مجمع الزوائد ومنبع الفوائد

سیدنا حذیفہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص اپنے کسی بھائی کے ساتھ کوئی شرط طے کرتا ہے ، اور اس کا یہ ارادہ نہیں ہوتا کہ وہ شرط کو پورا کرے گا ، تو وہ ایسے شخص کی مانند ہے ، جو اپنے پڑوسی کو کسی ایسی مشکل میں گرفتار کروا دیتا ہے ، جس سے وہ نکل نہ سکے “ ۔
یہ روایت امام أحمد نے نقل کی ہے اس کی سند میں ایک راوی حجاج بن ارطاۃ ہے ، وہ ثقہ اور تدلیس کرنے والا ہے ، اس روایت کے بقیہ رجال صحیح کے رجال ہیں ۔

سیدنا رافع بن خدیج رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مسلمان اپنی شرائط کے پابند ہوں گے ، جبکہ وہ حلال ہوں “ ( یا جبکہ وہ اُس چیز کے بارے میں ہوں ، جو حلال ہو ) ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی حکیم بن جبیر ہے اور وہ متروک ہے ، ابوزرعہ کہتے ہیں : اگر اللہ نے چاہا ، تو اس کا محل صدق ہو گا ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ہر وہ شرط ، جس کی اجازت اللہ کی کتاب میں نہ ہو ، وہ باطل شمار ہو گی ، خواہ وہ سو شرطیں ہی کیوں نہ ہوں“ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عمرو بن یحیی بن عفرہ ہے ، میں نے کسی کو اس کے حالات بیان کرتے ہوئے نہیں پایا ہے ، اس روایت کے بقیہ رجال ثقہ ہیں ۔