مجمع الزوائد ومنبع الفوائد

سیدنا انس بن مالک رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا اس نے عزل کے بارے میں دریافت کیا ، تو نبی اکرم صلی اللہ علیہ وسلم نے ارشاد فرمایا : جس نطفے سے بچے نے پیدا ہونا ہے اگر اسے کسی چٹان پر ڈال دیا جائے ، تو اللہ تعالیٰ اس میں سے بھی بچے کو نکال دے گا ( راوی کو شک ہے شاید یہ الفاظ ہیں : ) اس میں سے بھی بچہ نکل آئے گا اللہ تعالیٰ نے جس جان کو پیدا کرنا ہے وہ اسے پیدا کر ہی دے گا ۔
یہ روایت امام أحمد اور امام بزار نے نقل کی ہے ۔ اور ان دونوں کی سند حسن ہے ۔

سیدنا عبادہ رضی اللہ عنہ بیان کرتے ہیں : جن لوگوں نے سب سے پہلے عزل کا آغاز کیا وہ انصار سے تعلق رکھنے والے کچھ لوگ تھے وہ نبی اکرم صلی اللہ علیہ وسلم کی خدمت میں حاضر ہوئے انہوں نے عرض کی : انصار سے تعلق رکھنے والے کچھ لوگ عزل کرتے ہیں ، تو نبی اکرم صلی اللہ علیہ وسلم پریشان ہو گئے آپ نے ارشاد فرمایا : جس جان نے پیدا ہونا ہے اس نے پیدا ہو کے رہنا ہے ، تو میں نہ اس کا حکم دیتا ہوں ، اور نہ ہی اس سے منع کرتا ہوں ۔
یہ روایت امام طبرانی نے معجم اوسط اور معجم کبیر میں نقل کی ہے ۔ اس کی سند میں ایک راوی عیسیٰ بن سنان حنفی ہے ، جسے ابن حبان اور دیگر حضرات نے ثقہ قرار دیا ہے ، اور ایک جماعت نے اسے ضعیف کہا: ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اس ذات کی قسم ! جس کے دست قدرت میں میری جان ہے جس نطفے سے اللہ تعالیٰ نے میثاق لیا ہے اگر اسے کسی چٹان پر ڈالا جائے ، تو اللہ تعالیٰ اس میں سے بھی انسان کو پیدا کر دے گا “ ۔
یہ روایت امام طبرانی نے معجم اوسط میں نقل کی ہے ۔ اور اس کی سند میں ایسا راوی ہے جس سے میں واقف نہیں ہوں ۔

سیدنا حذیفہ بن یمان رضی اللہ عنہ بیان کرتے ہیں : لوگ عزل کے بارے میں بات چیت کر رہے تھے ۔ نبی اکرم صلی اللہ علیہ وسلم نے ان کی بات چیت سنی آپ ان کے پاس تشریف لائے ، اور آپ نے ارشاد فرمایا : کیا تم لوگ ایسا کرتے ہو ۔ انہوں نے عرض کی : جی ہاں نبی اکرم صلی اللہ علیہ وسلم نے فرمایا : کیا تم لوگ یہ بات نہیں جانتے ہو کہ اللہ تعالیٰ نے جس بھی جان کو پیدا کرنا ہے وہ پیدا ہو کے رہے گی ۔
یہ روایت امام طبرانی نے نقل کی ہے ۔ اس کی سند میں ایک راوی مثنی بن صباح ہے ، اور وہ جمہور کے نزدیک متروک ہے یحیی بن معین نے اسے ثقہ قرار دیا ہے اس روایت کے بقیہ رجال ثقہ ہیں ۔

سیدنا صرمہ عذری رضی اللہ عنہ بیان کرتے ہیں : نبی اکرم صلی اللہ علیہ وسلم بنوسلیم سے جنگ کے لئے تشریف لے گئے ہمیں عرب کی معزز عورتیں ملیں ہمیں ان کی فروخت میں بھی دلچسپی تھی اور ہم اکیلے رہ کے بھی تنگ آ گئے تھے ، تو ہم نے یہ ارادہ کیا کہ ہم ان کے ساتھ صحبت کر لیتے ہیں اور عزل کر لیں گے ہم میں سے کسی ایک نے یہ کہا: ہمیں ایسا نہیں کرنا چاہیے جب کہ نبی اکرم صلی اللہ علیہ وسلم ہمارے درمیان موجود ہیں ہمیں پہلے آپ سے پوچھ لینا چاہیے ہم نے نبی اکرم صلی اللہ علیہ وسلم سے دریافت کیا ، تو نبی اکرم صلی اللہ علیہ وسلم نے ارشاد فرمایا : تم لوگ عزل کرو یا نہ کرو قیامت کے دن تک کے لئے اللہ تعالیٰ نے جس جان کے بارے میں طے کر دیا ہے کہ اس نے پیدا ہونا ہے ، تو وہ ( پیدا ) ہو کے رہے گی ۔
یہ روایت امام طبرانی نے نقل کی ہے ۔ اس کی سند میں ایک راوی عبدالحمید بن سلیمان ہے ، اور وہ ضعیف ہے ۔

سیدنا واثلہ بن اسقع رضی اللہ عنہ بیان کرتے ہیں : بنو سلیم سے تعلق رکھنے والے کچھ افراد نبی اکرم صلی اللہ علیہ وسلم کی خدمت میں حاضر ہوئے انہوں نے عرض کی : یا رسول اللہ ! ہمیں قیدی عورتیں ملی ہیں ہم ان کے ساتھ عزل کر لیں ؟ نبی اکرم صلی اللہ علیہ وسلم نے فرمایا : کیا تم ایسا کرتے ہو ۔ انہوں نے عرض کی : جی ہاں نبی اکرم صلی اللہ علیہ وسلم نے فرمایا : جس بھی جان کے بارے میں اللہ تعالیٰ نے یہ ارادہ کیا ہو کہ وہ کسی شخص کی پشت سے نکلے گی ، تو اگر اللہ نے چاہا تو وہ نکل کے رہے گی اگر تم نہیں مانتے ، تو تم پر کوئی حرج نہیں ہے کہ اگر تم ایسا نہ کرو ۔
یہ روایت امام طبرانی نے نقل کی ہے ۔ اور اس کے رجال ثقہ ہیں ۔

سیدنا عبداللہ بن مسعود رضی اللہ عنہ بیان کرتے ہیں : اگر اللہ تعالیٰ نے کسی شخص کی پشت میں کسی جان سے میثاق لے لیا ہے پھر اگر آدمی اس نطفے کو چٹان پر ڈال دے ، تو اللہ تعالیٰ اس چٹان میں سے بھی اس کو پیدا کر دے گا اب اگر تم چاہو ، تو مکمل کر لو اور اگر چاہو ، تو تم عزل نہ کرو ۔
یہ روایت امام طبرانی نے نقل کی ہے ۔ اس کی سند میں ایک ضعیف راوی ہے جس کا نام میں نے بیان نہیں کیا اس روایت کے بقیہ رجال صحیح کے رجال ہیں ۔

زائدہ بن عمیر طائی بیان کرتے ہیں : میں نے سیدنا عبداللہ بن عباس رضی اللہ عنہما سے دریافت کیا : عزل کے بارے میں آپ کی کیا رائے ہے ؟ انہوں نے فرمایا : نبی اکرم صلی اللہ علیہ وسلم نے اس کے بارے میں ایک بات کہی تھی اور وہ ویسا ہی ہے جس طرح آپ نے ارشاد فرمایا تھا : ویسے میری اپنی ذات رائے یہ ہے کہ ( ارشاد باری تعالیٰ ہے : ) ” تمہاری بیویاں تمہارے کھیت ہیں تم اپنے کھیت میں جیسے چاہو آؤ “ ۔ تو جو شخص چاہے وہ عزل کر لے اور جو شخص چاہے اسے ترک کر دے ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں صرف زائدہ بن عمیر کا معاملہ مختلف ہے ، اور وہ ثقہ ہے ۔

سیدنا ابوہریرہ رضی اللہ عنہ بیان کرتے ہیں : یہودیہ کہتے تھے کہ عزل چھوٹی قسم کا زندہ درگور کرنا ہے اس بات کی اطلاع نبی اکرم صلی اللہ علیہ وسلم کو ملی ، تو آپ نے ارشاد فرمایا : یہودی غلط کہتے ہیں : اگر اللہ تعالیٰ نے کسی چیز کو پیدا کرنے کا ارادہ کیا ہو ، تو اسے کوئی چیز نہیں روک سکتی ۔ ( یہاں ایک لفظ کے بارے میں راوی کو شک ہے ) ۔
یہ روایت امام بزار نے نقل کی ہے ۔ اور اس کے رجال صحیح کے رجال ہیں صرف اسماعیل بن مسعود کا معاملہ مختلف ہے ، اور وہ ثقہ ہے ۔

سیدنا ابوسعید خدری رضی اللہ عنہ کے بارے میں منقول ہے : انہوں نے نبی اکرم صلی اللہ علیہ وسلم کی خدمت میں عرض کی : یہودی یہ کہتے ہیں : کہ عزل چھوٹی قسم کا زندہ درگور کرتا ہے ، تو نبی اکرم صلی اللہ علیہ وسلم نے ارشاد فرمایا : یہودی غلط کہتے ہیں ۔
یہ روایت امام بزار نے نقل کی ہے ۔ اس کی سند میں ایک راوی موسیٰ بن وردان ہے ، اور وہ ثقہ ہے اسے ضعیف قرار دیا گیا ہے اس روایت کے بقیہ رجال ثقہ ہیں ۔

سیدنا عبداللہ بن مسعود رضی اللہ عنہ کے بارے میں یہ بات منقول ہے کہ انہوں نے عزل کے بارے میں یہ فرمایا ہے : یہ پوشیدہ قسم کا چھوٹا زندہ درگور کرنا ہے ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں سیدنا عبداللہ بن مسعود رضی اللہ عنہ نے اس موقف سے رجوع کر لیا تھا ۔

سیدنا ابوسعید خدری رضی اللہ عنہ بیان کرتے ہیں : سیدنا عمر رضی اللہ عنہ اور سیدنا عبداللہ بن عمر رضی اللہ عنہما عزل کو مکروہ قرار دیتے تھے جبکہ سیدنا زید رضی اللہ عنہ اور سیدنا عبداللہ بن مسعود رضی اللہ عنہ عزل کر لیتے تھے ۔
یہ روایت امام ابویعلیٰ نے سیدنا ابوسعید خدری رضی اللہ عنہ سے منقول عزل کے بارے میں حدیث کے ضمن میں نقل کی ہے ۔ اور اس کے رجال ثقہ ہیں ۔

سیدنا جریر رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا اس نے عرض کی : مشرکین میں سے مجھے ( مال غنیمت کے حصے میں ) صرف ایک لڑکی ملی ہے ، جسے میں بازار میں فروخت کرنا چاہتا ہوں ، کیا میں اس سے عزل کر لوں ؟ نبی اکرم صلی اللہ علیہ وسلم نے ارشاد فرمایا : اس کے پاس وہ چیز آ جائے گی جو اس کے نصیب میں لکھی ہے ۔
یہ روایت امام طبرانی نے نقل کی ہے ۔ اس کی سند میں ایک راوی مندل بن علی ہے ، اور وہ ضعیف ہے اس کی توثیق کی گئی ہے ۔

علی بن حسن نامی صاحب اپنی دادی کا یہ بیان نقل کرتے ہیں سیدنا امام حسن بن علی رضی اللہ عنہ اس خاتون کے ساتھ عزل کر لیتے تھے ( راوی کہتے ہیں : ) وہ خاتون سیدنا امام حسن رضی اللہ عنہ کی کنیز تھیں ۔
یہ روایت امام طبرانی نے نقل کی ہے ۔ علی نامی راوی اور اس کی دادی ، میں ان دونوں سے واقف نہیں ہوں ۔