مجمع الزوائد ومنبع الفوائد

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم سے ایسے شخص کے بارے میں دریافت کیا گیا : جس کی بیوی ہوتی ہے ، اور وہ اسے تین طلاقیں دیدیتا ہے اس کے بعد ایک مرد ، اُس عورت سے شادی کر لیتا ہے ، اور وہ اس کی رخصتی کروانے سے پہلے اس عورت کو طلاق دیدیتا ہے ، تو کیا وہ عورت اپنے پہلے شوہر کے لئے حلال ہو جائے گی راوی بیان کرتے ہیں ، تو نبی اکرم صلی اللہ علیہ وسلم نے ارشاد فرمایا : ” جی نہیں ! جب تک دوسرا شوہر اس عورت کے شہد کو نہیں چکھ لیتا جسے پہلے نے چکھا تھا ، اور عورت مرد کے شہد کو نہیں چکھ لیتی “ ۔
یہ روایت امام أحمد امام بزار اور امام ابویعلیٰ نے نقل کی ہے ۔ تاہم انہوں نے یہ الفاظ نقل کیے ہیں : ” دوسرا شوہر اس عورت کی رخصتی سے پہلے انتقال کر گیا “ ۔
یہ روایت امام طبرانی نے معجم اوسط میں نقل کی ہے ۔ اور اس کے رجال صحیح کے رجال ہیں صرف محمد بن دینار طاحی کا معاملہ مختلف ہے ۔ ابوحاتم ابوزرعہ اور ابن حبان نے اسے ثقہ قرار دیا ہے اس کے بارے میں ایسا کلام کیا گیا ہے جو نقصان دہ نہیں ہے ۔

سیدنا عبدالرحمن بن زبیر رضی اللہ عنہما بیان کرتے ہیں : رفاعہ بن سموال نے اپنی بیوی کو طلاق دیدی وہ خاتون نبی اکرم صلی اللہ علیہ وسلم کے پاس آئی اور بولی: یا رسول اللہ ! عبدالرحمن نے میرے ساتھ شادی کر لی ہے ، لیکن اس کا ساتھ صرف اس کی مانند ہے اس خاتون نے اپنے کپڑے کے کنارے کی طرف اشارہ کر کے یہ بات کہی ، تو نبی اکرم صلی اللہ علیہ وسلم نے اس عورت کے کلام سے اعراض کیا اور پھر اس سے فرمایا تم یہ چاہتی ہو کہ تم رفاعہ کے پاس واپس چلی جاؤ ؟ جی نہیں ! ایسا اس وقت تک نہیں ہو سکتا جب تک تم اس ( یعنی اپنے دوسرے شوہر ) کا شہد نہیں چکھ لیتی ہو اور وہ تمہارا شہد نہیں چکھ لیتا “ ۔
یہ روایت امام بزار اور امام طبرانی نے نقل کی ہے ۔ اور ان دونوں کے رجال ثقہ ہیں
یہ روایت امام مالک نے ” موطا “ میں مرسل روایت کے طور پر نقل کی ہے ۔ اور یہ روایت یہاں متصل ہے ۔

سیدنا عبیداللہ رضی اللہ عنہ اور سیدنا فضل بن عباس رضی اللہ عنہما بیان کرتے ہیں : غمیصاء ( راوی کو شک ہے یا شاید یہ الفاظ ہیں : ) رمیصاء نامی خاتون نبی اکرم صلی اللہ علیہ وسلم کی خدمت میں اپنے شوہر کی شکایت کرنے کے لئے آئیں اس نے کہا: وہ شخص اس عورت کے ساتھ قربت نہیں کرتا ہے اس کے شوہر نے کہا: یا رسول اللہ ! یہ جھوٹ بول رہی ہے میں ایسا کرتا ہوں لیکن یہ چاہتی کہ یہ اپنے پہلے شوہر کے پاس واپس چلی جائے راوی بیان کرتے ہیں ، تو نبی اکرم صلی اللہ علیہ وسلم نے ارشاد فرمایا : ” یہ عورت اس شخص کے لئے اس وقت تک حلال نہیں ہو گی جب تک ( دوسرا شوہر ) اس کا شہد نہیں چکھ لیتا“ ۔
یہ روایت امام ابویعلیٰ نے نقل کی ہے ۔ اور اس کے رجال صحیح کے رجال ہیں ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” جس عورت کو تین طلاقیں دیدی گئی ہوں وہ اپنے پہلے شوہر کے لئے اس وقت تک حلال نہیں ہو گی جب تک وہ دوسری شادی نہیں کر لیتی اور دوسرا شوہر اس کے ساتھ گھل مل کر اس کا شہد نہیں چکھ لیتا “ ۔
یہ روایت امام طبرانی اور امام ابویعلیٰ نے نقل کی ہے ۔ تاہم انہوں نے سیدہ عائشہ رضی اللہ عنہا کی روایت کی مانند الفاظ نقل کیے ہیں اس کی مانند ہی ہے ۔ امام ابویعلیٰ کے رجال صحیح کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں : بنوقریظہ سے تعلق رکھنے والی ایک خاتون جس کا نام تمیمہ تھا وہ سیدنا عبدالرحمن بن زبیر رضی اللہ عنہما کی اہلیہ تھیں رفاعہ جن کا تعلق بنوقریظہ سے تھا انہوں نے اس خاتون کے ساتھ شادی کر لی پھر انہوں نے اس خاتون سے علیحدگی کر لی اس خاتون نے دوبارہ عبدالرحمن بن زبیر کے پاس واپس جانے کا ارادہ کیا ( یعنی دوبارہ اس کے ساتھ شادی کا ارادہ کیا ) تو اس نے عرض کی : یا رسول اللہ ! اس کا ساتھ ( یعنی دوسرے شوہر کا ساتھ ) میرے اس کپڑے کے کنارے کی طرح ہے ۔ نبی اکرم صلی اللہ علیہ وسلم نے ارشاد فرمایا : اللہ کی قسم ! اے تمیمہ تم عبدالرحمن کی طرف اس وقت تک واپس نہیں جا سکتی ہو جب تک اس کے علاوہ کوئی اور شخص ( یعنی تمہارا دوسرا شوہر ) تمہارا شہد نہیں چکھ لیتا اس خاتون نے عرض کی : یا رسول اللہ ! وہ میرے پاس ہبہ کے طور پر آیا ہے ۔ ( علامہ ہیثمی فرماتے ہیں : ) میں یہ کہتا ہوں
یہ روایت صحیح میں مذکور ہے تاہم اس میں اس خاتون کا نام تمیمہ ذکر نہیں ہوا ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی ابن اسحاق ہے ، اور وہ مدلس ہے ۔

سیدنا عبداللہ بن مسعود رضی اللہ عنہ ایسی خاتون کے بارے میں فرماتے ہیں : جس کی رخصتی سے پہلے اسے تین طلاقیں دیدی جاتی ہیں کہ وہ شوہر کے لئے اس وقت تک حلال نہیں ہو گی جب تک دوسری شادی نہیں کر لیتی ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں صرف عاصم بن ابونجود کا معاملہ مختلف ہے وہ ثقہ ہے ، اور اس میں ضعف پایا جاتا ہے ۔

سیدنا عبداللہ بن مسعود رضی اللہ عنہ یہ فرماتے ہیں : ایسی عورت کے آقا کا اس کے ساتھ صحبت کرنا اسے اس کے شوہر کے لئے حلال نہیں کرے گا ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں ، البتہ ابن جریج یہ کہتے ہیں : مجھے عاصم ، مسروق اور ابراہیم نخعی کے حوالے سے
یہ روایت بیان کی گئی ہے ۔ انہوں نے اس شخص کا نام نہیں بتایا کہ جس نے انہیں
یہ روایت بیان کی ہے ۔

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : عسیلہ ( شہد چکھنے ) سے مراد صحبت کرنا ہے ۔
یہ روایت امام أحمد اور امام ابویعلیٰ نے نقل کی ہے ۔ اس کی سند میں ایک راوی ابوعبدالملک مکی ہے میں اس سے اس حدیث کے علاوہ ( کسی اور روایت کے حوالے سے ) واقف نہیں ہوں ۔ اس روایت کے بقیہ رجال صحیح کے رجال ہیں ۔

امام ابویعلیٰ کی ایک روایت میں یہ الفاظ ہیں : سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے لفظ ” عسیلہ “ کے ذریعے نکاح مراد لیا تھا ( یعنی شہد سے مراد صحبت کرنا ہے ) ۔