مجمع الزوائد ومنبع الفوائد

سیدنا عبداللہ بن عمرو رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جنت میں ایسے بالا خانے ہیں جن کا بیرونی حصہ اندر سے اور اندرونی حصہ باہر سے نظر آتا ہے سیدنا ابوموسیٰ اشعری رضی اللہ عنہ نے عرض کی : یا رسول اللہ ! وہ کسے ملیں گے ؟ نبی اکرم صلی اللہ علیہ وسلم نے ارشاد فرمایا : اس کو جو نرمی سے کلام کرے کھانا کھلائے ، اور اللہ تعالیٰ کے لئے قیام کی حالت میں رات گزار دے جبکہ لوگ سو رہے ہوں“ ۔
یہ روایت امام أحمد نے نقل کی ہے ۔ اس کی سند میں ایک راوی ابن لہیعہ ہے اس کی نقل کردہ حدیث حسن ہے اس روایت کے بقیہ رجال ثقہ ہیں ۔

سیدنا ابوہریرہ رضی اللہ عنہ بیان کرتے ہیں : میں نے عرض کی : اے اللہ کے نبی ! جب میں آپ کو دیکھتا ہوں ، تو میرا نفس خوش ہو جاتا ہے میری آنکھیں ٹھنڈی ہو جاتی ہیں آپ مجھے ہر چیز کے بارے بتائیے نبی اکرم صلی اللہ علیہ وسلم نے ارشاد فرمایا : ہر چیز پانی سے پیدا کی گئی ہے سیدنا ابوہریرہ رضی اللہ عنہ کہتے ہیں : میں نے عرض کی : آپ مجھے ایسی چیز کے بارے میں بتائیے کہ جب میں اسے اختیار کروں ، تو میں جنت میں داخل ہو جاؤں نبی اکرم صلی اللہ علیہ وسلم نے فرمایا : تم سلام کو پھیلاؤ کھانا کھلاؤ صلہ رحمی کرو رات کے وقت جب لوگ سو رہے ہوں ، اس وقت نماز ادا کرو ، تو تم سلامتی کے ساتھ جنت میں داخل ہو جاؤ گے ۔
یہ روایت امام أحمد نے نقل کی ہے ۔ اور اس کے رجال صحیح کے رجال ہیں صرف ابومیمونہ نامی راوی کا معاملہ مختلف ہے ، اور وہ ثقہ ہے ۔

حمزہ بن صہیب بیان کرتے ہیں : سیدنا صہیب رضی اللہ عنہ ابویحیی کنیت اختیار کرتے تھے اور ان کا یہ کہنا تھا کہ ان کا تعلق عربوں سے ہے ، اور وہ بہت زیادہ کھانا کھلایا کرتے تھے ۔ سیدنا عمر بن خطاب رضی اللہ عنہ نے ان سے کہا: اے صہیب ! کیا وجہ ہے کہ تم ابویحیی کنیت اختیار کرتے ہو حالانکہ تمہاری کوئی اولاد نہیں ہے ، اور تم یہ کہتے ہو کہ تمہارا تعلق عربوں سے ہے ، اور تم بہت زیادہ کھانا بھی کھلاتے ہو یہ ، تو مال میں اسراف کے مترادف ہے ، تو سیدنا صہیب رضی اللہ عنہ نے بتایا کہ نبی اکرم صلی اللہ علیہ وسلم نے میری کنیت ابویحیی رکھی تھی جہاں تک نسب کے بارے میں آپ کے قول کا تعلق ہے ، تو میرا تعلق نمر بن قاصد سے ہے جو اہل موصل سے ہیں لیکن مجھے کمسنی میں غلام بنا لیا گیا تھا ، لیکن مجھے اس وقت بھی مجھے اپنے اہل خانہ اور اپنی قوم کی سمجھ بوجھ تھی جہاں تک کھانے سے متعلق آپ کے قول کا تعلق ہے ، تو نبی اکرم صلی اللہ علیہ وسلم نے ارشاد فرمایا ہے : ” کھانا کھلاؤ اور سلام کا جواب دو “ ۔ تو یہ چیز مجھے اس بات کی طرف ترغیب دیتی ہے کہ میں کھانا کھلاؤں ۔ ( علامہ ہیثمی فرماتے ہیں : ) میں یہ کہتا ہوں امام ابن ماجہ نے اس روایت کا ایک حصہ نقل کیا ہے ۔
یہ روایت امام أحمد نے نقل کی ہے ۔ اس کی سند میں ایک راوی عبداللہ بن محمد بن عقیل ہے ، اور اس کی نقل کردہ حدیث حسن ہے ، اور اس میں ضعف پایا جاتا ہے ، اور اس روایت کے بقیہ رجال ثقہ ہیں ۔

سیدنا انس رضی اللہ عنہ بیان کرتے ہیں : ایک شخص نے نبی اکرم صلی اللہ علیہ وسلم کی خدمت میں عرض کی : آپ مجھے ایسے عمل کے بارے میں تعلیم دیجئے جو مجھے جنت داخل کروا دے نبی اکرم صلی اللہ علیہ وسلم نے فرمایا : ” تم کھانا کھلاؤ سلام پھیلاؤ پاکیزہ کلام کرو رات کے وقت نماز ادا کرو جب لوگ سو رہے ہوں تم سلامتی کے ساتھ جنت میں داخل ہو جاؤ گے “ ۔
یہ روایت امام بزار نے نقل کی ہے ۔ اس کی سند میں ایک راوی حفص بن اسلم ہے ، اور وہ ضعیف ہے ۔

حبیب بن ابوثابت بیان کرتے ہیں : سیدنا امام حسین رضی اللہ عنہ کی ایک زوجہ محترمہ نے ان کی زمین میں کسی جگہ کھانا تیار کیا انہوں نے کھانا کھا لیا پھر انہوں نے کھانا اٹھا لیا اسی دوران ان کا ایک غلام آ گیا تو امام حسین نے کھانا منگوایا تو اس غلام نے کہا: اے ابوعبداللہ ! میں کھانا نہیں کھانا چاہتا امام حسین رضی اللہ عنہ نے دریافت کیا : وہ کیوں اس نے بتایا تھوڑی دیر پہلے ہم نے سیدنا عبیداللہ بن عباس رضی اللہ عنہما کے ہاں کھانا کھایا ہے ، تو امام حسین رضی اللہ عنہ نے فرمایا : ان کے والد قریش کے سردار تھے ۔ نبی اکرم صلی اللہ علیہ وسلم نے ارشاد فرمایا ہے : ” اے بنوعبدالمطلب کھانا کھلاؤ اور پاکیزہ کلام کرو “ ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی عمرو بن ثابت بکری ہے ، اور وہ متروک ہے ۔

سیدنا امام حسن بن علی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” کھانا کھلاؤ اور پاکیزہ کلام کرو “ ۔
یہ روایت امام طبرانی نے نقل کی ہے ۔ اس کی سند میں قاسم بن محمد نامی راوی ہے ، اور وہ ضعیف ہے ۔

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اے بنوعبدالمطلب ! کھانا کھلانا تمہیں جنت میں داخل کروا دے گا ( یا جنت میں جگہ دلوا دے گا ) تو تم کھانا کھلاؤ اور پاکیزہ کلام کرو “ ۔ اس روایت کی سند میں ایک راوی عبداللہ بن محمد عبادی ہے ، اور میں اس سے واقف نہیں ہوں ۔ اس روایت کے بقیہ رجال صحیح کے رجال ہیں ۔

محمد بن زیاد بیان کرتے ہیں : عبداللہ بن حارث ہمارے پاس سے گزرتے تھے ، تو یہ کہا: کرتے تھے ۔ نبی اکرم صلی اللہ علیہ وسلم یہ فرمایا کرتے تھے ” کھانا کھلاؤ اور سلام پھیلاؤ تم جنت کے وارث بن جاؤ گے “ ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں ۔

مقدام بن شریح نے اپنے والد کے حوالے سے اپنے دادا کا یہ بیان نقل کیا ہے ؟ میں نے عرض کی : یا رسول اللہ ! آپ مجھے ایسی چیز کے بارے بتائیے جو میرے لئے جنت کو واجب کروا دے نبی اکرم صلی اللہ علیہ وسلم نے ارشاد فرمایا : کھانا کھلانا اور سلام پھیلانا جنت کو واجب کروا دیتے ہیں ۔ ایک روایت میں یہ الفاظ ہیں : ” اچھا کلام کرنا “ ۔
یہ روایت امام طبرانی نے دو اسناد کے ساتھ نقل کی ہے ۔ جن میں سے ایک کے رجال ثقہ ہیں ۔ اس باب سے متعلق کچھ احادیث نماز سے متعلق باب میں گزر چکی ہیں ۔

سیدنا عمران بن حصین رضی اللہ عنہ فرماتے ہیں : کھانا کھلانے والے رخصت ہو گئے ہیں یہ وہ لوگ تھے جن سے کھانا طلب کیا جاتا تھا ، اور نصیحت کرنے والے رخصت ہو گئے ہیں اور بھلانے والے باقی رہ گئے ہیں ۔ حسن بصری فرماتے ہیں : اللہ کی قسم ! اگر اب سیدنا عمران رضی اللہ عنہ زندہ ہوتے ، تو ان کا قول ( صورت حال کے ) زیادہ موافق ہوتا ۔
یہ روایت امام طبرانی نے دو اسناد کے ساتھ نقل کی ہے ۔ جن میں سے ایک کے رجال ثقہ ہیں ۔