنہ بیان کرتے ہیں : نبی اکرم صلی اللہ علیہ وسلم کی خدمت میں سات افراد حاضر ہوئے نبی اکرم صلی اللہ علیہ وسلم کے اصحاب میں سے ہر شخص نے ایک شخص کو اپنے ساتھ لے لیا نبی اکرم صلی اللہ علیہ وسلم نے ایک شخص کو اپنے ساتھ لے لیا نبی اکرم صلی اللہ علیہ وسلم نے اس سے دریافت کیا : تمہارا نام کیا ہے ؟ اس نے جواب دیا : ابوغزوان ن ۔ نبی اکرم صلی اللہ علیہ وسلم نے اس کے لئے سات بکریوں کا دودھ دوہ لیا اس نے ان سب کا دودھ پی لیا نبی اکرم صلی اللہ علیہ وسلم نے اس سے فرمایا : اے ابوغزوان ! کیا تم اسلام قبول کرنے میں دلچسپی رکھتے ہو اس نے عرض کی : جی ہاں اس نے اسلام قبول کر لیا نبی اکرم صلی اللہ علیہ وسلم نے اس کے سینے پر ہاتھ پھیرا اگلے دن صبح نبی اکرم صلی اللہ علیہ وسلم نے اس کے لئے ایک بکری کا دودھ دوہا تو وہ اس دودھ کو مکمل نہیں پی سکا ۔ نبی اکرم صلی اللہ علیہ وسلم نے فرمایا : اے ابوغزوان ! تمہیں کیا ہوا ہے اس نے عرض کی : اس ذات کی قسم ! جس نے آپ کو حق کے ہمراہ نبی بنا کر مبعوث کیا ہے میں سیر ہو گیا ہوں نبی اکرم صلی اللہ علیہ وسلم نے فرمایا : گزشتہ رات تم نے سات آنتوں میں کھایا تھا ، اور آج تم نے صرف ایک آنت میں کھایا ہے ۔
یہ روایت امام طبرانی نے اسی طرح نقل کی ہے ۔ امام بزار نے مختصر روایت کے طور پر نقل کی ہے ۔ اور اس کے رجال صحیح کے رجال ہیں ۔

سیدنا ابوسعید خدری رضی اللہ عنہ نے اس سے پہلے والی حدیث کی مانند روایت نقل کی ہے ۔ کہ نبی اکرم صلی اللہ علیہ وسلم نے ارشاد فرمایا ہے : ” مومن ایک آنت میں کھاتا ہے ، اور کافر سات آنتوں میں کھاتا ہے “ ۔
یہ روایت امام ابویعلیٰ نے کی ہے ۔ اس کی سند میں ایک راوی مجالد بن سعید ہے ، جسے جمہور نے ضعیف قرار دیا ہے ۔

سیدنا سمرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” مومن ایک آنت میں کھاتا ہے ، اور کافر سات آنتوں میں کھاتا ہے “ ۔
یہ روایت امام بزار نے اور امام طبرانی نے نقل کی ہے ۔ ان کی ایک روایت میں لفظ ” کافر “ کی جگہ لفظ ” منافق “ استعمال ہوا ہے اس روایت کی سند میں ایک راوی ولید بن محمد ایلی ہے جس کے حوالے سے ایک جماعت نے روایات نقل کی ہیں کسی نے اسے ضعیف قرار نہیں دیا لیکن ابن عدی نے اس کا تذکرہ کتاب الکامل میں کیا ہے ۔

سیدنا سکین ضمری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” مومن ایک آنت میں کھاتا ہے ، اور کافر سات آنتوں میں کھاتا ہے “ ۔
یہ روایت امام بزار نے اپنے استاد ہیثم بن صفوان بن ہبیرہ سے نقل کی ہے ۔ میں نے کسی کو ان کے حالات بیان کرتے ہوئے نہیں پایا ہے اس روایت کے بقیہ رجال ثقہ ہیں ۔

سیدہ میمونہ بنت حارث رضی اللہ عنہا بیان کرتی ہیں : ایک سال لوگ قحط سالی کا شکار ہو گئے ، تو دیہاتی لوگ مدینہ منورہ آ جاتے تھے ۔ نبی اکرم صلی اللہ علیہ وسلم کسی شخص کو حکم دیتے تھے وہ کسی شخص کا ہاتھ پکڑ کر اسے مہمان بنا لیتا تھا ، اور رات کا کھانا کھلاتا تھا ایک رات ایک دیہاتی آیا نبی اکرم صلی اللہ علیہ وسلم کے پاس تھوڑا سا کھانا تھا ، اور تھوڑا سا دودھ تھا اس دیہاتی نے اسے کھا لیا اور نبی اکرم صلی اللہ علیہ وسلم کے لئے کچھ بھی نہیں رہنے دیا پھر وہ ایک رات آپ کے ساتھ آیا یا دو راتیں آپ کے ساتھ آیا وہ ساری چیزیں کھا لیتا تھا میں نے نبی اکرم صلی اللہ علیہ وسلم کے سامنے کہا: اے اللہ ! تو اس دیہاتی کے کھانے میں برکت نہ رکھنا جو اللہ کے رسول کے کھانے کو کھا جاتا ہے ، اور آپ کو ویسے ہی چھوڑ دیتا ہے پھر ایک رات نبی اکرم صلی اللہ علیہ وسلم اسے ساتھ لے کے آئے ، تو اس نے تھوڑا سا کھانا کھایا میں نے نبی اکرم صلی اللہ علیہ وسلم کی خدمت میں عرض کی : یہ وہی ہے جو پہلے بھی آیا تھا اس شخص نے اسلام قبول کر لیا تھا ۔ نبی اکرم صلی اللہ علیہ وسلم نے ارشاد فرمایا : کافر سات آنتوں میں کھاتا ہے ، اور مومن ایک آنت میں کھاتا ہے “ ۔
یہ روایت امام طبرانی نے مکمل روایت کے طور پر نقل کی ہے ۔ امام أحمد نے اس کا آخری حصہ نقل کیا ہے ۔ امام طبرانی کے رجال صحیح کے رجال ہیں ۔

مجاہد بیان کرتے ہیں : میں نے سیدنا ابوسعید خدری رضی اللہ عنہ سے کہا: آپ کتنا تھوڑا کھانا کھاتے ہیں ؟ انہوں نے بتایا کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” کافر سات آنتوں میں کھاتا ہے ، اور مومن ایک آنت میں کھاتا ہے “ ۔
یہ روایت امام طبرانی نے معجم اوسط میں نقل کی ہے ۔ اور امام ابویعلیٰ نے سیدنا ابوموسیٰ اشعری رضی اللہ عنہ کی نقل کردہ حدیث کی مانند نقل کی ہے ۔ امام طبرانی کی سند ضعیف ہے ۔ امام ابویعلیٰ کی سند میں ایک راوی مجالد بن سعید ہے ، اور وہ بھی ضعیف ہے ۔

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” مومن ایک آنت میں کھاتا ہے ، اور کافر سات آنتوں میں کھاتا ہے “ ۔
یہ روایت امام طبرانی نے معجم اوسط میں نقل کی ہے ۔ اور اس کے رجال ثقہ ہیں ۔

عبداللہ بن ابوقیس نصری بیان کرتے ہیں : میں نے سیدنا عبداللہ بن زبیر رضی اللہ عنہما کو مکہ میں منبر پر کھڑے ہوئے دیکھا وہ خطبہ دے رہے تھے اور یہ ارشاد فرما رہے تھے : بے شک مومن ایک آنت میں کھاتا ہے ، اور کافر سات آنتوں میں کھاتا ہے ، میں نے تمہارے نبی کو اسی طرح ارشاد فرماتے ہوئے سنا ہے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی نصر بن محمد ہے ، جسے ابن حبان نے ثقہ قرار دیا ہے اور ابوحاتم نے اسے ضعیف کہا: ہے ۔