مجمع الزوائد ومنبع الفوائد

سیدنا ثوبان رضی اللہ عنہ بیان کرتے ہیں : نبی اکرم صلی اللہ علیہ وسلم نے رشوت دینے والے ، رشوت لینے والے اور رائش ( راوی کہتے ہیں : یعنی وہ شخص جو اُن دونوں کے درمیان معاملہ طے کرتا ہے ) پر لعنت کی ہے ۔
یہ روایت امام أحمد ، بزار اور امام طبرانی نے معجم کبیر میں نقل کی ہے اس کی سند میں ایک راوی ابوخطاب ہے اور وہ مجہول ہے ۔

سیدہ عائشہ صدیقہ رضی اللہ عنہا بیان کرتی ہیں : اللہ کے رسول نے رشوت دینے والے اور رشوت لینے والے پر لعنت کی ہے ۔
یہ روایت امام بزار نے اور امام ابویعلیٰ نے نقل کی ہے اس کی سند میں ایک راوی اسحاق بن یحیی بن طلحہ ہے اور وہ متروک ہے ۔

سیدنا عبدالرحمن بن عوف رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” رشوت دینے والا اور رشوت لینے والا جہنم میں ہوں گے “ ۔
یہ روایت امام بزار نے نقل کی ہے اس کی سند میں ایسا راوی ہے ، جس سے میں واقف نہیں ہوں ۔

سیدنا عبداللہ بن عمرو رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” رشوت دینے والا اور رشوت لینے والا جہنم میں ہوں گے “ ۔ ( علامہ ہیثمی فرماتے ہیں : ) میں یہ کہتا ہوں : ” سنن “ میں اس صحابی کے حوالے سے یہ روایت منقول ہے : ” اللہ تعالیٰ نے رشوت دینے والے اور رشوت لینے والے پر لعنت کی ہے “ ۔
یہ روایت امام طبرانی نے معجم صغیر میں نقل کی ہے اور اس کے رجال ثقہ ہیں ۔

سیدہ ام سلمہ رضی اللہ عنہما نبی اکرم صلی اللہ علیہ وسلم کا یہ فرمان نقل کرتی ہیں : ” اللہ تعالیٰ نے فیصلہ کرنے میں ، رشوت دینے والے اور رشوت لینے والے پر لعنت کی ہے “ ۔
یہ روایت امام طبرانی نے معجم کبیر میں نقل کی ہے اور اس کے رجال ثقہ ہیں ۔

علیم بیان کرتے ہیں : ہم لوگ ایک سطح پر بیٹھے ہوئے تھے ہمارے ساتھ ایک صحابی موجود تھے ، علیم کہتے ہیں : میرے علم کے مطابق وہ سیدنا عبس غفاری رضی اللہ عنہ تھے ، لوگ طاعون میں نکل رہے تھے ، سیدنا عبس رضی اللہ عنہ نے کہا: اے طاعون ! تو مجھے گرفت میں لے انہوں نے تین مرتبہ یہ کلمات کہے ، تو علیم نے ان سے کہا: آپ نے یہ بات کیوں کہی ہے ؟ کیا نبی اکرم صلی اللہ علیہ وسلم نے یہ بات نہیں ارشاد فرمائی ہے : ” تم میں سے کوئی ایک شخص موت کی آرزو نہ کرے ، کیونکہ اس صورت میں اس کا عمل منقطع ہو جائے گا ، اور اسے دوبارہ بھی نہیں بھیجا جائے گا کہ وہ نئے سرے سے عمل کرے “ ۔ تو انہوں نے فرمایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” چھ چیزوں سے پہلے موت کی طرف جلدی کرو ! بے وقوفوں کی حکومت ، شرطیں زیادہ لگایا جانا ، فیصلے کو فروخت کرنا ، خون کو کم تر سمجھنا ، رشتے داری کے حقوق پامال کرنا ، اور ایسے لوگوں کا سامنے آنا ، جو قرآن کو گانے کا ذریعہ بنا لیں گے ، وہ اپنے آگے ایسے شخص کو کریں گے ، جو ان کو گا کر سنائے گا ، اگرچہ وہ دین کے علم کے حوالے سے اُن میں سب سے کم تر ہو “ ۔
یہ روایت امام طبرانی نے معجم اوسط میں نقل کی ہے ، تاہم انہوں نے یہ لفظ نقل کیے ہیں : سیدنا عابس غفاری رضی اللہ عنہ فرماتے ہیں : ” وہ ایسے شخص کو آگے کریں گے ، جو ان میں سب سے بڑا فقیہ نہیں ہو گا اور سب سے بڑا عالم نہیں ہو گا اور سب سے زیادہ فضیلت والا نہیں ہو گا ، بلکہ وہ ہو گا ، جو انہیں گا کر سنائے گا “ ۔ اس روایت کی سند میں ایک راوی عثمان بن عمیر ہے اور وہ ضعیف ہے ۔

سیدنا ابوہریرہ رضی اللہ عنہ فرماتے ہیں : میرے ذہن میں ایک حدیث ہے : اگر میں اُسے تم لوگوں کو بیان کر دوں ، تو تم لوگ مجھے پتھر مارو گے ، پھر انہوں نے کہا: اے اللہ ! میں ساٹھ ہجری تک نہ پہنچوں ، لوگوں نے کہا: ساٹھ ہجری کا کیا معاملہ ہے ؟ انہوں نے فرمایا : بچوں کی حکومت آ جائے گی ، فیصلے فروخت ہوں گے ، شرطیں زیادہ عائد کی جائیں گی ، جان پہچان کی بنیاد پر گواہی دی جائے گی امانت کو غنیمت بنا لیا جائے گا ، صدقہ کو جرمانہ سمجھا جائے گا ، اور ایسے لوگ آئیں گے ، جو قرآن کو مزامیر بنا لیں گے ۔ حماد کہتے ہیں : میرا خیال ہے ۔ انہوں نے یہ بھی کہا: تھا : کہ خون کو ہلکا سمجھا جائے گا
یہ روایت امام طبرانی نے معجم اوسط میں نقل کی ہے اس کی سند میں ایک راوی قاسم بن محمد ہے اور وہ ضعیف ہے ۔

مسروق بیان کرتے ہیں : میں سیدنا عبداللہ رضی اللہ عنہ کے پاس بیٹھا ہوا تھا ، ایک شخص نے ان سے دریافت کیا : حرام کیا ہے ؟ انہوں نے فرمایا : فیصلہ دیتے ہوئے رشوت لینا ، انہوں نے فرمایا : یہ کفر ہے ، پھر انہوں نے یہ آیت تلاوت کی : ” اور جو شخص اس کے مطابق فیصلہ نہیں دیتا ، جو اللہ نے نازل کیا ہے ، تو یہی لوگ کافر ہیں“ ۔
یہ روایت امام ابویعلیٰ نے نقل کی ہے ، امام ابویعلیٰ کے استاد محمد بن عثمان بن عمر سے میں واقف نہیں ہوں ۔

سیدنا عبداللہ بن مسعود رضی اللہ عنہ فرماتے ہیں : فیصلے میں رشوت لینا کفر ہے اور یہ لوگوں کے درمیان حرام ہے ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ۔

ان کے حوالے سے یہ بات منقول ہے : وہ فرماتے ہیں : سحت ( حرام ) یہ ہے کہ دین میں رشوت لی جائے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابونعیم ہے ، جس کا نام بیان نہیں کیا گیا ہے ، اگر تو یہ فضل بن دکین ہے ، تو پھر یہ ثقہ ہے اور اگر یہ ضرار بن صرد ہے ، تو پھر یہ ضعیف ہے ، اور ان دونوں نے سفیان سے روایت نقل کی ہے اور اس سے علی بن عبدالعزیز بغوی نے روایت نقل کی ہے ۔